دا چې نفوس مخ پر ډیریدو او زراعتي ځمکې له تهدید سره مخ دي. د تیرو ۴۰ کلونو په ترڅ کې د نړۍ نږدې دریمه برخه کرهڼیزې ځمکې له منځه تللي او له دې امله په نړیواله کچه د خوراکي موادو پر تقاضا فشار ډیریدونکی دی. په دې ترڅ کې د غوښې د تولید له امله هم پر چاپیریال فشار ډیر شوی. خو ځینې کسان فکر کوي چې په ټوکیو کې له هګۍ سره د ملخانو خوړل، د حل یوه ښه لار ده.

انتوموفایگی په اصطلاح کې د انسانانو لخوا د خوراک په موخه د حشراتو خوړولو ته وايي. انسانان د ډیرې پخوا زمانې او ان نن ورځ حشرات د خوراک په توګه خوري. د نړۍ په ځینو فرهنګونو کې اوس هم حشرات د خوراک برخه دي. په انځور کې ښکاري چې د جمهوري کانګو هیواد په یوه رستورانت کې، یو کس کباب شوي یو ډول چینجي د زیتونو له غوړیو سره خوري. دغه خوراک ارزانه خو ډیر پروتین لري.

په شمالي امریکا او ان په اروپا کې ځینې داسې ځایونه شته چې هلته د حشراتو خوراک ډیر کم دی. خو سربیره پر دې د چاپیریال ساتونکو د ډیر تشویق له امله، ښايي حشرات د خوراکي موادو د یوې سرچیني په توګه ډیر وهڅول شي او دا د پراخیدو په حال کې هم دي.

پوښتنه دا ده چې د حشراتو تولید ولې دوامداره دی؟ د مالدارۍ د سکتور په پرتله، د حشراتو ساتنه لږ ځمکې او لږ اوبو ته اړتیا لري. بل لوري ته بیا له دې سکتور څخه تولیدیدونکی ګلخانه ګاز هم د نورو په نسبت کم دی. حشرات ډیر لږ خوراک ته اړتیا لري، او په خپله حشرات هم د کبانو او نورو څارویو له پاره د دوامداره خوراک په توګه کاریدلی شي. د بنکوک په یوه رستورانت کې وزر لرونکي میږیان له کبانو سره یو ځای خوړل کیږي.

په اندونیزیا کې نوی جوړ شوی یو شرکت غواړي چې حشرات د پالم غوړیو د یوې بديلې منبع په توګه وکاروي. په اندونیزیا او ګڼ شمیر جنوب شرقي آسیایي هیوادونو کې د پالم د ونې پر کرلو نیوکې شوي دي. په انځور کې د یاد شرکت جوړونکي ښکاري چې په اصطلاح له حشراتو غوړي باسي او ټینګار کوي چې حشرات د خوراک ښه سرچینه ده او ګڼ شمیر معدني مواد، پروتینونه او شحمي اسیدونه لري.

اټکل کیږي چې تر ۲۰۵۰ میلادي کال پورې به د غوښې له پاره تقاضا په تقاضا کي ۷۵ سلنه زياتوالی راشي. د دې مقدار غوښې د چمتو کولو له پاره کرهڼیزې ځمکې او د څارویو خوراک هم د پروتینو ښو سرچینو ته اړتیا لري او ممکن دغه تقاضا هم ډیره شي. په دې برخه کې د حشراتو د خوراک پلويان بیا حشراتو ته ګوته نیسي.

دا چې په راتلونکې کې به حشرات د خوراک ستره برخه وګرځي خو په دې سکتور کې لا ډیرې پراختیا ته اړتیا شته. په برلین کې د چاپیریال په یوه میله کې له مچیو جوړ شوی کیک خوړل کیږي. خو دا چې په نړیواله کچه د شاتو د مچیو نفوس هم تر فشار لاندې دی، په دې هکله د داسې حشراتو خوراک به ښه حل لار وي چې عملي بڼه ولري او نفوس یې له ګواښ سره مخ نشي.

حشرات د انسانانو او نورو ژوندیو موجوداتو د ژوند انډول په ساتلو کې ډير اهميت لري. د بيلګې په توګه هغوي په بوټو کې د ګردې په شيندلو، د افتونو په کنترول او د ځمکي د خړوبتيا له پاره د اوبو په پاکولو کې مرسته کوي.

د حشراتو کموالې بیلا بيل لاملونه لري. په حشراتو او په ځانګړې توګه د مچیو او پتنګانو د مړيني اصلي علت په زراعت کې له کيمیاوي سري څخه ګټه اخيستنه ده. د اقليم بدلون او د ښاروانو پراختیا د حشراتو د له منځه تلو نور عوامل ګڼل کيږي.

حشرې د خپل ژوند د بقا له پاره پوره غذاي توکو ته اړتيا لري. د ګلانو او ميوو د کرلو کمښت له کبله مچۍ او نور ګرد شيندونکې حشرې په طبعي سیمو کې د خپلو خوړو له کمښت سره مخامخ دي. انسانان کولی شي دغه حالت ته يو څه بدلون ورکړو: لکه په بالکن يا د کور په انګړ کي د ګلانو او بوټو په کرلو سره.

د خوراکي توکو په رانيولو کې له زياتې پاملرني سره کولې شو له حشراتو سره مرسته وکړو. داسې توکې باید راونیسو چې په تولید کې یې له کیمیاوي موادو کار نه وي اخیستل شوی.

د خپل کور په بڼ کې د ګلانو او نورو بوټو ودې له پاره کيمیاوي سره مه کاروئ. د هغې پر ځاي بيلا بيل ګلان او ،ښه بوی لرونکي بوټې وروزئ چې حشرات ځانته جذبوي.

د خپلې باخچې په یوې ځنډه کې داسې بوټي وکرئ چې د حشراتو د ژغورنې لامل شي.

د حشرو له پاره د يوې ځالې جوړول ورځ تر بلې سختيږي. نو که څوک په خپل باغچه کې د هغوی له پاره یوه ځاله جوړه کړي له دغو کوچنیو ژوندیو موجوداتو سره به یې ډیره لویه مرسته کړې وي.