ايوا هېګل له دويچلند فونک رسنۍ سره په مرکه کې ويلي چې د پوځي هلو ځلو دغه پياوړتيا هغه «هرومرو» نه غواړي رد کړي. د هغې په خبره «دا به لازمه وي، که زيات وخت په افغانستان کې پاتې کېږو.»
هوېګل زياته کړه چې «نړيوالو وسله والو ځواکونو ته به هم ګواښونه زيات شي او زه له دې سره حساب کوم چې موږ ښايي هم بايد ځانونه پياوړي کړو.»
د آلمان کابينې د فبرورۍ مياشتې په پای کې پرېکړه کړې وه چې اوسنی ماموريت چې د مارچ مياشتې تر پايه پورې دوام کوي، دې د ۲۰۲۲ کال د جنورۍ تر ۳۱مې نېټې پورې اوږد شي. خو د آلمان پارلمان بايد اوس په دې هکله وروستۍ پرېکړه وکړي.
دغه ماموريت د ناټو د «قاطع ملاتړ» ماموريت په چوکاټ کې دی. د آلمان اردو د افغانستان په شمال کې له پنځو سيمو څخه د يوې سيمې مسئوليت لري. اوسمهال تقريباْ ۱۱۰۰ آلماني سرتېري په افغانستان کې میشت دي. د آلمان پوځ د متحده آيالاتو تر پوځ وروسته تر ټولو زيات سرتېري په افغانسان کې لري.
انځور: AFP/Getty Images/J. Eisele دا چې د ناټو د دغه ماموريت راتلونکی به څه وي، لا معلومه نه ده. د ترمپ حکومت له طالبانو سره د اپريل تر ۳۰مې پورې د نړيوالو ځواکونو د وتلو خبره کړې وه. خو د ولسمشر جو بايدن نوې ادارې په دې هکله خپل دريځ لا څرګند کړی نه دی.
د آلمان د پارلمان د دفاعي چارو استازې، ايوا هوېګل، وويل چې «افغانستان به يو بل هېواد وي، کله چې نړيوال ځواکونه ورڅخه ووځي.» د هغې په خبره سړی بايد دغې نتيجې ته هم ورسيږي چې اصلا ټاکل شوي هدفونه تر لاسه شوي نه دي.
زموږ له آرشیف څخه:
په افغانستان کې د المان د پوځي ماموریت لوړې ژورې
آلماني سرتیري کابو له ۲۰ کلونو راهیسې په افغانستان کې د ناټو ماموریت په چوکاټ کې حضور لري. که څه هم د آلماني ځواکونه د ماموریت نیټه د مارچ مياشتي پر ۳۱مه ختمیږي، خو په پام کې ده چې وغځول شي.
انځور: Deshakalyan Chowdhury/AFP/Getty Imagesد ۲۰۰۱م کال په دسمبر کې د آلماني ځواکونو ماموریت تائید شو
د آلمان فدرال پارلمان د ۲۰۰۱م کال په دسمبر میاشت کې له هیواده د باندې د آلماني ځواکونو ماموریت تائید کړ. د آلمان د پارلمان د پریکړې له مخې، آلماني ځواکونه د «آیساف» نړیوال ماموریت په ترڅ کې په افغانستان کې ګمارل شوی وو.
۲۰۰۳: آیساف د ماموریت پراخیدل
د ملګرو ملتونو امنیت شورا، له کابله د باندې د آیساف ماموریت د غځولو پریکړه وکړه. د آلمان فدرال پارلمان هم په کندز ولایت کې د خپل هیواد د ځواکونو ماموریت تائید کړ. آلمان په ۲۰۰۶م کال کې د افغانستان په نهو شمالي ولایتونو کې د آیساف قومانداني پر غاړه واخیسته.
۲۰۰۹: په کندز کې د تیلو پر دوو ټانکرونو بمباري
د ۲۰۰۹م کال د سپتمبر پر څلورمه، د امریکا متحده ایالاتو هوایي جنګي الوتکو د یوه آلماني قوماندان ګیورګ کلاین، په دستور دوه هغه ټانکرونه بمبار کړل چې طالبانو تښتولي ول. په دغه پيښه کې د ملکیانو په کډون تر سلو زیات کسان ووژل شول.
۲۰۱۱: په مزار شریف کې افغان امنیتي ځواکونو ته د مسوولیت سپارل
په ۲۰۱۱م کال کې افغان امنیتي ځواکونو په مزار شريف ښار کې امنیتي مسؤلیت پر غاړه واخیست. په دغه ولایت کې د آیساف په چوکاټ کې د آلماني ځواکونو سترې پوځي اډې موقعیت درلود.
۲۰۱۳: افغان امنیتي ځواکونو ته د کندوز د امنیتي مسؤلیت سپارل
افغان ځواکونو ته د امنیتي مسؤلیتونو د سپارلو په لړ کې، د ۲۰۱۳م کال په اکتوبر میاشت کې د کندوز ولایت امنیتي چارې له آلماني ځواکونو څخه افغان ځواکونو ته وسپارل شوې.
۲۰۱۴: د قاطع ملاتړ ماموریت پېل
په ۲۰۱۴م کال کې په افغانستان کې د نړیوالو ځواکونو جنګي ماموریت پای ته ورسید. خو په افغانستان کې په زرونو بهرني عسکر د ناټو د «قاطع ماموریت» په چوکاټ کې په افغانستان کې پاتې شول، چې دنده یې د افغان امنیتي ځواکونه روزنه ده. په لومړي سر کې آلمان تر ۸۵۰ عسکرو پورې په افغانستان کې د دغه ماموریت په چوکاټ کې د خپلو ځواکونو ونډه تائید کړه.
۲۰۱۸: د قاطع ماموریت غځیدل
د ناټو شریکانو په ۲۰۱۸م کال کې پریکړه وکړه چې د دغه هیواد د امنیتي وضعیت تر ښه کیدو پورې، د قاطع ماموریت په چوکاټ کې خپلو فعالیتونو ته ادامه ورکړي.
۲۰۲۰: د امریکا او طالبانو ترمنځ توافق
امریکا متحده ایالات له طالبانو سره د څو میاشتو مذاکراتو وروسته د ۲۰۲۰م کال په فبرورۍ میاشت کې یو تړون لاسلیک کړ چې له مخې د ۲۰۲۱م کال تر می میاشتې پورې له افغانستانه د خپلو ځواکونو د وتلو ژمنه کړې. د دې په بدل کې طالبانو ژمنه کړې وه چې د افغانستان له خاورې د ترهګرو فعالیت ته اجازه ورنه کړي.
۲۰۲۰: ترمپ د ځواکونو کمولو اعلان وکړ
د ۲۰۲۰م کال په نومبر میاشت کې د امریکا متحده ایالاتو پخواني ولسمشر اعلان وکړ چې په افغانستان کې د خپلو عسکرو شمیر تر ۲۵۰۰ راټیټوي. په دې ترتیب د سږکال تر جنورۍ میاشتې پورې په افغانستان کې د امریکایي ځواکونو شمیر ۲۵۰۰ ته راټیټ شوی دی.
