د آلمان د روغتيا وزير ينس شپان د دوشنبې په ورځ (د نومبر ۲۳ نيټه) د « Redaktions Netzwerk Deutschland» شبکې ته وويل چې ما د آلمان د ۱۶ ايالتونو چارواکو ته ويلي دي چې د دسمبر مياشتې په نيمايي کې د واکسيناسيون مرکزونه چمتو کړي، په هغه صورت کې چې اروپايي چارواکي د لومړي واکسين جواز جاري کړي.
شپان زياته کړه: «زه دې ته لومړيتوب ورکوم چې موږ د واکيناسيون يو چمتو مرکز ولرو که هغه د څو ورځو له پاره غير فعاله هم پاتې شي، خو نه دا چې واکسين ولرو خو د ويش زمينه یې برابره نه وي.» هغه وويل چې لومړی به هغه کسان چې ډېر له خطر سره مخامخ وي، واکسين شي، د مثال په توگه د ډېر عمر کسان.
د شپان د اټکلونو پر اساس آلمان د اروپايي کميسيون په چوکاټ کې د کرونا تر ۳۰۰ ميليونو دوزه زيات واکسين د ځان له پاره تضمين کړي دي.
نوموړي وړاندوينه کوي: «آن د يوه کس پر سر د دوو دوزو سره به هم موږ د خپل نفوس [آلمان] له پاره په کافي اندازه واکسين ولرو او کيدای شي نورو هېوادونو ته یې هم ورکړو.»
د پرمختگ په ترشل کې ولاړ هېوادونه
د ملگرو ملتونو ادارې يونيسف هم د دوشنبې په ورځ اعلان وکړ چې په راتلونکي ميلادي کال کې به د کرونا واکسين کابو ۲ ميليارده دوزه چې د بې وزلو هېوادونو له پاره په نظر کې نيول شوي، دغو هيوادونه ته انتقال شي. زياته شوې چې په دې کې د افغانستان، يمن او بروندي په څېر هيوادونه شامل دي.
اړونده موضوع: رپوټ: آلمان د کرونا واکسيناسيون له پاره په سونو مرکزونه جوړوي
د يونيسف د اکمالاتو څانگې له خوا ويل شوي چې دا «ستره دنده» به د «کوواکس» د نړيوال تخصصي پروگرام د برخې په توگه د ملگرو ملتونو د روغتيا سازمان په مرسته ترسره شي چې ۳۵۰ هوايي او د کارگو شرکتونه به پکې برخه واخلي.
د شنبې په ورځ د جي – شل سترو اقتصادي هيوادونو هم ژمنه وکړه چې د کرونا واکسين عادلانه توزيع به تضمين کړي.
منځنی ختيځ
په دې منځ کې د عامې روغتيا د برخې کارپوهانو د کرونا ویروس له وجې د غزې تړاډې د روغتيايي سیسټم په ټپه د دريدو څخه خبرداری ورکړی.
له اگست میاشتې راهيسې په غزې تراډه کې د کرونا ويروس ۱۴۰۰۰ مثبتې پېښې ثبت شوي دي او د کرونا له کبله د ۶۵ تنو د مړينې خبر ورکړل شوی دی. د روغتيايي چارواکي عبدالروف المانامه په حواله روغتونونه د وينتيلاتورونو د نه شتون له ستونزې سره مخ دي.
نوموړي زياته کړې: «په لسو ورځو کې به د روغتيا سيسټم نور د دې حالت د زغم وړتيا ونه لري.»
ب. ص/ ن. ز (dpa, Reuters)
زموږ له آرشيف څخه:
په اروپا کې د کرونا دوهمه څپه او نوي محدوديتونه
په اروپايي هيوادونو کې کرونا ناروغۍ تر کميدو وروسته، اوس يو ځل بيا دغې وبا زور اخیستی دی. حکومتونه په دې هڅه کې دي چې د کرونا ويروس د لا ډير خپريدو د مخنیوي له پاره نوی محدودیتونه ولګوي.
