د چهار شنبې په ورځ (د ۲۰۲۵م کال د جون ۴) د کولن ښار سترې ساحې په داسې حال کې وتړل شوې چې د دويمې نړيوالې جګړې د وخت د دريو بمونو شنډولو له پاره چمتووالی نیول کيده. دغه جګړه ۸۰ کاله پخوا ختمه شوې.

اړونده موضوع: د دوهمې نړيوالې جګړې پای ته رسیدو ۸۰ مه کلیزه: «يادونه یې اوس هم مناسبه ده»

په دغه ښار کې د بمونو د شنډولو دا عمليات د خپل ډول تر ټولو ستر عمليات ګڼل کيږي چې په ترڅ کې یې کابو ۲۰ زرو کسانو ته له اغیزمن ساحې څخه د وتلو لارښوونه شوې ده.

هوټلونه او پالنځايونه تخليه شوي

په تخليه شوې ساحه کې د ښار ټوله زړه يا پخوانې برخه، ۵۸ هوټلونه، د راين د سيند درې پلونه، د ښاروالۍ ودانۍ، د ډيوڅ سیمې د ريلګاډو تمځای، میوزيمونه، يو روغتون او دوه پالنځایونه شامل دي. 

د ښار تر ټولو مشهوره ودانۍ د کولن کلیسا د په اصطلاح خطري ساحې څخه که څه هم چې دباندې ده خو ورته څېرمه پرته ده.

د آلمان د ريلونو ملي شرکت «ډویچه بان» هم خبرداری ورکړی وو چې ډېری ریلونه پر نورو مسیرونه مزل وکړي او يا به یې حتی سفرونه لغوه کړل شي. د سړکونو ترافيک هم سخت اغیزمن شوی دی.

دغه ناچاودې وسلې چې دوه یې ۹۰ کيلوګرامه او يو یې کابو ۴۵ کيلوګرامه بمونه دي، د امريکا متحده ایالاتو جوړې وسلې دي او د دوشنبې په ورځ د کولن په ډويڅ سيمه کې موندل شوي دي.

اړونده موضوع: په فرانکفورت کې د یوه بم د خنثی کولو له پاره په زرهاو کسان له کورونو ایستل شوي

د کولن د ښار پر انترنت پاڼه باندې په خپرې شوې اعلاميه کې راغلي: «دا تخليه د دويمې نړيوالې جګړې پای ته له رسېدو راهېسې د خپل ډول تر ټولو ستر اقدامات دي. ټول اغیزمن کسان تمه لري چې د بمونو د خنثی کولو پروسه د چهارشنبې ورځې په اوږدو کې سرته ورسېدلای شي.»

په کولن ښار کې د بمونو شنډول کومه نوې خبره نه ده ځکه چې دا ښار د دويمې نړيوالې جګړې پر وخت د اتحادي ځواکونو د هوايي بمبارۍ ستر هدف وو.

پر نورو سربیره د بريتانيا شاهي هوايي ځواک د ۱۹۴۲م کال د می پر ۳۱ نیټه د شپې له خوا کولن ښار د ستر هوايي بريد چې د «زرو بمونو د بريد» اصطلاح ورته کاريدله، هدف ګرځولی وو او ۱۴۵۵ ټنه بمونو پرې غورځول شوي ول. په دې بريدونو کې په زرونه ودانۍ زيانمنې او يا هم ویجاړې شوې وې.