آلمان کې تر زرو ډېرو شکمنو ډرونونو پروازونه مشاهده شوي
۱۴۰۴ دی ۱, دوشنبه
د آلمان د جنايي پوليسو فدرالي ادارې (بي کی ای) مشر د يکشنبې په ورځ ويلي دي چې په آلمان کې په ۲۰۲۵م کال کې تر اوسه د بې پېلوټه الوتکو تر ۱۰۰۰ ډېر شکمن پروازونه راجستر شوي دي. نوموړي دا څرګندونې د مشهورې آلمانۍ ورځپاڼې بلد په يوه رپوټ کې نشر شوي دي.
د آلمان د جنايي پوليسو فدرالي ادارې مشر هولګر مونش، وويل چې د ډرونونو دا ډول مشاهده «د ځانګړي خطر د وضعيت» ښکاروندوي کوي.
اړونده موضوع: دوبرينت: الماني پولیس به د ډرونونو د ویشتلو اجازه ترلاسه کړي
د آلمان صدراعظم فريدرش میرڅ، په اکتوبر میاشت کې ويلي ول چې حکومت په دې آند دی چې د آلمان په قلمرو کې د ډرونونو د ليدل کيدو تر شا د روسیې لاس دی.
د بي کی ای مشر هولګر مونش، د بلډ ورځپاڼې ته وويل چې د «۱۰۰ فيصده» ډاډمنتيا سره دا خبره نه شو کولی چې د ټولو ډرونونو تر شا دې د روسیې لاس وي. خو نوموړي وويل چې شک لري دا ډول بې پېلوټه الوتکې د يوه دولتي نقش لوبوونکي په لارښوونه فعاليت کوي چې موخه یې په آلمان کې د غير مطمئن وضعيت له پاره لاره هوارول دي.
د برلين او مونشن په هوايي ډګرونو کې ډرونونه
په روان کال کې د آلمان هوايي ډګرونه د بې پېلوټه الوتکو د ليدل کيدو له کبله اغیزمن شول چې له امله یې پروازونه وځنډول شول او دا هر څه د مسافرو د سردردۍ باعث وګرځيدل.
د بيلګې په توګه د مونشن په هوايي ډګر کې په دغه ښار کې د اکتوبر له مهمې ميلې څخه لږ د مخه د اکتوبر پر دريمه نېټه د ډرونونو د ليدل کيدو له کبله د هوايي ترافيک د کنترول فعاليت وردول شو. همدا شان په نوامبر میاشت کې د برلين براندنبوګ هوايي ډګر په شا او خوا کې هم نامعلوم ډرونونه وليدل شول چې له کبله یې کابو دوه ساعته د هوايي ډګر چارې ودرول شوې.
همدا شان د آلمان د پوځي تاسیساتو ترڅنګ هم فضا کې بې پېلوټه الوتکې مشاهده شوې.
د آلمان د «ډېر شپيګل» مجلې د خبر په حواله د اکتوبر پر ۱۳مه نيټه د روستاک ستر ښار ته څېرمه شمال لویديځه سيمه ګنوين کې د پرتې پوځي اډې پر سر هم ډرونونه ليدل شوي ول. په رپوت کې ويل شوي دي چې د دې پېښې پر وخت د ګنوين په پوځي اډه کې د اوکرايني عسکرو روزنې دوام درلود.
آلماني چارواکي د ډرونونو د اغیزمن ځواب په لټه کې دي
د آلمان چارواکي اوس د لا اغیزمنې او چټکې لارې په فضا کې د بې پيلوټه وسيلو سره د مقابلې هڅې کوي.
د آلمان د کورنيو چارو وزیر الکساندر دوبرينت، د چهارشنبې په ورځ په برلين کې د ډرونونو د مخنيوي ګډ مرکز (جي ډي ای زيډ) پرانیست. دا اداره به د ډرونو څخه د دفاع په برخه کې فدرالي او ایالتي وړتياوې سره همغږي کوي.
د آلمان حکومت ويلي دي چې «د ډرونونو د مخنيوي ګډ مرکز ۲۴ ساعته فعاليت کوي او دا د امنيتي خطرونو د فوري او په همغږي شوي توګه ځواب ورکولو له پاره چمتو کړل شوی دی.»
اړونده موضوع: ډرونونه د جګړو په څرنګوالي کې ژور بدلون راوستی دی
د حکومت په حواله دا مرکز «د فدرالي او ايالتي حکومتونو تخنيکي مهارتونه سره يوځای کوي او د مواصلاتو، د وضعيت په ګډه اروزولو او د ډرون د دفاع اړونده فعاليتونو له پاره يوه پياوړې شبکه جوړوي.»
د کورنيو چارو وزارت د ډرونونو د واقعاتو د رامنځته کيدو په ترڅ کې هوايي ډګرونو او نورو ځایونو ته د مرستې رسولو له پاره دفاعي قطعه هم جوړه کړې ده.
د آلمان پوځ (بوندس وېر) هم د دې مشکل سره د مقابلې په موخه د ځانګړو الوتکې ویشتونکو ټانکونو فرمايش ورکړی دی چې په ګڼه ګوڼه کې هم د دې ډرونونو د کنترول په برخه کې اغیزمن ثابتېږي.