د دغه شمیر د کمیدو علتونه د نورو ترڅنگ د آلمان تابعیت د ترلاسه کولو له پاره د بریتانویانو لږ علاقمندي او د کرونا پاندیمي اغېز ښوول سوي دي.
د آلمان د مرکزي احصائيې ادارې د رپوټ له مخي، د دې کار علت د آلمان تابعیت اخیستلو ته د بریتانوي اتباعو له لږ علاقې سره ارتباط لري. تیرکال یوازي ۴۹۰۰ بریتانویانو د آلمان تابعیت د په لاس راوړلو اقدام کړی چي په دې ډول د هغوی شمېر تر هغه یوکال مخکي په پرتله دوه پر دریمه او یا په بل عبارت ۹۷۰۰ کسان لږ سوی دی.
په ۲۰۱۹م کال کي په آلمان کي د بریتانیا اتباعو ته د تابعیت ورکولو کچه خپل لوړ حد ته رسیدلي وه. دغه بهیر له »بریگزیت« یا اروپايي ټولني څخه د بریتانیا له وتلو سره اړه درلوده.
د يادي ادارې په خبره، د کرونا پاندیمۍ عواقب هم د تابعیت ورکولو پر بهیر اغیز کړی. د کرونا ویروس د پراخیدو په نتیجه کي د تابعیت ترلاسه کولو په اړه جواب ته د انتظار وخت ډیر سوی او مسؤل بڼسټونه لږ کولای سي دغو عریضو ته رسیدگي وکړي.
د آلمان د اساسي قانون د ۷۲ می کالیزي په مناسبت د دغه هیواد ولسمشر ځینو کسانو ته په خپل لاس آلماني تابعیت ورکړانځور: John Macdougall/ADP/dpa/picture alliance
د آلمان د مرکزي احصائيې ادارې د رپوټ په حواله په ۲۰۱۹م کال کي په آلمان کي له ۱۷۳ بیلابیلو هیوادونو څخه راغلو اتباعو د آلمان تابعیت ترلاسه کړی وو.
په مجموعي ډول تر ټولو غټه ډله یا یو پر څلورمه برخه د اروپايي ټولني له ۲۷ غړو هيوادونو څخه دي. په دوی کي بيا رومانیا لومړی ځای لري. پولنډ او بریتانیا دوهم ځای لري. بریتانیا په ۲۰۲۰م کال کي لا د اروپايي ټولني غړی وو.
د شمیرو له مخي، تر ټولو لویه ډله چي د آلمان تابعیت ورکړل سوی دی، ترکان دي. خو بیا هم دغه شمیر تر هغه يو کال مخکي په پرتله ۳۸ سلنه کم سوی او ۱۱۶۰۰ کسانو ته رسیدلی دی.
د احصائيې د مرکزي ادارې د رپوټ له مخي د هغو سوریايي اتباعو شمیر چي په ۲۰۲۰م کال کي یې د آلمان تابعیت ترلاسه کړی، ۷۴ سلنه زیات سوی چي ۶۷۰۰ کسان ول.
د جرمني د مرکزي احصائیې ادارې د ارقامو له مخي د هغو سوريايانو شمېر به چي د آلمان تابعیت غواړي، ډیر سي. دا ځکه چي د هغو پناه غوښتونکو شمیر مخ پر زیاتیدو دی چي د ۲۰۱۴ او ۲۰۱۶ مو کلونو ترمنځ آلمان ته راغلي او په دې ترڅ کي یې د آلمان تابعیت د په لاس راوړلو شراط پوره کړي دي.
GP/NZ(dpa, afp, rtr)
د نړۍ تر ټولو قوي پاسپورټونه ـ ۲۰۲۰ کال
د هېنلي پاسپورت اندکس وېبپاڼي د ۲۰۲۰ کال له پاره د ۱۹۹ هيوادونو پاسپورتونه ارزولي چي ورباندي په کوم شمېر هيوادونو ته بې وېزې سفر کيدلای سي. دا چي افغانستان او ګاوندي هيوادونه يې پر کوم نمبر دي، دلته يې وګورئ:
انځور: Fotolia/chrisdorney
۱۰ مقام ـ سلوواکيه، ليتوانيا او هنګري (۱۸۱ هيوادو ته بې وېزې)
درې اروپايي هيوادونه سلواکيه، ليتوانيا او هنګري پر لسم نمبر راغلي او پاسپورټ لرونکي يې ۱۸۱ هيوادونو ته بې له مخکنۍ ويزې سفر کولای سي.
