په بریتانیا کي د کرونا ویروس دوه نور تغیر سوي ډولونه هم کشف سوي دي. د کارپوهانو يوې ډلي د دغو ډولونو يو يې د « سختي اندیښنې وړ» په کتګورۍ کي شامل کړی دی.
انځور: picture-alliance/CDC
اعلان
هغو کارپوهانو چي حکومت ته په دې اړه مشورې ورکوي، څرګنده کړې ده چي د کرونا ویروس غه دواړي نوي بڼي د جنوبي افریقا او برازیل له ډول سره شباهت لري. لکه څنګه چي په لندن کي د روغتیا وزارت خبر ورکړی دی، یو له هغو څخه یې چی اول په بریستول کي راښکاره سو کارپوهانو ډیر خطرناک درجه بندي کړی دی.
د کرونا د موجوده نوي ډول په هکله اندیښنې
د هغه علت دادی چي په موجوده نوي ډول (E484K) کي جینیتیکي تغیر ته اشاره سوې. کارپوهان دغه جینیتیکي بدلون په جنوبي افریقا او برازیل کي د سارس کووید ۲ ډول څخه پیژني. هغه د کرونا ویروس په سپایک – پروتین باندي اغیز کوي او پر واکسین او یا هم د کرونا د ناروغۍ پر تیریدو سربیره د بدن د معافیت د کمزورۍ سبب کیږي.
انځور: Thomas Brégardis/MAXPPP/dpa/picture alliance
خو د انګلستان د عامي روغتیا له ادارې څخه سوسن هاپکینس دا خبر محدودوي چي د کرونا E484K ډول د تیر کال له اپریل مياشتي راهیسي په بیلابیلو شکلونو او په وار وار سره راښکاره سوی وي. همدارنګه د هغه دوهم ډول B.1.1.7 هم چي اول په لیورپول کي راښکاره سوی دی. د بریستول او لیرپول ډولونه تر اوسه پوري په بریتانیا کي په مجموعي ډول ۷۶ پیښو کي ترسترګو سوي.
د لومړنیو نتایجو له مخي، په بریتانیا کي د کرونا ويروس د نوي ډول پر وړاندي د بیوتیک فایزر او آسترازینکا واکسین اغیزمن ثابت سوی. په دې ترڅ کي بې اعتمادي په دې برخه کی موجوده ده چي آیا د آسترازینکا واکسین د جنوبي افریقا د نوي ډول په مقابل کی بشپړ معافیت رامنځته کوي او که څنګه. له همدې کبله جنوبي افریقا په اول سر کي د آسترازینکا واکسين د پیلولو کمپاين په ټپه ودراوه.
DW.GP.NZ
په آلمان کي خلک څنګه واکسین کیږي؟
د اروپا د دوا جوړولو آژانس (EMA)، د فایزرـ بیونتک واکسین تائید کړل. آلمان خپلو خلکو ته د واکسین لګولو له پاره ستر مرکزونه آماده کړي. په آلمان کي د واکسیناسیون د پروګرامونو او هلو ځلو په اړه انځورونه دلته لیدلی سئ:
په آلمان کي په لومړي پړاو کي د واکسین لګولو مجموعاً ۴۱۰ مرکزونه جوړ سوي چي د ښاریانو د واکسین لګولو دنده یې پر غاړه ده. په بل پړاو کي ډاکټران هم کولای سي، خلک واکسین کړي. په دوسلدورف کي د واکسیناسیون د یوه مرکز انځور.
انځور: Laci Parenyi/dpa/picture alliance
د واکسین د چمتو کولو دنده
د واکسین د آماده کولو دنده د آلمان د حکومت پر غاړه ده. خو د واکسین لګولو د مرکزونو جوړول ایالتي حکومتونه پر غاړه اخلي. د شورین له ښار څخه د مکلنبورګ فورپومرن ایالتي لومړۍ وزیرې، مانویلا شوزیک لیدنه وکړه. هغه په خپله د سینې له سرطان څخه رغیدلې او بیرته خپلي وظیفې ته ورګرځیدلې ده.
