د آلمان جمهور رئيس فرانک والتر شټاينمایر، د کرسمس يا عيسوي اختر په مناسبت په خپله دودیزه وينا کې په هېواد کې د تازه پېښو په اړه له خلکو څخه د متحد پاتېدو غوښتنه وکړه.
شټاينمایر، په خپله وينا کې چې متن یې د چهار شنبې په ورځ تر نشريدو دمخه د سې شنبې په ورځ خپور شوی، د آلمان په لوېدیځ کې په پراته ښار ماګده بورګ کې د کرسمس پر بازار د خونړي بريد يادونه هم وکړه.
هغه وويل: «پر دې کرسمس يو تور سيوری غوړېدلی دی.» نوموړې زياته کړه چې «موږ یې يوازې تصور کولی شو» چې د قربانيانو پر کورنيو به زړه ته د نږدې کسانو له لاسه ورکولو وروسته څه تيريږي.»
شټاينمایر، وويل: «تاسې په خپل دې درد کې يوازې نه ياست. د ټول هېواد وګړي ستاسې درد احساسوي او تاسې ته تسليت وایي.» ولسمشر تر بريد وروسته د پوليسو او طبي عملې هلي ځلي وستايلې.
د کریسمس پر بازار برید کې ۵ تنه وژل شوي او ۲۰۰ ټپیان دي
This browser does not support the video element.
پر ټولنه د بريد د اغیزو په اړه څرګندونو په ترڅ کې د آلمان ولسمشر آلمانانو ته وويل چې هغوی بايد د ويش ښکار نه شي او يووالی څرګند کړي.
هغه وويل چې «کرکه او تشدد بايد زموږ وروستي کليمات نه وي. راځئ دې ته اجازه ور نه کړو چې سره بېل شو. راځئ چې يوځای ودريږو.»
په آلمان کې لهجه «ترخه» شوې ده
ولسمشر شټاينمایر، په منځني ختیځ کې د روانو جګړو، پر اوکراين باندې د روسیې د اشغال او په آلمان کې د عمومي ټاکنو چې د ۲۰۲۵م کال په فيبرورۍ مياشت کې ترسره کیږي، يادونه وکړه.
شټاينمایر، وويل: «د سیاست، کاروبار، تر حده ډېرو دولتي قوانينو او مقرراتو او بې عدالتۍ په اړه ډېره ناخوښي موجوده ده.» د هغه په خبره یې پایله دا ده چې «په ورځني ژوند کې زموږ په هېواد کې لهجه کلکه شوې ده او ځيني وخت خو مخالفانه وي.»
اړونده موضوع: په آلمان کې د کرسمس بازار د برید وروسته غوسهناکې پوښتنې
نوموړي وويل چې هغه پر ننګونو سربیره د هېواد پر ديموکراسۍ او اساسي قانون باندې باور لري چې په ۱۹۴۹م کال کې نافذ شوی وو.
شټاينمایر، وويل: «ډېرې ننګونې شته چې موږ یې بايد مقابله وکړو. موږ په دې اړه هم باید څرګندې خبرې وکړو چې څه ناسم دي... په تېره بيا، موږ بايد په دې اړه وغږيږو چې څه ته په سملاسي توګه اړتيا ده.»
د آلمان د ۲۰۲۵م کال ټاکنې: صدراعظمۍ څوکۍ ته څوک کانديد دي؟
په آلمان کې د ۲۰۲۵م کال د فبرورۍ پر ۲۳مه د کیدونکو عمومي ټاکنو تر مخه مخکښو ګوندونو د صدراعظم د څوکۍ له پاره د خپلو کانديدانو نومونه نهايي کړي دي. دا چې کوم ګوند څوک د نوماند په توګه غوره کړی، دلته یې کتلی شئ:
انځور: Carsten Koall/dpa/picture allianceاولاف شولڅ، سوسيال ديموکرات ګوند
د سوسيال ديموکرات ګوند څخه اولاف شولڅ، چې برحاله صدراعظم دی، پر ځان یې باور نه دی کم شوی. نوموړي خپل حقوقي شرکت درلود او بيا د څو لسیزو په اوږده سياسي سفر کې د هامبورګ د حکومتي څوکیو په ګډون په فدرالی کچه د کار او د خزانې د وزير په توګه یې دندې ترسره کړي او د آلمان د صدراعظم تر ټولو مهمې څوکۍ ته رسېدلی دی. خو هغه د عامه نظر پوښتنو په حواله په خلکو کې ډېر محبوبيت نه لري.
