آلمان په افغانستان کې تر ۱۷ ميليارد يورو ډېرې پېسې مصرف کړي
۱۴۰۰ مهر ۱۳, سهشنبه
د آلمان د حکومت په حواله په افغانستان کې د آلماني عسکرو او پراختيايي مرستندويانو پر شل کلن ماموريت تر ۱۷،۳ ميليارد يورو ډېرې پېسې مصرف شوي دي. ویل شوي چې زياتره لګښت پر پوځي ماموريت راغلی دی.
انځور: Maurizio Gambarini/dpa/picture-alliance
اعلان
د آلمان د خبري آژانس ډي پي ای په حواله حکومت په افغانستان کې د لګښت په اړه دغه معلومات د آلمان په پارلمان کې د ليبرال ګوند په غوښتنه وړاندې کړي دي. د حکومت له خوا ويل شوي: «په افغانستان کې د ۲۰۰۱م کال څخه د ۲۰۲۱ م کال د اګست مياشتې تر ۳۱ نیټې پورې د «ايساف»، «او اي اف» او همدا راز په «پريکړنده ماموريت» کې پر ګډون باندې د آلمان د کورنيو وزارت له خوا په ټولیزه توګه ۱۲،۳ ميليارده يورو اضافي پېسې د اړوندو چارو له پاره ورکړل شوي دي.»
د حکومتي معلوماتو په حواله د بهرنيو چارو وزارت هم څه نا څه ۲،۴۸ میليارده يورو په بېلا بېلو پروژو کې د پرسونل او مادي لګښتونو له پاره ورکړي دي.
په دې پيسو کې د بهرنيو چارو وزارت د پرسونل او نور عملياتي لګښتونه شامل نه دي چې په دې ډول يوې ديپلوماتيکي اداره کې رامنځته کيږي.
د آلمان د پراختيا وزارت هم په دې تېرو شلو کلونو کې تقريباً ۲،۴۶ ميليارده يورو د افغانستان د ماموريت له پاره په اختيار کې ورکړي دي. همدا راز د آلمان د خوراک او کرهنې وزارت هم په تېرو دوو لسیزو کې په افغانستان کې ۳۳ میليونه يورو مصرف کړي دي.
د آلمان د استخباراتي ادارې لګښتونه بيا محرم درجه بندي شوي دي او په دې اړه هیڅ معلومات نه دي ورکړل شوي. د آلمان د حکومت په دې اړه ويلي: «د اړوندو معلوماتو په ډاګه کول به د استخباراتي ادارې پر کار ډېر اغیز وکړي چې دا به بيا د آلمان امنيت په خطر کې واچوي او یا کيدای شي ګټو ته يې سخت زيان ورسوي.»
ب. ص/ ن. ز (DPA)
زموږ له آرشيف څخه:
په افغانستان کې د المان د پوځي ماموریت لوړې ژورې
آلماني سرتیري کابو له ۲۰ کلونو راهیسې په افغانستان کې د ناټو ماموریت په چوکاټ کې حضور لري. که څه هم د آلماني ځواکونه د ماموریت نیټه د مارچ مياشتي پر ۳۱مه ختمیږي، خو په پام کې ده چې وغځول شي.
