د آلمان د دفاع وزیري، انه گریت کرمپ - کارنباور چي اوس امریکا متحده ایالاتو ته په سفر تللې ده، د سه شنبه په ماښام اعلان وکړ چي »له څه ناڅه شل کلن ماموریت وروسته، نن شپه ټول آلماني عسکر او عسکري له افغانستان څخه ووتل. هغوی اوس خپل ټاټوبي ته پر لار دي.«
هغې زیاته کړه: »د دغو سرتیرو په وتلو سره یو تاریخي فصل پای ته ورسید، داسي یو پرله پسي ماموریت چي د آلمان پوځ يې له ننگونو سره مخامخ کړ، هغوی ته یې جوړښت ورکړ او په هغه کي دغو ځواکونو په جگړه کي ځانونه ثابت کړل. داسي یو ماموریت چي زموږ ځواکونه یې له جسمي او رواني لحاظه زیانمن کړل او په هغه کي انسانانو خپل ژوند له لاسه ورکړ. د هغو له خپلوانو سره غم شریکي کوم، هغوی به هیڅکله له یاده ونه باسو.«
په تیرو څه ناڅه شلو کلونو کي شاوخوا ۱۵۰ زره آلماني عسکرو د افغانستان په ماموریت کي ونډه اخيستې وه او ډیری یې څو واره هلته تللي ول. ۵۹ آلماني سرتیرو په افغانستان کي خپل ژوند له لاسه ورکړ، له هغو څخه ۳۵ تنه یې په نښتو او یا هم بریدونو کي له منځه تللي. په دې ډول دغه ماموریت د آلمان له پاره د دوهمي نړيوالي جگړې له پای راهیسي تر ټولو خونړی ماموریت وو.
په افغانستان کې د المان د پوځي ماموریت لوړې ژورې
آلماني سرتیري کابو له ۲۰ کلونو راهیسې په افغانستان کې د ناټو ماموریت په چوکاټ کې حضور لري. که څه هم د آلماني ځواکونه د ماموریت نیټه د مارچ مياشتي پر ۳۱مه ختمیږي، خو په پام کې ده چې وغځول شي. انځور: Deshakalyan Chowdhury/AFP/Getty Images د ۲۰۰۱م کال په دسمبر کې د آلماني ځواکونو ماموریت تائید شو د آلمان فدرال پارلمان د ۲۰۰۱م کال په دسمبر میاشت کې له هیواده د باندې د آلماني ځواکونو ماموریت تائید کړ. د آلمان د پارلمان د پریکړې له مخې، آلماني ځواکونه د «آیساف» نړیوال ماموریت په ترڅ کې په افغانستان کې ګمارل شوی وو.
انځور: Shah Marai/AFP/Getty Images ۲۰۰۳: آیساف د ماموریت پراخیدل د ملګرو ملتونو امنیت شورا، له کابله د باندې د آیساف ماموریت د غځولو پریکړه وکړه. د آلمان فدرال پارلمان هم په کندز ولایت کې د خپل هیواد د ځواکونو ماموریت تائید کړ. آلمان په ۲۰۰۶م کال کې د افغانستان په نهو شمالي ولایتونو کې د آیساف قومانداني پر غاړه واخیسته.
انځور: picture-alliance/dpa/R. Hirschberger ۲۰۰۹: په کندز کې د تیلو پر دوو ټانکرونو بمباري د ۲۰۰۹م کال د سپتمبر پر څلورمه، د امریکا متحده ایالاتو هوایي جنګي الوتکو د یوه آلماني قوماندان ګیورګ کلاین، په دستور دوه هغه ټانکرونه بمبار کړل چې طالبانو تښتولي ول. په دغه پيښه کې د ملکیانو په کډون تر سلو زیات کسان ووژل شول.
انځور: Jawed Kargar/dpa/picture alliance ۲۰۱۱: په مزار شریف کې افغان امنیتي ځواکونو ته د مسوولیت سپارل په ۲۰۱۱م کال کې افغان امنیتي ځواکونو په مزار شريف ښار کې امنیتي مسؤلیت پر غاړه واخیست. په دغه ولایت کې د آیساف په چوکاټ کې د آلماني ځواکونو سترې پوځي اډې موقعیت درلود.
