آلمان او د اروپايي ټولنې څلور نور غړي هېوادونه هڅه کوي پر اتحاديې فشار زيات کړي، څو د اروپايي ټولنې له پولې دباندې د «ستنولو مرکزونه» (return hubs) جوړ شي، چې پکې د رد شويو پناه غوښتونکو چارې وڅېړل شي.

د آلمان د کورنيو چارو وزير الېکزاندر دوبرېنټ د قبرس په ناسته کې د اروپايي ټولنې د کورنيو چارو د وزيرانو غونډې ته وويل، د يونان، اتريش، ډنمارک او هالنډ په ګډون په يوه کاري ډله کې د پنجشنبې په ورځ (د ۲۰۲۶کال د جنورۍ ۲۲مه) د دې په اړه موافقې ته رسېدلي دي.

ياد آلماني وزير وويل، اروپايي کمېسيون به له دې بهير سره ملګرتيا کوي.

دوبرېنټ زياته کړه، دغه پنځه غړي هېوادونه پلان لري يوه «نقشه» جوړه کړي، څو داسې درېيم هېوادونه وپېژني چې د ګډو «نويو ماډلونو» د جوړولو لپاره چمتو وي.

د اروپايي ټولنې غړو هېوادونو د دسمبر په مياشت کې موافقه وکړه چې په درېيمو هېوادونو کې د ستنولو مرکزونو د جوړولو لپاره يو قانوني بنسټ رامنځته کړي، څو هغه پناه غوښتونکي پکې ځای پر ځای شي چې بايد له اتحاديې ووځي، خو بېرته خپل هېوادونو يا اصلي هېوادونو ته نه شي شړل کېدای.

اروپايي پارلمان تر اوسه د دې وړانديز په اړه ګډ دريځ نه دی منلی، چې دا د دې لپاره شرط دی څو د اړوند مقرراتو پر سر خبرې اترې پيل شي.

د راپور له مخې، د کډوالۍ د قانون پخوانۍ پرېکړې، لکه د خوندي اصليت هېوادونو ټاکنه يا په درېيمو هېوادونو کې د پناه غوښتنې د کړنلارو لپاره قانوني بنسټ، په اروپايي پارلمان کې د افرطي ښي اړخو په ملاتړ منظور شوې وې.