1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

د آلمان صدراعظم له اوکراین سره د ملاتړ له پاره کیف ته تللی

احمد حکيمي l اسوشیتید پریس، رویترز او دفرانسې خبري اژانس
۱۴۰۵ مهر ۱۲, یکشنبه

د آلمان صدراعظم فریدریش میرڅ د یکشنبې په سهار کیف ته رسیدلی او تمه ده چې له اوکراین سره د پوځي مرستو د زیاتولو او په اوکراین او آلمان کې د هوايي دفاعي ډرونونو د ګډ تولید په ګډون د یو لړ نویو اقداماتو اعلان وکړي.

په انځور کې د آلمان صدراعظم او ورسره مل پلاوی لیدلی کیږي چې کیف ته د اورګاډي له لارې رسیدلي دي.
د آلمان صدراعظم فریدریش میرڅ د یکشنبې په سهار کیف ته رسیدلی او هدف له اوکراینه د جرمني لا ډیر ملاتړ ښوول شوی.انځور: Kay Nietfeld/dpa/picture alliance

د آلمان صدراعظم فریدریش میرڅ، د آلمان د اقتصاد وزیرې کاترینا رایشه او د جرمني د اقتصادي سکتور د مخکښو څیرو له یوه پلاوي سره د اوکراین پلازمینې کیف ته تللی دی.

میرڅ کیف ته د اورګاډي له لارې تر رسیدو وروسته وویل: «که روسیه ونه درول شي، ژر یا وروسته به خپل جنګي ماشین زموږ پر وړاندې وکاروي.»

د جرمني رسنیو د راپورونو له مخې، تمه ده چې د آلمان صدراعظم د اوکراین د ملاتړ لپاره د شاوخوا یو میلیارد یورو په ارزښت د نوې پوځي مرستې او د انرژۍ د سکتور د زیانونو د ترمیم لپاره د ۳۵۰ میلیون یورو د ځانګړې کولو اعلان وکړي.

همداراز تمه ده چې میرڅ به په اوکراین او جرمني کې د دفاعي ډرونونو او اوږد واټن ویشتونکو توغندیو د ګډ تولید پلانونه اعلان کړي.

د ډرونونو د تولید پر زیاتولو تمرکز

د جرمني حکومتد سرچینو په حواله، چې رویټرز او د جرمني خبري اژانس ترې راپور ورکړی، تمه ده چې د وسلو د تولید په برخه کې د زرګونو هغو ډرونونو پر پراختیا او تولید تمرکز وشي چې د روسیې له خوا د اوکراین پر ملکي زیربناوو د بریدونو لپاره د کاریدونکو چټکو او جټ انجن لرونکو ډرونونو د شنډولو وړتیا ولري.

همداراز تمه ده چې د هغو توغندیو تولید زیات شي چې له زرو کیلومترو څخه د ډیر واټن وهلو وړتیا لري. دا به اوکراین ته اجازه ورکړي چې له لومړۍ کرښې څخه لرې او حتی د روسیې دننه پر پوځي او لوژستیکي اهدافو د برید وړتیا لوړه کړي.

تمه ده چې د دې پراخې همکارۍ ګټه به جرمني ته هم ورسیږي؛ هم د روسیې د هایبرډ فعالیتونو پر وړاندې د خپل دفاعي توان د پیاوړتیا له پلوه او هم د کاري فرصتونو او ټکنالوژۍ له اړخه دواړه لوري مستفید شي.

همداراز تمه ده چې د جرمني صدراعظم له اوکرایني ولسمشر ولودیمیر زیلینسکي سره د اوکراین د سیاسي اصلاحاتو او له فساد سره د مبارزې په اړه خبرې وکړي.

اوکراین ته د آلمان د صدراعظم میرڅ دا سفر داسې مهال ترسره کېږي چې د روسیې د بهرنیو چارو وزارت څو ساعته مخکې بهرنیو دیپلوماتانو او نورو کسانو ته خبرداری ورکړی و چې د اوکراین له پلازمینې او په ځانګړي ډول له پوځي او حکومتي ودانیو څخه ډډه وکړي. د روسیې د بهرنیو چارو وزارت په یوه اعلامیه کې ویلي: «د هر ډول منفي پایلو مسؤلیت په بشپړه توګه د هغو کسانو پر غاړه دی چې دغه خبرداری له پامه غورځوي.»

په وروستیو ورځو کې روسیې د اوکراین پر دنېپرو سیند څو پلونه او د انرژۍ زیربناوې هم په نښه کړې دي. د کیف ښاروال ویتالي کلیچکو د جمعې په ورځ ویلي وو چې کیف له «خورا سخت وضعیت» سره مخ دی.

خو د جرمني پلاوی له دې خبرداریو نه دی په شا شوی. مرز کیف ته له رسیدو وروسته وویل چې د ژمي له رارسېدو او د روسیې د بریدونو له زیاتېدو سره، «اوکراین به په راتلونکو اوونیو کې زموږ ټولو ملاتړ ته اړتیا ولري.»

د د دویچه ویله د ورځي موضوع له برخې تیريدل

د دویچه ویله د ورځي موضوع

د د دویچه ویله نور مطالب له برخې تیريدل