انځور: picture-alliance/dpa ۲۰۱۳: افغان امنیتي ځواکونو ته د کندوز د امنیتي مسؤلیت سپارل افغان ځواکونو ته د امنیتي مسؤلیتونو د سپارلو په لړ کې، د ۲۰۱۳م کال په اکتوبر میاشت کې د کندوز ولایت امنیتي چارې له آلماني ځواکونو څخه افغان ځواکونو ته وسپارل شوې.
انځور: AFP/Getty Images/J. Eisele ۲۰۱۴: د قاطع ملاتړ ماموریت پېل په ۲۰۱۴م کال کې په افغانستان کې د نړیوالو ځواکونو جنګي ماموریت پای ته ورسید. خو په افغانستان کې په زرونو بهرني عسکر د ناټو د «قاطع ماموریت» په چوکاټ کې په افغانستان کې پاتې شول، چې دنده یې د افغان امنیتي ځواکونه روزنه ده. په لومړي سر کې آلمان تر ۸۵۰ عسکرو پورې په افغانستان کې د دغه ماموریت په چوکاټ کې د خپلو ځواکونو ونډه تائید کړه.
انځور: Allison Dinner/ZUMAPRESS/imago images ۲۰۱۸: د قاطع ماموریت غځیدل د ناټو شریکانو په ۲۰۱۸م کال کې پریکړه وکړه چې د دغه هیواد د امنیتي وضعیت تر ښه کیدو پورې، د قاطع ماموریت په چوکاټ کې خپلو فعالیتونو ته ادامه ورکړي.
انځور: picture-alliance/ZumaPress ۲۰۲۰: د امریکا او طالبانو ترمنځ توافق امریکا متحده ایالات له طالبانو سره د څو میاشتو مذاکراتو وروسته د ۲۰۲۰م کال په فبرورۍ میاشت کې یو تړون لاسلیک کړ چې له مخې د ۲۰۲۱م کال تر می میاشتې پورې له افغانستانه د خپلو ځواکونو د وتلو ژمنه کړې. د دې په بدل کې طالبانو ژمنه کړې وه چې د افغانستان له خاورې د ترهګرو فعالیت ته اجازه ورنه کړي.
انځور: Hussein Sayed/AP/dp/picture alliance ۲۰۲۰: ترمپ د ځواکونو کمولو اعلان وکړ د ۲۰۲۰م کال په نومبر میاشت کې د امریکا متحده ایالاتو پخواني ولسمشر اعلان وکړ چې په افغانستان کې د خپلو عسکرو شمیر تر ۲۵۰۰ راټیټوي. په دې ترتیب د سږکال تر جنورۍ میاشتې پورې په افغانستان کې د امریکایي ځواکونو شمیر ۲۵۰۰ ته راټیټ شوی دی.
انځور: Brian Harris/Planet Pix/ZUMA/picture alliance
په وروستیو وختونو کي آلماني سرتیري په مزارشریف او کابل کي ځای پر ځای ول. طالب جنگیالي له څو اونیو راهیسي د افغانستان په شمال کي هم د پرمختگ په حال کي دي. په ټول هیواد کي زورزیاتی مخ پر ډیریدو دی.
د آلمان پوځ د خپلو ځواکونو د وتلو په پیل کي ویلي ول چي هغوی به څه ناڅه ۸۰۰ کانتینرونه او تجهیزات آلمان ته انتقال کړي چي په هغو کي نقلیه وسایل، څرخي الوتکي، وسلې او مهمات شامل دي.
کرمپ-کارنباور د نوموړي ماموریت بیلانس داسي بیانوي: »موږ به په ښکاره ډول پر دې خبري وکړو چي کوم شی ښه وو او کوم نه او موږ څه شی ترې زده کړل«. په دوبي کي به له هغو سرتیرو څخه درناوی وسي چي د افغانستان په ماموریت کي یې خدمت کړی.
