په آلمان کې د هغو مهاجرو د اخراج په تړاو بحثونه تاوده دي چې د افغانستان او سوريې سره تړاو لري او ورڅخه په آلمان کې د خطر ګواښ موجود وي. د سياسي چارو د کارپوه هانس فورلينډر په وينا هغو هیوادونو ته د مهاجرو اخراج چې ورسره ډیپلوماتیکې اړیکې نه وي يو ستونزمن کار دی. دغه کارپوه چې د مهاجرت د چارو د مشورتي شورا رئیس هم دی وايي چې د افغانستان او سوریې په شان هیوادونو ته د خلکو د اخراج په اړه لا هم زيات مسايل شته چې ورته بايد مخکې حل پيدا شي.
د آلمان د ډریسډن پوهنتون ياد څیړونکی په دې باور دی چې هغو هیوادونو ته د مجرمینو بېرته استول چې د آلمان سره ډپلوماتيکي اړيکې نشته، يوه ډېره مغلقه موضوع ده. نوموړي د "راینیشه پوست" ورځپاڼې ته زياته کړې:"افغانستان او سوریې ته د خلکو د اخراج په اړه لا هم ډېري پوښتنې نه دي جواب شوي."
ازبيکستان ته د افغانانو اخراج
فورلینډر دې ته هم اشاره کړې ده چې ځینو نورو هیوادونو د افغانستان د اتباعو د اخراج لپاره د دغه هيواد ګاونډی ازبيکستان کارولی دی. د دغه کارپوه په وينا: "خو دا د نړیوالو حقوقو له اصولو سره په سمون کې عمل نه دی چې خلک ازبيکستان ته اخراج کړل شي او هيله وشي چې هلته په ازبيکستان کې پاته شي يا افغانستان ته ولاړ شي. د آلمان د کورنیو چارو وزارت دمګړی د دغو موضوعاتو په هکله څېړنه کوي."
د آلمان حکومت وايي د مجرمو افغانانو د اخراج لارې لټويانځور: Michael Kappeler/dpa/picture alliance د سياسي چارو دغه کارپوه غوښتنه کړې ده چې د "مصؤن هیوادونو" په اړه د تصمیم نیولو پروسه کې باید روڼتیا زیاته شي. هغه ويلي: "دا باید روښانه وي چې په حقيقي توګه سره امنیتي ستونزې څنګه ارزول کيږي." هغه شورا چې فورلينډر يې مشري پر غاړه لري، وړاندیز کړی دی چې د يادې موضوع د ارزونې لپاره دې په فدرالي اداري محکمه کې یوه مستقله اداره جوړه کړل شي. فورلينډ زياته کړې ده: "خو تر اوسه پورې حکومت دغه وړاندیز ته هیڅ جواب نه دی ويلی."
په آلمان کې هغه وخت د مجرمو افغان مهاجرو د اخراج په تړاو بحثونه تاوده شول، کله چې يو افغان څو انسانان په چړو ووهل او يوه پوليس د چړې په دغه بريد کې تر سخت ژوبل کېدو وروسته ساه ورکړه.
د بشر د حقونو مدافعين وايي چې د بشارالاسد تر واک لاندې سوريه او د طالبانو تر واک لاندې افغانستان کې د اخراج شوو مهاجرو سره د ناوړه چلند اندېښنه لري.
افغانان له گاونډي هيوادونو ايران او پاکستان څخه هم د اخراج له گواښ سره مخامخ دي. په دې ترځ کې له يادو هيوادونو زيات شمېر افغان مهاجر اخراج کړل شوي دي. آلمان وايي چې هغه افغان مهاجر به اخراج کړي چې مجرم وي او ورڅخه گواښ پېښ وي.
آ./ا.ا./ن.ز.
پر ورته موضوع زموږ له آرشيف څخه يو انځوريز راپور:
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
انځور: picture-alliance/dpa/M. Schuttپه سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
انځور: Amer Almohibany/AFPولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
انځور: Getty Images/T. Lohnesد جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
انځور: picture-alliance/dpa/F. Gentschد اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
انځور: picture-alliance/dpa/M. Kappelerد یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
انځور: picture-alliance/dpa/M. Kappelerهغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
انځور: picture-alliance/dpa/P. Pleul