د جرمني د کورنیو چارو وزارت د هغو معلوماتو پر اساس چي ددغه هیواد په پارلمان کي د کیڼ اړخه ګوند د داخلي چارو د ویاندي، اولا یلپکه په غوښتنه وړاندي سوي دي، افغان رد سوي مهاجر د جرمني د مهاجرو چارو ادارې «بامف» له خوا د منفي پریکړو په وړاندي، په خپلو شکایتونو کي زیاتره وخت بریالي کیږي.
دغه معلومات ښيي چي قاضیانو په مجموعي ډول په هغو ۲۱۱۷۰ شکایتونو کي چي د افغان مهاجرو له خوا سوي دي، په ۸۳۹۰ مواردو کي یې د آلمان د مهاجرو چارو ادارې پر منفي پریکړو له سره غور کړی دی.
که هغه ۷۲۷۰ دوسیې چي د قاضيانو له ارزوني پرته په نورو شکلونو سره پريکړې ورباندي سوي دي، په نظر کي ونیول سي، په دې معنی دي چي د افغان رد سوو مهاجرو ۶۰ سلنه شکایتونو مثبته نتیجه ورکړې ده.
خو په اکثرو دغو پیښو کي یعني ۶۴۳۵ قضیو کي بیا دغو مهاجرو اوږدمهاله حفاظت نه دی ترلاسه کړی او یوازي یې د اخراج ممنوعیت په لاس راوړی دی. دا په دې معنی چي په آلمان کي یې اوږدمهاله اقامت نه دی ترلاسه کړی. د رد سوو افغان مهاجرو ۵۵۰۰ شکایتونه بې اساس بلل سوي او رد سوي دي.
دغو ارقامو ته په کتو سره، میرمن یلپکه د افغان مهاجرو په اړه د آلمان د مهاجرو چارو د ادارې پر پریکړو انتقاد کړی او ویلي یې دي «د ناسمو پریکړو دغه ډول رقم له حده زیاته رسوايي ده، دا ځکه چي خبره د پناه غوښتونکو پر مرګ او ژوند باندي ده.«
د کیڼ اړخه ګوند دغه سیاستواله زیاتوي: «دغه رد سوي پناه غوښتونکي داسي یوه هیواد ته د اخراج له ګواښ سره مخامخ دي چي په هغه کي نه یوازي دا چي هره ورځ مرګوني بریدونه ترسره کیږي، بلکي علاوه پر دې هلته روغتیايي سیستم هم په ډیر بد حالت کي دی او د کووید -۱۹ ناروغانو ته د رسیدګۍ وړتیا نه لري.«
د هرات د کډوالو او بیرته راستنیدونکو چارو ادارې د معلوماتو پر اساس په تیرو دریو میاشتو کې له ایران څخه تر ۲۲ زرو ډیر مهاجر اخراج شوي دي. په اخراج شویو کې کوچني ماشومان او بی سرپرسته میرمنې هم شاملي دي.
انځور: DW/S. Tanha
اجباري اخراج او که داوطلبانه ستنیدنه؟
په هرات کې د کډوالو او بیرته ستنیدونکو چارو ادارې مسئولین وایي چې هره ورځ شاوخوا ۵۰۰ افغان مهاجر په اجباري ډول له ایران څخه ایستل کیږي.
انځور: DW/S. Tanha
د ایران د انتظامي ځواکونو له خوا د ناسم چلند ادعا
له ایران څخه د اخراج شوو کسانو یوه لویه برخه ځوانان دي چې د ایران د انتظامي ځواکونو له ناوړه چلند څخه شکایت کوي. په هرات کې د ایران قونسلګرۍ په پرله پسې ډول په خپل هیواد کې له افغان مهاجرو سره د ناسم چلند ادعاوې رد کړي دي.
انځور: DW/S. Tanha
په افغانستان کې جګړې، شخړې او بې روزګاري
په افغانستان کې نا امني، بد اقتصادي وضعیت او بې روزګاري، هغه دلایل دي چې ګاونډیو هیوادونو ته د افغانانو د مهاجرت لړۍ د دوام سبب شوې ده.
انځور: DW/S. Tanha
کرونا ویروس او په ایران کې د کار بازار کمیدل
د کرونا ویروس خپریدو په ایران کې د افغان مهاجرو او کسبګرو د کار پر بازار هم خپلې اغیزې پریښې دي. په همدې دلیل ډیر افغانان بیرته خپل هیواد ته ستانه شوي دي.
انځور: DW/S. Tanha
ولی مهاجر اخراجیږي؟
پخپله خوښه د ستنیدو ترڅنګ په زرونو مهاجر د ایران له خوا اخراجیږي. په هرات کې د ایران قونسلګرۍ مسئولین وايي چې اخراجونه د ديپلوماتیکو قوانیونو پر اساس ترسره کیږي.
انځور: DW/S. Tanha
د ماشومانو او بې سرپرسته ښځو اخراج
د نارينه او بې سرپرسته میرمنو ترڅنګ هغه افغان ماشومان هم له ایران څخه اخراجیږي چې لا قانوني سن ته هم نه دي رسیدلي.
انځور: DW/S. Tanha
د مهاجرت ترخې خاطرې
هغه قانوني سن ته نه رسیدلي ماشومان چې له ایران څخه اخراج شوي دي وايي چې له دغه هیواد څخه د اخراج پر مهال یې ډیري سختۍ لیدلي دي.
انځور: DW/S. Tanha
له اخراج شویو ماشومانو سره د یونیسف همکاري
په هرات ولایت کې د یونسیف ادارې د ماشومانو د حفاظت پروګرام مسئولینو په خبره له دغو ماشومان سره د اسلام قلعه په سرحد کې مالي مرسته کیږي او خپلو کورنیو ته د هغوی د رسولو په برخه کې هم همکاري کوي.
انځور: DW/S. Tanha
له ایران څخه د تر ۴۰۰ زره ډيرو مهاجرو ستنیدنه
د کډوالو له پاره د ملګرو ملتونو سازمان د هغه یوه رپوټ پر بنسټ چې تیره میاشت خپور شوی وو، د روان میلادي کال له پيل راهیسې تر ۴۰۰ زرو ډير مهاجر له ایران څخه بیرته افغانستان ته ستانه شوي دي. په دوی کې تر یوه پر دریمې برخې ډیر یې اخراج شوي مهاجر دي. ډیري بیرته ستندونکي هغه کسان دي چې په ایران کې يې د پاتېدو اجازه نه درلوده.
انځور: DW/S. Tanha
تیرکال په کوم شمیر کې مهاجر له ایران څخه ستانه شوي دي؟
د مهاجرت نړیوالې ادارې(آی او ام) د معلوماتو پر اساس په ۲۰۱۹م کال کې تر۵۰۰ زرو ډير افغان مهاجر له ګاونډیو هیوادونو ایران او پاکستان څخه بیرته خپل هیواد ته ستانه شوي دي.