انځور: AP
۹ مقام ـ کاناډا، نيوزيلند، چيک جمهوريت، آستراليا (۱۸۳ هيوادو ته بې وېزې)
د دغو هيوادونو وګړي و ۱۸۳ هيوادونو ته بېله مخکنۍ ويزې سفر کولای سي.
انځور: picture-alliance/All Canada Photos
۸ مقام ـ امريکا، بريتانيا، ناروې، يونان او بلجيم (۱۸۴ هيوادو ته بې وېزې)
د امريکا متحده ايالاتو پاسپورټ لرونکي کولای سي چي ۱۸۴ هيوادونو ته بېله دې چي مخکي له مخکي يې ويزه ولري سفر کولای سي. تېر کال امریکا په شپږم مقام ؤ او دغه کال ۸ مقام ته راټيټ سوی هيواد دی.
انځور: Getty Images/AFP/P.J. Richards
۷ مقام ـ سويس، پورتګال، هالند، آيرلند او اُتريش (۱۸۵ هيوادو ته بې وېزې)
د غه پنځه هيوادونه په مشترکه توګه پر ۷ مقام راغلي او پاسپورت لرونکي يې بېله مخکنۍ ويزې ۱۸۵ هيوادونو ته سفر کولای سي.
انځور: picture-alliance/Keystone
۶ مقام ـ سوېډن، فرانسه (۱۸۶ هيوادو ته بې وېزې)
د دغو دوو هيوادونو تابعيت او پاسپورت لرونکي کولای سي چي ۱۸۶ هيوادونو ته بېله ويزې سفر کړي.
انځور: dapd
۵ مقام ـ هسپانيا، لوگزامبورگ، دنمارک (۱۸۷ هيوادو ته بې ويزې)
د دغو هيوادونو وګړي کولای سي چي بېله دې چي ويزه ولري و ۱۸۷ هيوادونو ته سفر وکړي.
انځور: DW
۴ مقام ـ ايتاليا، فنلند ( ۱۸۸ هيوادو ته بې ويزې)
د ايتاليې او فنلند هيواد پاسپورټ لرونکي کولای سي چي ۱۸۸ هيوادونو ته سفر وکړي، بېلې دې چي مخکي يې ويزه ولري.
انځور: picture-alliance/dpa/G. Benvenuti
۳ مقام ـ آلمان، سويلي کوريا (۱۸۹ هيوادو ته بې ويزې )
سويلي کوريا او آلمان د قوي پاسپورتونو په دغه سيالي کي دريم مقام خپل کړی او وګړي يې ۱۸۹ هيوادونو ته سفر کولای سي. د سويلي کوريا مقام دريم خو د ورور هيواد شمالي کوريا مقام يې ۱۰۰ دی چي وګړي يې صرف ۳۹ هيوادونو ته بې ويزې سفر کولای سي.
انځور: Getty Images/M. Cardy
۲ مقام ـ سينګاپور (۱۹۰ هيوادو ته بې ويزې)
د سينګاپور هيواد پاسپورت چي د کوم چا سره وي، نو و ۱۹۰ هيوادونو ته بې ويزې سفر کولای سي.
انځور: Fotolia/Gang
۱ مقام ـ جاپان (۱۹۱ هيوادو ته بې ويزې سفر)
جاپانيان کولای سي چي ۱۹۱ هيوادونو ته بې له مخکنۍ ويزې سفر وکړي او په دې توګه د دغه هيواد پاسپورټ هم د نړۍ تر ټولو قوي پاسپورټ بلل کيږي. جاپان د نړۍ د اکثرو هيوادونو سره ښې اړيکي لري او له دې کبله يې وګړو ته حتی بېله ويزې په اکثرو هيوادونو کې ښه راغلاست ويل کيږي.
۴۱ مقام ـ ايران، ايريتريا، کانګو جمهوريت، بنګله دېش (۹۸ هيوادو ته بې ويزې)
د دغو څلور هيوادونو وګړي و ۹۸ هيوادونو ته بېله مخکنۍ ويزې سفر کولای سي.
۱۰۴ مقام ـ پاکستان، سوماليا (۳۲ هيوادو ته بې ويزې سفر)
د پاکستان او سوماليا هيواد وګړي و ۳۲ هيوادونو ته بې ويزې سفر کولای سي او په دې توګه د دغو هيوادونو پاسپورټونه د تر ټولو کمزورو پاسپورټونو څخه دي. سوريه پر ۱۰۵مقام او عراق پر ۱۰۶ مقام راغلی هيواد دی چي وګړي يې و ۲۹ او ۲۸ هيوادونو ته بې ويزې سفر کولای سي.
