د جرمني د صحت عامې وزارت د دغه خبر د خپریدو سره دا هم ویلي، چي معلومه نده، چي ایا دغه په کرونا اخته کیدل تر کامل معافیت وروسته رامنځته سوی او که تر هغه دمخه. د کرونا په مقابل کي د بدن کامل معافیت د دوهم واکسین تر لګولو ۱۴ ورځي وروسته رامنځته کیږي.
تردې دمخه هم خبرداری ورکول سوی ؤ، چي اوسني واکسیونونه د کرونا ویروس په مقابل کي ۱۰۰ فیصده معافیت نه رامنځته کوي. سربیره پردې بدن د هغه تر لګولو وروسته حداقل ۱۴ ورځي پکار لري، چي په مقابل کي یې معافیت رامنځته کړي.
د جرمني د صحت عامې د وزارت په خبر کي دا هم راغلي، چي د هغو کسانو د منځ څخه چي د کرونا اول واکسین یې لګولی دی، تقریبأ ۴۴۰۰۰ کسان، یا ۰،۱۵ فیصده یې بیرته په کرونا اخته سوي دي. دغه ارقام د هغو ۲۸ ملیونو او ۵۰۰ زرو کسانو د منځ څخه ورکول سوي دي، چي لمړی واکسین یې لګولی دی.
د آلمان په ووپرتال کي د بتيستا روغتون ډاکټر، احمد جاويد اڅکزي د آلمان ږغ ته وويل چي د واکسين لګولو وروسته که بعضي کسان په ويروس اخته هم سي، نو عموما علايم يې ډېر سپک وي. هغه زیاته کړه: »د واکسين باوجوده د بعضو انسانانو په کويد ۱۹ اخته کېدنه دا معنی نه لري چي واکسين بې فايدې وو. واکسين په لومړي قدم کي د دې لامل کيږي چي د انسان خپل دفاعي نظام د دغه ويروس سره د مبارزې له پاره په اصطلاح دفاعي ابزار په لاس راوړي. که بدن ته دغه ويروس بيا داخل هم سي نو يا خو يې له سره علايم نه څرګنديږي او يا ډېر زيات سپک وي.» اڅکزی زياتوي چي البته له واکسين سوي او کرونا اخته سوي کس څخه و نورو انسانانو ته د ويروس د انتقال پر څرنګوالي لا څېړني ادامه لري.
آ./م.ق./ا.ا.
په اروپا کې هره ورځ د واکسین شویو کسانو شمير زياتيږې. دلته اوس ټولنيز محدوديتونه ورځ تر بلي کمېږي او ژوند عادې حالت ته راګرځي. انځورونه يې دلته کتلای شئ:
انځور: Peter Kneffel/dpa/picture allianceد يکشنبې په ورځ (د می ۹) په آلمان کې د مور ورځ وه. په ناڅاپې ډول هوا توده شوه او په ټول هيواد کې په ميليونونو خلک پارکونو او عمومي سیمو ته ولاړل. عکس په مونشن کي (د يکشنبې په ورځ د ايزار سیند پر غاړه له ساحل څخه) اخیستل شوی.
په آلمان کي اوس هغه کسان چې واکسين شوي دي تر نورو ډېره آزادي لري. دوی کولای شي په آزاده پښه مغازو ته ولاړ شي د شپې د بنديز پر مهال راووځي او داسي نور. اوس پر دې باندي فکر کيږي چې هوټلونه او د سیلانیانو مرکزونه په کرارۍ سره پرانیستل شي.
تیره شپه په بارسلونا کې ځوانان وروسته له هغه سړکونو ته راووتل چې چارواکو د کرونا له کبله رامنځته شوي بېړني حالت د ليري کيدو اعلان وکړ.
په هسپانيا کې د تيرکال په اکتوبر مياشت کي بيړنې حالت اعلان شو، پر تګ راتګ او هم د شپې له خوا له ۱۱ بجو څخه د سهار تر شپږو بجو پورې ګرځېدل منع شول. اوس له څو میاشتو محدودیتونو وروسته د کرونا ناروغۍ په کمیدلو سره د هسپانيا په ښارونو کې خلک کرار کرار عادي ژوند ته راګرځي. (په عکس کې په بارسلونا کې پر سړکونو د ځوانانو خوشالي او نځاوي ښکاري.)
په مادريد کې پر سړکونو د خلکو خوشالي او نڅا. د شپې له خوا گرځبنديز لري شو. رستورانتونه کولی شي تر نیمې شپې مېلمانه وپالي. خو په هوټل کې دننه ۴ کسان او په بهر کي ۶ کسان کولې شي يوه مېز ته کښېنې. له خلکو اوس هم غوښتنه شوي چې «احتياط» وکړي.
د شنبې په ورځ د مۍ اتمه د بروکسل واټونو او سړکنو ته عادي ژوند راوګرځېد، کافي شاپونواو رستورانتونو د ډيرو خلکو مېلمه پالنه وکړه.
د کرونا په وخت کې د محدوديتونو په رامنځ ته کولو سره ډېري ورزشي لوبې له ننداره کوونکو او مينه والو له حضور پرته ترسره کيدلي. په ايټاليا کې د بایسکل چلوني سيالي او د محدوديتونو کمیدلو او عادي ژوند ته د بیرته راګرځېدلو نخښه ده.
د مور ورځي له پاره د ډالۍ پيرل. په هالنډ کي لا وضعيت سم نه دی او د آلمان د بهرنیو چارو وزير دغه هېواد ته له سفر کولو څخه خبرداری ورکړی.
په دغه هېواد کې د کرونا په ويروس د اخته کسانو شمير ډير کم شوی دی. سینماګاني، پلورنځي او رستورانتونه کرار کرار پرانيستل شوي او ژوند عادي حالت ته راګرځېدلی.
خلک له يو بل څخه د واټن په ساتلو سره په رستورانتونو کي په خوراک بوخت دي. په سويس کي هم د کرونا پر وړاندي مقابلې له پاره وضع شوی محدوديتونه کم شوي دي.
په يونان کې رستورانتونه او ديسکوتيک يو ځلې بيا د مېلمنو پر مخ پرانيستل شوي، کرونايي محدوديتونه لغوه شوي. په عکس کي د آتن ښار د «موناستيراکي» سيمه ښکاري.
د لوپورژ ساحل د شنبې په ورځ له خلکو ډک وو. فرانسویان اوس کولی شي د خپل ژوند کولو له سیمې ۱۰ کيلومتره ليري ولاړ شي. سره له دې د ماښام له اوو بجو څخه وروسته ګرځېدل لا بند دي.
د فرانسې په سويل کې د منتون سواحل د می مياشتې له ۱۹ مې نيټې څخه ځان د سيلانیانو او مسافرو مېلمه پالنې ته چمتو کوي.
