آلمان له خپلو اتباعو غوښتي چې ژر تر ژره له افغانستانه ووځي
۱۴۰۰ مرداد ۲۱, پنجشنبه![Afghanistan Deutsche Botschaft in Kabul](https://static.dw.com/image/39058438_800.webp)
په کابل کي د آلمان سفارت په صراحت سره ویلي چي د محدودو امکاناتو او ظرفیتونو په دلیل نه سي کولای په افغانستان کي خپلو آلماني اتباعو ته ددې تضمین ورکړي چي د کابل په ښار کي د وضعیت د خرابیدو او تجارتي پروازونو د دریدو په صورت کي، د هغوی له پاره له افغانستانه د پرواز زمینه برابره کړي.
د آلمان او همدارنگه نورو لویدیځو هیوادونو له خوا، افغانستان ته د سفر په هکله خبرداری له ډیره وخته راهیسي موجود وو. آلمان د مارچ د میاشتي په پای کي له افغانستانه د خپلو اتباعو د وتلو غوښتنه کړې وه او اوس یو وار بیا پر دغه خبره ټینگار سوی دی.
همدارنگه تیره اونۍ د امریکا متحده ایالات، بریتانیا او نورو هیوادونو هم له خپلو اتباعو څخه غوښتي چي ډیر ژر له افغانستانه ووځي. فرانسې او هند لا مخکی له افغانستانه د خپلواتباعو د وتلو له پاره زمینه برابره کړې وه.
د اپریل په نیمایي کي له افغانستانه د نړیوالو ځواکونو د وتلو د بهیر له پیل راهیسي، طالبانو ددغه هیواد ډیری سیمي تر خپل کنترول لاندي راوستي دي. څو ورځې تر مخه کندز د طالبانو په لاس سقوط وکړ او نن غزني هم د طالبانو لاسو ته لوېدلی دی.
(GP, BS (dpa