د آلمان د بهرنیو چارو وزیر وادیفول د شنبې (د ۲۰۲۶م کال د اګست پر ۲۲مه) سهار وختي د ځانګړي اورګاډي له لارې د کییف مرکزي رېل ‌پټلۍ تمځا ته ورسېد او د روسیې د بې ‌پیلوټه الوتکو او توغندیزو بریدونو د زیاتېدو غندنه یې وکړه. هغه مسکو د «ملکي وګړو په بې‌توپیره وژنه» او د انرژۍ د زیربناو په قصدي ویجاړولو تورن کړ.

د وادیفول دا سفر څو ورځې وروسته له هغه ترسره کېږي چې د روسیې د توغندیزو بریدونو په نتیجه کې د اوکراین په پلازمېنه کییف کې ۱۶ کسان ووژل شول، او یوه ورځ مخکې د ولسمشر ولودیمیر زیلینسکي په ټاټوبي کریفي ریه سیمه کې پر یوه سوداګریز مرکز د روسیې د جلا برید له امله لږ تر لږه ۱۵ کسان ووژل شول او ۱۳۰ نور ټپیان شول.

وادېفول وویل، روسیه هڅه کوي د اوکرایني وګړو د ژوند سرچینې له منځه یوسي او د مقاومت لپاره د هغوی اراده ماته کړي.

هغه په خپلو خبرو کې زیاته کړه چې د جولای او اګست میاشتې په تېرو څه باندې څلورو کلونو کې د اوکراین د ملکي وګړو لپاره تر ټولو خونړۍ میاشتې وې. وادېفول وویل: «روسیې هیڅکله هم پر خپل ګاونډي هیواد دومره ډیر توغندي نه دي توغولي. موږ کړاو وینو، موږ وینو چې دغه هیواد له څه ډول ستونزو سره مخ دی، او موږ به د دغه هیواد ملاتړ ته دوام ورکړو.»

هغه زیاته کړه: «موږ د اوکراین تر څنګ ولاړ یو. دغه هېواد به په دې پوځي مقابله کې بریالی شي.»

د جرمني د بهرنیو چارو وزیر له اوکراین سره د لا نورو مرستو ژمنه وکړه، په داسې حال کې چې دغه هېواد د جګړې پنځم ژمي ته چمتو کېږي. د روسیې او اوکراین ترمنځ دا جګړه په ۲۰۲۲ کال د فبرورۍ په میاشت کې د روسیې له یرغل وروسته پیل شوې. وادېفول وویل: «هیڅ هېواد د جرمني په کچه له اوکراین سره په پوځي او مالي برخه کې دومره ملاتړ نه کوي.»

نوموړي هیله څرګنده کړه چې که څه هم په وروستیو میاشتو کې ډیپلوماټیکې هڅې له ځنډ سره مخ شوې دي، روسیه به د خبرو مېز ته راوستل شي.

پر روسیې د اوکراین د بریدونو شدت

په عین وخت کې اوکراین سږ کال پر روسیې خپلو بریدونو ته شدت ورکړی او تر ډیره یې د روسیې د تېلو تاسیسات او لوژستیکي مرکزونه په نښه کړي دي. اوکراین توانیدلی چې د روسیې د جګړې اقتصاد ته د روسیې په خاوره کې دننه د بې ‌پیلوټه الوتکو د بریدونو له لارې زیان ورسوي.

خو د اوکراین له پاره د هوايي دفاعي سیستمونو، لکه پاتریوت توغندیو، کمښت اوکراین د روسیې د توغندیزو بریدونو پر وړاندې بې‌ دفاع کړی، چې له امله یې زیلینسکي له خپلو لویدیځو شریکانو څخه د لا ډېرو مرستو غوښتنه کړې ده.

له هغه وخته چې وادېفول د بهرنیو چارو د وزیر په توګه دنده پیل کړې، اوکراین ته دا د هغه څلورم سفر دی. د امنیتي دلایلو له امله، لکه څنګه چې معمول دی، دا سفر مخکې له مخکې په عامه توګه اعلان شوی نه و. په کییف کې د هغه د سفر پروګرام هم نه دی افشا شوی، خو تمه کېږي چې د اوکراین له مشرتابه سره خبرې به د هغه د سفر اصلي تمرکز وي.

اوکراین ۳۵ کاله مخکې د دوشنبې په ورځ له پخواني شوروي اتحاد څخه خپله خپلواکي اعلان کړه. د دې کلیزې په مناسبت، په ځانګړي ډول په پلازمېنه کییف کې، د لمانځنې مراسم ترسره کېږي.