«په افغانستان کي ټوله ښځي د تعقیب له خطر سره مخامخي دي»
۱۴۰۱ بهمن ۷, جمعه
د اروپايي اتحادیې د پناه غوښتني آژانس د اټکلونو پر اساس په افغانستان کي ټوله ښځي او نجوني د طالبانو له خوا د تعقیب له خطر سره مخامخ دي.
اعلان
په مالټا هیواد کي مستقر دغه آژانس ویلي دي چي په همدې دلیل د دغه هیواد هره ښځه او نجلۍ اساسأ مستحقه ده چي د مهاجري په توګه یې د پناه غوښتنه ومنل سي.
د نوموړي آژانس اټکلونه په افغانستان کي پر وروستیو پرمختګونو باندي اتکا لري، چيري چي ښځو ته د کار او تعلیم امکانات ډیر سخت سوي او یا کاملاً پر بند سوي او نه هم په آزادانه توګه ګرځيدای او څه ويلای سي.
دغه رپوټ د اروپايي اتحادیې د پناه غوښتني آژانس او دغي ټولني له غړيو هیوادونو سره په ګډه جوړ سوی دی. لکه څنګه چي د آژانس یوه ویاند پرون پنجشنبه د یوې پوښتني په جواب کي وویل، د اروپايي ټولني له غړيو هیوادونو څخه غواړي چي د هغوی د پناه غوښتني د ارزیابۍ پر وخت دغه رپوټ په نظر کي ونیسي.
خو پردې سربیره په اتوماتیک ډول او یا کوم داسي مکلفیت موجود نه دی چي په اروپا کي دي د افغانستان څخه د ټولو ښځو د پناه غوښتنه ومنل سي. ویل کيږي، چي هر هیواد کولای سي انفرادي او د هر یوه پر قضیه باندي جلا تصمیم ونیسي.
کوم هيوادونه تر ټولو لږ ښځي لري؟
د م.م. د وروستي راپور په حواله په نړۍ کي د نارينه وو په پرتله د ښځو شمېر مخ پر کمېدو دی. په دغه راپور کي د افغانستان په گډون نور هغه هيوادونه پېژندلای سئ چي د سلو مېرمنو په تناسب تر سلو زيات نارينه پکښي ژوند کوي: