په اروپا کي له کرونا په تر ټولو اغېزمن سوي هيواد ايټاليا کي نژدې ټولي سيمي قرانطين دي. دلته دوکانونه، موزيمونه او طبيعي ټول ځايونه بند او د سېلانيانو محبوبي سيمي له سېلانيانو خالي سوي دي. د روم ښار دغه مشهور د پېټر چوک هم بند او خالي دی.

د ايټاليې په شمال کي واقع ميلان ښار په کوڅو او بازارونو کي صرف د مرغيو سيلونه تر سترګو کيږي. د دغه ښار مشهوره کليسا خالي ولاړه ده. د دغه ښار خلک هم بېله کار، ډاکټر يا د غذايي او نورو حتمي توکو رانيولو له پاره نور له دباندي وتلو منع دي.

هسپانيه له ايټاليې وروسته د اروپا دويم له کرونا زيات اغېزمن سوی هيواد دی. د بېلګي په توګه په مادريد کي د پلاڅا مايور دغه بوخته سيمه خالي ده. حال دا چي هر کال په مليونونو سېلانيان دغه سيمي ته راځي چيري چي تر ۳۰۰۰ زيات ريستورانتونه، بارونه او چاپخانې سته.

د اتريش وګړي هم نور د خپلي خوښي سره سم له خپلو کورونو بيرون نه سي راوتلای. د کرونا له کبله د مارچ مياشتي له ۱۸مې نېټي راهيسي ښوونځي، کالجونه او ريستورانتونه تړل سوي دي. د پلازمېني ويانا د ښار په دغه سمبول سانټ سټيفن کاتډرل کي بېله د عبادت کوونکو عبادتي مراسم ترسره کيږي.

د پلازمېنې پراګ سمبول د کارل پل د صحرا په شان خاموش دی. په چيک جمهوريت کي هم اضطراري حالت اعلان سوی او پکښي پرته د څو استنثناؤ پر ګرځېدو بنديز لګول سوی دی. د هوايي شرکتونو سربیره، د اوږد واټن بس او د اورګاډي خدمات هم بند سوي دي.

د فرانسې ولسمشر ايمانويل ماکرون ويلي دي چي هيواد يې د کرونا پر ضد مبارزه کوي. د کورنيو چارو وزير پر ټول ولس په کور کي د پاته کېدو ږغ کړی دی. د آيفل برج او د لوور موزيم چي پاريس په مشهور دی، خالي دي.

د کرونا د ويري له کبله د آلمان له پلازمېني برلين څخه نژدې ټول سېلانيان بېرته خپلو کورونو ته ستانه سوي دي. دغه ښار د ګرځبنديز له اعلان څخه مخکي لا خالي سوی. د تياترونو او موزيمونو تر څنګ د پارلمان ودانۍ هم د سېلانيانو له پاره تړل سوې ده.

د برلين په زړه کي د براندنبورګ دروازه د شرقي او غربي برلين د ويش او بيا يووالي سمبول ګڼل کيږي او ورباندي عموما د سېلانيانو خورا ګڼه ګوڼه وي. د کرونا له کبله د دغې دروازې داسي انځور اخيستل ممکن سوي چي پکښي د سېلانيانو ګڼه ګوڼه نسته او دغه دروازه په خوب بيده ښکاريږي.

په فرانسه کې تر شپږ نیمې مياشتې ځنډ وروسته رستورانټونه او کافي شاپونه د خلکو پر مخ خلاص شوي دي.

په فرانسه کې تړل شوي موزیمونه، رستورانټونه، کافیانې او ځينې نور ځایونه بیرته د مشتریانو پر مخ خلاص شول.

اتریش هم د تیرې چهارشنبې ورځې د می له ۱۹ مې له آلمان څخه ورتلونکو مساپرو پر مخ له قرنطين پرته د سفر امکانات برابر کړل. خو د کرونا واکسین او د منفي تیست تصدیق اوس هم مهم دی.

پراګ هم د اکثرو اروپايي هیوادونو پر مخ خپلې دروازې پرانیستلې. هغه اروپايي هیوادونه چې په ۱۴ ورځو کې په هر ۱۰۰ زره کسانو کې د کرونا له ۵۰۰ کمې مثبتې پيښې ولري کولای شي پراګ ته سفر وکړي.