فريډرش میرڅ، مسيحي ديموکرات ګوند
محافظه پال سياستوال فريدرش میرڅ، په تېرو پنځوسو کلونو کې د آلمان د صدراعظمۍ څوکۍ له پاره تر ټولو د ډېر عمر لرونکی کانديد دی. د آلمان د لوېديځ زاورلند سره تړاو لرونکی دا کاتوليک مذهبه او د کاروباري چارو وکيل په شخصي شرکتونو کې د دندې اوږده سابقه لري چې د شتمنيو د تنظيم په اړه د نړۍ د تر ټولو ستر شرکت بلېک روک سره یې دنده هم پکې شامله ده.
هابيک د زرغون ګوند سره تړاو لرونکی سياستوال چې د يوه عوامي شخصيت په سترګه ورته کتل کيږي. نوموړی د خپلو سهوو منل هیڅ عيب نه ګڼي. نوموړی سیاست ته تر راتلو د مخه يو ليکوال او ترجمان وو.
اليس واېډل، د آلمان له پاره بديل ګوند
په آلمان کې د ډېر ښی اړخه «آلمان له پاره بديل» يا اې اف ډي ګوند شريکې مشرې اليس واېډل، د اقتصاد په برخه کې دوکتورا لري. هغې په چين کې د دندې ترسره کولو سره سره زده کړې هم کړي د يورو او ناټو په اړه تل شکونه لري. واېډل د پاروونکو او د مهاجرو پر ضد د تندو بیانيو له پاره شهرت لري.
کرستيان ليندرنر، لیبرال ديموکرات ګوند
د آلمان د خزانې پخواني وزیر کرستيان لېندرنر، د سياسي علمونو په برخه کې لوړې زده کړې کړي، د سوداګریزو اعلاناتو د خپل کوچني شرکت بنسټ یې ايښی او د آلمان د هوايي ځواک د ذخیرې يو افسر هم دی. هغه د ۳۴ کلونو په عمر د خپل ليبرال ديموکرات ګوند مشر شو او تر اوسه یې مشري پر غاړه لري.
زارا واګن کنیخت، بي اس دبليو
واګن کنيخت، د کیڼ اړخه ګوند يوه پخوانۍ مخکښه غړې وه. هغه تل په بحثونو کې د میلمنې په توګه ګډون کوي او د پاپوليستي بيانیو هنر یې زده دی. هغه د محافظه پال ټولنیز او د کیڼ اړخه اقتصادي سیاست ترڅنګ د کډوالو مخالف دريځونو څخه هم ملاتړ کوي. د نوموړې د «اليینس زارا واګن کنيخت» په نامه ګوند په بشپړه توګه د هغې تر کنترول دی.
ژان فان آکن، کيڼ اړخه ګوند
فان آکن، په لوېديځ آلمان کې زيږېدلی او د بيولوژي په برخه کې یې لوړې زده کړې کړي دي. نوموړي له ۲۰۰۴م څخه تر ۲۰۰۶م کال پورې د ملګرو ملتونو د بيولوژيکي وسلو د څارونکي په توګه دنده ترسره کړې. هغه له ۲۰۰۹م څخه تر ۲۰۱۷م کال پورې د آلمان په بندستاګ يا پارلمان کې د کيڼ اړخه ګوند استازی وو. هغه د دې ګوند شريک مشر هم وو او په راتلونکو ټاکنو کې به د خپل ګوند له پاره مبارزه وکړي.
د شتاين مایر په حواله د آلمان د «ائتلافي حکومت له منځه» تلل «د نړۍ له منځه تللو معنا نه لري.»
نوموړي د هيواد ځوانانو ته پيغام ورکړ او ویې ويل چې «تاسې ته اړتيا ده او په ډېرو څانګو کې خو درته ډېره شديده اړتيا ليدل کيږي.»
شټاينمایر زياده کړه چې د آلمان ځوانان «د خپل ژوند لاره خپله جوړولی شي او جوړه به یې هم کړي.»
