د ۱۵۵۵ عيسوي کال دغه انځور په دېرنبورګ کي په کوډګرۍ د تورنو مېرمنو د سوځول کېدوني پروسه انځوروي. دا وخت په اروپا کي د «جادوګرۍ» په تور د مېرمنو د وژلو او شکنجه کولو اوج وو. د «کوډګرو مېرمنو دغه لېونتوب» د ۱۴۵۰ او ۱۷۵۰ کالونو تر منځ موده کي په اروپا کي عام وو. په آلمان کي په دغه وخت کي ۴۰ زره «کوډګري» وسوځول سوې.

د «کوډګرو محاکمې» د «حقوقي» بنيادونو پر اساس ترسره کېدلې. د تور د اثباتولو له پاره د «کوډګرو د لمبولو» له اصل څخه هم کار اخيستل کېدی. په دې ترڅ کي به تورنې مېرمني تړل کېدلې او په اوبو کي به غوټه کول کېدلې. کومه مېرمنه چي به ډوبه او مړه سوه، هغه به بېګناه بلل کېدله. کومه مېرمنه چي به بېرته د اوبو سطحي ته راپورته سوه، پر هغې به د شيطان د ملګريتوب لرلو تور «ثابتېدی.»

هغه وخت هم په اروپا کي د سزا ورکول کېدنې تر مخه د تورن کس اقرار اړين وو. خو د دغه اقرار د ترلاسه کولو له پاره د «شرموونکو پوښتنو ګروېږنو» له ميتود څخه کار اخيستل کيدی چي په اصل کي ورڅخه مقصد يې د تورن کس شکنجه کول وو. د ۱۶مې پيړۍ په دغه رسامي کي د زياتو شکنجو له ميتودونو څخه یوازي دوه انځور سوي دي.

د دومينکانې مسيحي ډلې هاينريش کرامر په ۱۴۸۶ کال د «هيکسن هامر» يعني «کوډګرو ضد چکوښ» په نوم کتاب خپور کړ. نوموړي په خپل آند په دغه کتاب کي نه يوازي د کوډګرو ښځو د تعقيب له پاره تيوريتيکي حقوقي او مشروعيت بخښونکي دلايل وړاندي کړي بلکه په کوډګرۍ د تورنو مېرمنو څخه د شکنجې له لاري د اقرار ترلاسه کولو ميتودونه هم تشريح سوي دي. دغه کتاب تر اولسمي پيړۍ پوري لاس پر لاس کيدی.

ليکوال يوهانس پرېتوريوس په ۱۶۶۸ کال د خپل يو کتاب په خپرولو سره هغو داستانونو رشتياوالي ته تقويت وبخښئ چي له مخي ادعا کېدله چي هر کال د هارڅ پر غونډۍ د کوډګرو ښځو اجتماع د شيطانانو سره مشترک رقص کوي. د هغه ادعا وه چي دغه اجتماع او رقص هر کال د می د لومړۍ نېټي په شپه تر سره کيږي.

د ياد پېر يو له مشهورو جنايي قضيو څخه يو هم د اګنېس بېرناور په نوم مېرمني قضيه ده. نوموړې انجلۍ چي د کښته قشر سره يې تړاو درلود د ويټل باخر د تاج د وليعهد البرېخت دريم معشوقه وه. نوموړې انجلۍ په ۱۴۳۵ کال د کوډګرۍ په تور د دوناؤ په سيند کي ډوبه کړل سوه. اټکل کيږي چي دا کار د وليعهد د پلار په امر سوی وو.

کاتارېنا هېنوت (چي په انځور کي يې ښه لاس ته مجسمه ليدل کيږي) د آلمان د کولون ښار له يوې اشرافي کورنۍ څخه وه. دغه مېرمنه چي د پوستې تور تجارت يې پېل کړی وو د کوډګرۍ په تور تورنه سوه. د زښتو زيات شکنجو وروسته هم دغې مېرمني د خپلي بېګناهۍ خبره کوله. خو هغه په ۱۶۲۷ کال په مرګ محکومه سوه، خو ورته دا «شرف» ورکول سو چي جلات اول په خفه ووژله او بيا يې مړی وسوځول سو.

په ۱۵۵۰ کال د انګلستان په ګرنزې کي د کاتوليکانو او پروتستانک مسيحيانو تر منځ د لانجو په ترڅ کي يو شمېر د کوډګرو ښځو محاکمې تر سره سوې. په ۱۵۵۶ کال په ګرنزې کي درې پروتستانت مذهبه مېرمني ژوندۍ وسوځول سوې. داسي روايتونه هم سته چي له دغو درو مېرمنو څخه يوه يې حامله داره هم وه چي لومړی وِژغورل سوه خو بېرته اور ته ټېل وهل سوه. دغه درې مېرمني اوس «د ګرنزې د شهيدانو» په نوم ياديږي.

د متحده ايالاتو د نني ايالت مېسيچوسېټس په سالېم کي په ۱۶۹۲ کال د کوډګرو ښځو تعقيب پېل سو. له انګلستان څخه ورغلو سخت دريځه عيسوي استعمارګرو غوښتل چي په نوي انګلستان کي خالص الهي دولت رامنځ ته کړي. په دې ترڅ کي د کوډګرۍ په تور تورنېدونکو کسانو سره سخت چلن کېدی او په دې ترڅ کي ۱۴ مېرمنې او ۵ نارينه اعدام کړل سول او په لسونو نور شکنجه کړل سول.