د آلمان مرکزي بانک ويلي دي چې د کرونا پانديمي پرمهال د دغه هيواد د وگړو نغدي شتمني د ۳۹۳ ميليارده يورو په زياتېدو سره ۷۱۰۰ ميليارده يورو ته رسېدلې ده.
د آلمان مرکزي بانک د رپوټ له مخې، د تيرکال په پرتله د دغه هيواد د وگړو د شتمنۍ ۵،۹ سلنه ډېرښت د بيکارۍ له ویرې سپما او د کرونا له کبله لګيدلې محدوديتونو بللي دي.
د آلمان د مرکزي بانک په رپوټ کې راغلي دي چې په ۲۰۲۰م کال کې هغه کسان چې سل یورو يې درلودې له ۱۶ تر ۱۷ يورو پوري يې سپمولي دي چې دغه سپما د دې هیواد په تاريخ کې بې سارې وه.
تر اوسه ډيره سپما په ۱۹۹۱ او ۱۹۹۲ کلونو کې شوې وه چې ۱۲،۹ سلنه وه. په ۲۰۱۹م کال کې سپما ۱۰،۹ سلنه وه.
تر ۱۰۰ ميلیارده يورو زياته سپما
که څه هم د اسعارو په بازارونو کې د کرونا له کبله خپره شوې ویره ډيره ژر شاته پريښوده شوه، خو په دغو بازارونو کي راکړي ورکړي د آلمانانو په شتمنیو کي کم اغيز لرلی دی.
د آلمان مرکزي بانک وايې چې دلته خلکو په ۲۰۱۹م کال کې ۱۰۰ ميليارده يورو سپما کړې ده. د دغه بانک د رپوټ له مخې دا پيسې په بانکونو کې د دوی په خپلو حسابونو کې ساتل شوي او له هغې څخه د پانګې اچونې له پاره ګټه نه ده اخيستل شوې.
د مرکزي بانک د اقتصاد کارپوهان تمه لري چې د کرونا وبا له کبله په رامنځته شوې حالت کې له بدلون سره به د دغو پيسو زیاته برخه د ۲۰۲۱م کال په اوږدو کې د تولیداتو، سياحت او فرهنګي فعالعيتونو کې ولګيږې.
تر ټولو زياتي پيسې لرونکي المانيان وپېژنئ
په آلماني ملياردرانو کي داسی کسان سته چي په خواريو يې زياته پانګه راټوله کړې ده. ځیني پکښي داسي هم سته چي ورته شتمنۍ په وراثت کي پاته سوي دي. Bilanz مجلې د ۱۰ مهمو آلماني ملياردرانو ليست جوړ کړی چي دلته يې کتلای سئ:
انځور: Reuters/K. Pfaffenbach۱۰ مقام : هاينڅ هېرمان تيلس کورنۍ ـ ۸،۶ مليارد يورو
هاينڅ هېرمان تيلس د يو مقروض کس په توګه تجارت پېل کړ. هغه اوس د اورګاډو له پاره د بنسټيزو جوړښتونو جوړونکي شرکت پانګه وال او د نظارتي مشرتابه د هئيت رئيس دی. د نوموړي د کورنۍ شتمنۍ ۸،۶ مليارد يورو اټکل کيږي.
۹ مقام : هسو پلاتنر ـ ۹ مليارد يورو
د تجارتي کمپيوتري پروګرامونو د مشهوري کمپنۍ SAP مؤسس او پانګه لرونکی هاسو پلاتنر په ټوله نړۍ کي مشهور دی. د هغه شرکت د نړۍ زياتو لويو شرکتونو ته پروګرامونه جوړوي. دغه کس چي د هنر سره زياته مينه لري او هنري آثار ټولوي، شتنمنۍ يې ۹ مليارد يورو اټکل کيږي.
۸ مقام : راينهولد ويورت او کورنۍ ـ ۱۲،۲ مليارد يورو
راينهولد ويورت د داسي شرکت څښتن دی چي د ماشين جوړونې او لاسي کارونو له پاره الات جوړوي. د هغه د کورنۍ شرکت په ټوله نړۍ کي د خپلو مصنوعاتو له پاره مشهور دی. د هغه شتمنۍ ۱۲،۲ مليارد يورو اټکل کيږي.