انځور: Bernd Wüstneck/dpa/picture alliance
له سیارو واحدونو څخه کاراخیستل
په لومړي پړاو کي به چي د دسمبر پر ۲۷ مه پیلیږي، سیار واحدونه به د زړو کسانو پالنځایونو ته ولاړ سي او د هغه ځای اوسیدونکي او پرسونل به واکسین کړي.
انځور: Daniel Karmann/dpa/picture alliance
له سترو موجودو تاسیساتو څخه استفاده
د آلمان په ډیرو لویو او کوچنیو ښارونو کي ورزشي صالونونه، ستودیمونه او یا هم د نندارو مرکزونه په یو څه تغییر سره، د واکسیناسیون په مرکزونو اوښتي دي. په دغه انځور کي د فرانکفورت د واکسیناسیون یو مرکز لیدل کیږي.
انځور: Boris Roessler/dpa/picture alliance
د بیلابیلو بنسټونو همکاري
په دا وروستیو اونیو کي بیلابیلو بنسټونو لکه سره صلیب، نظامي واحدونو او همدارنګه د تخنیکي مرستو مرکزونو د واکسیناسیون د مرکزونو په جوړولو کي ونډه درلوده.
انځور: Sina Schuldt/dpa/picture alliance
د لومړیتوبونو ټاکل
د رابرت کوخ په انستیتوت کي د استیکو په نامه د واکسین لګولو دایمي کمیسیون، آلماني اتباع د عمر، د ناروغۍ حالت او د هغه خطر پر اساس چی د کرونا له امله ورته پیښ وي، پر شپږو کتګوریو ویشلي دي چی په ترتیب سره به د لومړیتوبونو پر اساس واکسین سي.
انځور: Hannibal Hanschke/dpa/picture alliance
د واکسین د تطبیقیدو بهیر
آلماني اتباع د لیک له لاري پر ټاکلي وخت واکسیناسیون ته راغوښتل کیږي. د دغې لوحې پر اساس چي د مونشن د واکسیناسیون په مرکز کې ځړیږي، هر څوک چي واکسین کیږي، څلور پړاوونه تیروي. د نوم ثبتول، د واکسین له پاره د انتظار وخت، واکسیناسیون او تر واکسین وروسته په مرکز کي د ډاکټرانو ترڅارنې لاندي پاته کیدل.
انځور: Tobias Hase/dpa/picture alliance
په بیلابیلو ژبو معلومات ورکول
واکسین سوي کسان په دغه صالون کي تر یو وخت پورې تر صحي مراقبت لاندي وي او که د واکسین په وړاندي عکس العمل ونه ښیې بیا نو رخصتیږي. د کولن په ښار کي دغه ځړول سوې لوحه په آلماني، انګلیسي او ترکي ژبو لیکل سوې.
انځور: Jens Krick/dpa/picture alliance
د پرسونل آماده کول
ټول هغه پرسونل چي د جرمني د واکسیناسیون په مرکزونو کي کار کوي، روزنه ورکړل شوې او په دې ورځو کي د تمرین په حال کي دي. په دغه انځور کي د راینلند فالڅ د ایالت د تریر په ښار کي د واکسیناسیون د مرکز د پرسونل تمرینونه لیدل کیږي.
انځور: Harald Tittel/dpa/picture alliance
د خلکو پوښتنې ځوابول
ډاکټران او آن متقاعد ډاکټران هم د واکسیناسیون په مرکزونو کي حاضر دي او د خلکو پوښتنو ته به جواب ورکړي. په دې برخه کي هم لازمې زده کړي او تمرینونه ترسره کیږي. په انځور کي کیڼي خواته ډاکټر کلاوس واینر ناست دی چي د بمبیرګ د ښار د واکسیناسیون په مرکز کي د خلکو پوښتنې جوابوي.
انځور: Nicolas Armer/dpa/picture alliance
د واکسین دوې مرحلې
د آلمان د روغتیا وزارت د اعلان پر اساس، د کرونا د واکسین د ۱۳۶ میلیونه او ۳۰۰ زرو دوزونو په آماده کولو سره به، د دغه هیواد شاوخوا ۸۳ میلیونو اتباعو څخه ۶۸ میلیونه او ۲۰۰ زره کسان په دوو مرحلو کی په راتلونکي میلادي کال کي واکسین سي. دلته په هامبورګ کي د واکسیناسیون یو مرکز لیدل کیږي.