د بالئاري خپلواکې ټاپو ولسمشرې فرانسیا ارمينګول ويلي دي چې روان دوبي کې يوازې په هغه صورت کې د خلکو پر مخ مېلې او سيل ځایونه خلاص وي چې د کرونا واکسیناسیون په لوړه کچه تطبیق شوی وي. ممکن دغه وضعیت سږکال دوبي کې رامنځ ته نه شي.

واټیکان د می مياشتې پر ۳مه نېټه خپل موزیم د سیلانیانو پر مخ بيرته خلاص کړ. د موزیم مشرې باربارا جتتا وويل چې د لومړۍ ورځي له پاره شاوخوا ۱۰۰۰ سیلانیانو ځانونه راجستر کړي ول. واټیکان د ايټالیا د روم ښار په يوه برخه کې پروت د نړۍ تر ټولو کوچنی هیواد دی.

په آلمان کې د کرونا مثبتې پيښې کمې شوي او له دې سره ټولنيز محدودیتونه هم مخ پر کميدو دي. د بيلګې په توګه مشتریان اوس کولای شي د برلین ښار د کافيانو مخې ته کښينې غذا او قهوه وخوري. په نورو ښارونو کې هم د کرونا د مثبتو پيښو په کمیدو سره محدوديتونه کمیږي.

په آلمان کې د کرونا مثبتې پيښې کمې شوي او له دې سره ټولنيز محدودیتونه هم مخ پر کميدو دي. د بيلګې په توګه مشتریان اوس کولای شي د برلین ښار د کافيانو مخې ته کښينې غذا او قهوه وخوري. په نورو ښارونو کې هم د کرونا د مثبتو پيښو په کمیدو سره محدوديتونه کمیږي.

امریکا متحده ایالاتو د کرونا وبا له کبله سفري محدوديتونه سخت کړي، خو اوس يې آلمان او نورو اروپايي هیوادونو ته د سفر اضافي محدوديتونه اعلان کړي دي. دغه هیوادونه د امريکا حکومت د کرونا ویروس له اړخه د خطر سیمې ګڼي.

اسرائيل پلان لري چې د می مياشتې په پای کې هغو سيلانیانو ته چې د کرونا واکسين يې کړی وي، د ورتلو اجازه ورکړي.

یونان د می مياشتې پر ۱۴مي وپتېيله چې د اروپايي اتحاديې غړو هيوادونو او د بریتانيا او سربیا په څير ځينو نورو هیوادونو پر مخ خپل سرحدونه خلاص کړي. یونان دغه اقدام د خپل کورني توریزم صنعت د خوندي ساتلو په موخه وکړ.

کرواسيا آن د اپریل میاشتې له لومړۍ څخه سفري محدودیتونه لري کړل. خو شرط يې دا دی چې مساپر باید د کرونا د واکسین تصدیق ولري.

مالتا هیواد غواړي چې د جون میاشتې له پيل څخه خپل سرحدونه په پراخه توګه د سیلانيانو پر مخ پرانیزي.

د کرونا وبا پر وخت د کروز سترې سیاحتي کښتۍ هم ودریدې. تر څنډ وروسته په لومړي ځل د دسامبر پر ۵ نېټه د آيده کروز کښتۍ د قناري ټاپو پر لور د یوې اوونۍ سفر پلان جوړ کړ. په دغې کښتۍ کې ۳۳۰۰ کسان ځایږي خو هغه وخت په رپوټونو کې ويل شوي ول چې نیمايي مساپر پکې ول.

د استرالیا هوايي شرکت، کانتاس ويلي دي چې غواړي په خپلو پروازونو کې د واکسين کول اجباري کړي. دغه شرکت ويلي: «موږ به د نړیوالو مساپر له پاره بورډ ته تر تلو مخکې د واکسين تصدیق لازم وګرځوو.»

هندوستان د وروستيو څو اوونيو په جریان کې د کرونا له تر ټولو سخت بحران سره لاس او ګریوان وو. تازه په دغه هیواد کې د کرونا پيښې يو څه کمې شوي دي. د رپوټونو له مخې په هند کې د کرونا له کبله د مړو شمیر له ۳۰۰ زرو څخه اوښتی دی. په انځور کې د هندوستان تر ټولو مشهور ځای تاج محل.