په پرمختايي چارو کې د همکارۍ لپاره د آلمان وزیرې سونیا شولڅه (د سوسيال دموکرات ګوند غړې) ويلي دي چې د سوریې د اسلامي ډلې هيئت تحریر الشام (HTS) او د افغانستان د طالبانو تر منځ توپیر ويني. نوموړې وویل: "هيت تحرير الشام همکاره ښکاري. لوی توپیر له نورو سره دا دی چې دوی زموږ ملاتړ غواړي."
شولڅه د "پولیتیکو" مجلې ته وویل: "طالبان په ښکاره ډول پر ایدیالوژۍ چلېږي او د بهرني ملاتړ غوښتنه یې نه درلوده." د دغې آلمانۍ وزيرې په وينا دوی بې پروا نه دي، بلکې ګام په ګام مخته ځي. هغې وویل چې ځینې سرې کرښې هم شته، خو جزییات يې ور نه کړل.
وزیرې وویل چې د بشار الاسد رژيم له نسکورېدو وروسته د سوریې د بدلونونو په جوړولو کې د آلمان د حکومت لپاره یوه موقع شته. هغې زیاته کړه: "دا یو فرصت دی چې اوس موجود دی او موږ غواړو اغېز پرې ولرو چې دا بدلونونه پر سم لوري روان شي."
دغې آلمانۍ وزيرې د سوريايي کډوالو د بېرته ستنېدو د موضوع په اړه وویل: "هغه کسان چې زموږ په هېواد کې کار کوي او ښه ادغام شوي دي، هغوی به بېرته ونه شړل شي." هغې د سوریایي ډاکټرانو، نرسانو، او د ټرانسپورټ په برخه کې د متخصصینو یادونه وکړه.
نوموړې زیاته کړه: "هر هغه څوک چې غواړي خپل هېواد جوړ کړي، دا یو طبیعي حق دی چې هغوی بېرته ستانه شي. خو دا کار باید په سوریه کې د مناسبو شرایطو په موجوديت کې وشي." شولڅه ټینګار وکړ: "خو هېڅ ډول زور به پکښې نه وي."
د آلمان يو پلاوي په سوريه کې د هيئت تحرير الشام ډلې له استازو سره هم دغه اونۍ کتلي ول. په دې توګه نو آلمان د سوريې د دغې ډلې سره د خبرو لړۍ مخکې لا پېل کړېده.
له هغه وخت راهیسي (۲۰۲۱م کال په اګست میاشت کې) چې طالبان بيا واک ته رسېدلي، په ځانګړي توګه يې پر ښځو باندې بندیزونو ته دوام ورکړی دی. د ډسمبر میاشتې پر ۳ نېټه یې ښځې د روغتياپالنې په برخه کې هم له زده کړو منع کړي دي.
انځور: Wakil KOHSAR/AFPطالبانو د نجونو او هلکانو پر يوځايي زده کړې بندیز ولګاوه او نارينه یې نجونو ته له زده کړو ورکولو منع کړل.
طالبانو د ښځو پر سپورت بندیز وضع کړ.
نجونې تر شپږم ټولګي پورته له زده کړو منع شوې.
نجونې او ښځې په کابل پوهنتون کې له زده کړو څخه منع شوې.
طالبانو د محرم پرته له هېواده دباندې د ښځو پر سفر بندیز ولګاوه.
پوهنتونو ته د جنسيت پر بنسټ د جلا جلا ټولګيو لارښوونه وشوه.
طابانو د تلویزیون ښځينه وياندویانو ته د مخ پټولو لارښوونه وکړه.
طالبانو ورزشي کلبونو او پارکونو ته د ښځو او نجونو پر ورتګ بندیز اعلان کړ.
تر امر ثاني پورې دولتي او شخصي پوهنتونونه ته د ښځو پر تګ بندیز اعلان شو.
تر شپږم ټولګي وروسته نجونې شخصي کورسونو ته له تګ څخه هم منع شوې.
طالبانو په نړيوالو غیر دولتي موسسو کې د ښځو پر کار بندیز ولګاوه.
ښځې په بهرنيو غير دولتي موسسو کې په ښونیزو پروګرامونو کې له ونډه اخيستو څخه منع شوې.
د طالبانو د امر بالمعروف وزارت د ښځو پر سينګارتونونو بندیز اعلان کړ.
د طالبانو د روغتيا وزارت موسسو او پوهنیزو ادارو ته امر کړی دی چې ښځينه زده کوونکي دې نورې زده کړو ته نه ورپریږدي.
