ماکرون: فرانسه د «اسلام» پر ضد مبارزه نه کوي
۱۳۹۹ آبان ۱۵, پنجشنبه![Paris Präsident Macron](https://static.dw.com/image/52289643_800.webp)
ماکرون دغه خبري پرون چهارشنبه بريتانوۍ ورځپاڼې «فایننشل ټايمز» ته په یوه نشر سوي خط کي لیکلي دي. د اسلامي افراطیت په شک د یوه معلم تر وژل کیدو وروسته ماکرون په خپلو اظهاراتو سره په اسلامي هیوادو کي د قهره ډک احتجاجونه را وپارول.
ماکرون په خپل دغه اوږده خط کي لیکلي چي فرانسه د متعصبینو او هغو افراطینو پر ضد مبارزه کوي، چي په زور او تشدد لاس پوري کوي، خو «هیڅ وخت د یوه مذهب پر ضد نه.»
په دغه لیک سره ماکرون د هغه یوه مضمون پر ضد عکس العمل ښکاره کړ، چي د دوشنبې په ورځ د فايننشل ټایمز په ویب سایټ کي نشر سوی وو خو وروسته بیرته لیري سوی ؤ. په هغه کي پر مکرون باندي تور لګیدلی ؤ، چي غواړي مسلمانان د انتخاباتي تاکتیک په دلیل بې برخې او يا مستثنا کړي.
ماکرون اوس ټینګار کړی دی، چي په دغه مضمون کي د ده اظهارات تحریف سوي دي. په خبره یې دی به دې ته اجازه ورنه کړي، چي یو څوک فرانسوي دولت په دې «تورن کړي، چي د مسمانانو پر ضد راسیزم ته لمن وهي او حمایه کوي یې.»
ماکرون په خپل دغه خط کي لیکلي، چي د «اسلامي تجریه طلبۍ» څخه یې مطلب د فرانسې د نورو برخو منزوي کیدل دي. هغه وايي، په مشخصو ناحیو او انټرنیت کي افراطي اسلامي ګروپونه کوچنیانو ته د فرانسې د جمهورریت پر ضد کرکي ته لمن وهي او خلګو ته د قوانینو د نه اطاعت کولو دعوت ورکوي.