آلمان ۲۸ افغان پناه غوښتونکي افغانستان ته اخراج کړل
۱۴۰۳ شهریور ۹, جمعه![آلمان تر درو کلونو ځنډ وروسته یو ځل بیا افغانستان ته د هغو پناه غوښتونکو د اخراج لړۍ پیل کړه چې جرمونه یې ترسره کړي دي.](https://static.dw.com/image/70087523_800.webp)
د آلمان د نیدرزاکسن ایالت د کورنیو چارو وزیر ویلي دي چې د دغه افغانانو الوتکه د جمعې په سهار (د ۲۰۲۴م کال د اګست ۳۰مه) د لایپزیک-هاله، له هوایي ډګر څخه پرواز کړی دی.
آلماني چارواکو د آلمان خبري آژانس ته تأیید کړې ده چې په ۲۰۲۱ کال کې واک ته د طالبانو تر رسیدو وروسته د لومړي ځل له پاره افغان پناه غوښتونکي اخراج شوي دي. د «شپيګل» خبري مجلې او د آلمان خبري آژانس له آلماني ادارو څخه د ترلاسه کړو معلوماتو له مخې، د اخراج شوو مهاجرو شمیر ۲۸ کسه دی.
د دغو معلوماتو له مخې دغه افغان پناه غوښتونکي چې جرمونه یې کړي ول، له بیلا بیلو ایالتونو څخه د نیدرزاکسن ایالت ته انتقال شوي ول او د قطر هوايي شرکت په یوه چارتر شوې بوینګ الوتکه کې اخراج شوي دي. د شپیګل، د رپوټ له مخې د صدرات دفتر او د آلمان د کورنیو چارو وزارت له دوو میاشتې راهیسې دې اخراج ته چمتووالی نیوه.
د آلمان د حکومت غبرګون
د آلمان حکومت هم افغانستان ته د مهاجرو اخراج تائید کړی دی. د آلمان د حکومت ویاند شتېفن هيبيشترايت، په یوه اعلامیه کې ویلي دي چې «د ۲۰۲۱م کال له اګست میاشتې راهیسې نن سهار په لومړي ځل خپل مبدا هیواد ته د افغان اتباعو اخراج ترسره شوی دی.»
د هيبيشترايت، په خبره دا هغه افغانان ول چې په جرمونو مرتکب شوي ول او په آلمان کې یې د پاتېدو حق نه درلود او د اخراج امر یې شوی وو.
په اعلامیه کې د حکومت د وياند له قوله راغلي دي چې د آلمان حکومت په تیرو میاشتو کې ډېري هڅې وکړې چې په دغه ډول قضیو کې د اخراج لړۍ پیلیدو ته ورسیږي او د دې هدف له پاره یې د اړونده هیوادونو ملاتړ وکړ.
ویل شوي دي چې سختو شرایطو ته په کتو سره آلمان له خپلو سیمه ایزو کلیدي هیوادونو د مرستې غوښتنه کړې وه څو د اخراج لړۍ عملي شي. د آلمان د حکومت ویاند له دغه ملاتړ څخه مننه کړې، خو په اعلامیه کې دا نه دي راغلي چې دغه کوم هیوادونه ول.
په اعلامیه کې وړاندې راغلي دي چې د آلمان حکومت هوډ لري چې دغه ډول اخراجونه به ادامه ومومي او د آلمان امنیتي ګټې د مجرمینو او خطرناکو کسانو له حفاظت څخه په څرګند ډول برتري لري.
آلمان په افغانستان کې د طالبانو له ادارې سره مستقیمې دیپلوماتیکې اړیکي نه لري. د شپیګل، په رپوټ کې راغلي دي چې د دې پناه غوښتونکو د اخراج په هکله هم د آلمان حکومت د طالبانو له ادارې سره مستقیمې خبرې نه دي کړي او له قطر څخه یې مرسته غوښتې ده.
sr/ms (dpa, Spiegel)