انځور: Philippe Lopez/AFP/Getty Imagesپه آلمان کې د هغو ښارونو شمير مخ پر ډيريدو دی چې د کرونا ويروس خطر پکې لوړ دی. مونشن د آلمان وروستي لوی ښار دی چې په دې ډله کې شامليږي. په برلین کې وروسته د ۷۰ کلونو پر شپې ګرځيدو بنديز لګول شوی دی. لږ تر لږه د اکتوبر میاشتې تر پايه بايد د شپې پر ۱۱ بجو ټول دوکانونه او سوداګريز مرکزونه تړلي وي.
د چک جمهوريت د کرونا ويروس له ويرې اوس پر عمومي يا ملي قرنطين فکر کوي. د اکتوبر له پنځمې د ماسکونو اغوستل جبري شوي، په غونډو کې بايد له لسو کسانو ډير اشتراک و نه کړي. مغازو ته هم امر شوی دی چې د ځوانانو د راټوليدو د مخنیوی له پاره دې د وایفای خدمات بند کړي.
د هسپانيا کابينې د کرونا د مثبتو پيښو له ډيريدو سره د مقابلې له پاره، په پلازمينه مادرید کې ۱۵ ورځنی بيړنی حالت وضع کړی. دغه اقدام حکومت ته فرصت ورکړ چې د ټول هيواد په سطحه قرنطين عملي کړي چې دغه کار اعتراضونه هم له ځانه سره لرل. دغه حالت وروسته له هغې وضع شو چې د مادريد سيمه ایز حکومت د ټول هيواد په سطحه د ملي قرنطين غوښتنه رد کړه.
په پاريس کې د کرونا د مثتبو پيښو په بيا ډيريدو سره بارونه په خپل حال تړلي پاتې شول. فرانسې یوازې د يکشنبې په ورځ د کرونا نژدې ۲۷ زره نوې مثبتې پيښې اعلان کړې. دا په دغه هیواد کې د کرونا ناروغۍ د خپريدو له پيله تر اوسه، په يوه ورځ کې تر ټولو ډيرې مثبتې پيښې دي.
پولند کې هم د کرونا پيښې له سره ډيري شوي، خو ښوونځي لا هم خلاص دي. خو نوي ټولنيز محدوديتونه پکې لګول شوي دي. د بيلګې په توګه د هغو کسانو له پاره چې عمرونه يې د ۶۰ او ۶۵ کلونو تر منځ دي، د هغوی له پاره د سهار له لسو بجو تر غرمې پورې ځانګړي دوکانونه خلاص وي. د ماسکونو اغوستل د ټولو له پاره اجباري شوي دي. پولند له ۳۸ ميلیونه نفوس سره د کرونا څه باندې ۱۲۰ زره مثبتې پيښې لري چې ۲۹۷۲ کسان يې مړه دي.
سلواکیا د اکتوبر له ۱۳مې نېټې څخه امر کړی دی چې په غونډو کې باید تر شپږو کسانو ډير نه وي. د کورنيو غړي استثنا دي. د ماسکونو اغوستل اجباري دي او د هر ډول ټولنيزو مناسبتونو لمانځل، په کلیساو کې د مذهبي مراسمو په ګډون، ممنوع دي. ورزشي کلپونه تړل شوي او رستورانټونو ته اجازه نه لري چې دننه مشتريانو ته ډوډۍ ورکړي. دغه انځور د سپتمبر ۳۰مې دی چې پکې د هاکي لوبې مينه وال د اعتراض پر مهال ليدل کيږي.
د انګلستان حکومت، د کرونا د خطر له مخې، ټول هيواد په درو درجو «متوسط»، «لوړ» او «ډير لوړ» ويشلی دی. حکومت په دې اړه خلکو ته يو «درې درجه يي» سیستم معرفي کړی دی. د دغه سیستم له مخې، ليورپول او شمال لوېديځ اينګلند په «ډيره لوړه درجه» خطرناک ځایونو کې راځي. په دغو ښارونو کې به محدودیتونه ډير شي، لکه د ورزشي کلپونو، شرابخانو او قیمارخانو په څير ځایونو بندول.