۷ مقام : البرېخت کورنۍ ـ ۱۷ مليارد يورو
تيو البرېخت له خپل ورور کارل البرېخت سره د دويمي نړیوالي جګړې وروسته د خپل پلار کوچنۍ مغازه پراخه کړه. هغوی د دغې مغازې زياتي څانګي را وايستلې. د الډي په نوم دغه شرکت په ۱۹۶۱ پر سويلي الډي او پر جنوبي الډي وويشل سو. تيو البرېخت په ۲۰۱۰ کال کې مړ سو او کورنۍ ته يې ۱۷ مليارد يورو پاته سوې.
۶ مقام : سوزانه کلاتن ـ ۱۷،۵ مليارد يورو
سوزانه کلاتن د شتېفان کواندت خور ده. آغلې کلاتن المان کې د تر ټولو زياته پانګه لرونکې مېرمنه بلل کيږي. دغه مېرمنه د BMW موټر جوړونکي شرکت پانګه لرونکې ده. دغه مېرمنه زيات وخت د يو مجرم له خوا بلېک مېل يا تر فشار لاندي راوستل سوه او له هغې څخه يې زياتي پيسې واخيستلې. هغه ګواښ کاوه چي شخصي ويډيو به يې خپره کړي که پيسې نه ورکړي. دغه ويډيو خپره سوه او مجرم هم ونيول سو.
۵ مقام : شتېفان کواندت ـ ۱۸ مليارد يورو
شتېفان کواندت په مسلکي توګه انجينير دی. هغه د الماني موټر جوړونکي شرکت BMW د نظارتي مشرتابه د هئيت دويم کس دی. هغه ته زښتي زياتي پيسې په وراثت کي پاته سوي. نوموړي دغه پيسې د نوي ټيکنالوژۍ په شرکتونو کي سرمايه ګذاري کړي او پکښي ډېر بريالی دی. د هغه شتمنۍ ۱۸ مليارد يورو اټکل کيږي.
۴ مقام : د کارل البرېخت وارثان ـ ۲۵ مليارد يورو
الډي هغه المانۍ مغازه ده چي د «کم قيمت خو لوړ کفايت» شعار خپله بريا بولي. د دغې مغازې له دوو مالکانو څخه يو کارل البرېخت ؤ چي په ۲۰۱۴ کال د ۹۴ کالو په عمر ومړ. د هغه وارثانو ته په وراثت کي تقريبا ۲۵ مليارده يورو پاته سوې.
۳ مقام : دیتر شوارڅ ـ ۲۵ مليارد يورو
دیتر شوارڅ د مشهوري المانۍ مغازو ليډل او کاوفلانډ له لاري په ملياردونو يورو ګټلي دي. نوموړی د ليدل مغازې چي اوس په ۲۸ هيوادونو کي تر ۱۰ زرو زياتي څانګي لري، مؤسس هم دی. د شوارڅ په هکله ويل کيږي چي ډېر خاکسار او سپما کوونکی انسان دی. د هغه د شتمنیو په هکله اټکل کيږي چي ۲۵ ملياردو يورو ته به رسيږي.
۲ مقام : ماريه اليزابېت او جيورج شېفلر ـ ۲۶ مليارد يورو
د ماريا اليزابېت شېفلر په هکله ويل کيږي چي هغه غرونه ښورولای سي. دا په دې وجه چي هغې د خپل زوی سره يو کوچنی شرکت درلود چي اوس په نړيواله توګه د موټرو د پرزو جوړونکو شرکتونو څخه يو ستر شرکت دی. دغه مېرمنه ۷۶ کلنه ده او بيا هم زيات کار کوي. د هغې د شتمنيو په هکله ويل کيږي چي ۲۶ مليارد يورو ته رسيږي.
۱ مقام : ؤلفګانګ رايمن او د هغه کورنۍ ـ ۳۰ مليارد يورو
ؤلفګانګ رايمن او د هغه کورنۍ د يو شمېر مشهورو ترېد مارک لرونکي دي او په زياتو نورو کي ونډه وال دي. د وېلا، ياکوبس، سېنسيو او تاسيمو شرکتونه د دې کورنۍ ملکيت دي. د دې تر څنګ هغوی په کوټي، ګوچي، هوګو باس او يو شمېر نورو شرکتونو او ترېد مارکونو کي ونډه لري. د رايمن شتمنۍ ۳۰ مليارد يورو اټکل کيږي.
