د اوکراین د خارجه وزارت مرستیال میلنیک، دغه هیواد ته د لیوپارد جنگي ټانکونو استولو ته د یوه تاریخي اقدام په سترگه گوري. ولسمشر زیلنسکی لا په دې هکله له احتیاط څخه کار اخلي.
انځور: Moritz Frankenberg/dpa/picture-alliance
اعلان
د اوکراین د بهرنیو چارو وزارت مرستیال اندرې میلنیک، د جنگی لیوپارډ ټانکونو د استولو په هکله د آلمان پریکړه د یوه تاریخی گام په توگه وستایله.
میلنیک د آلمان خبري آژانس ته وویل: که په دې کار کی ځنډ هم راسي، بیا به هم پرته له کوم شک او تردید څخه د جگړې په ډگر کي د اوکراین له پاره یو ریښتینی پرمختگ او د لوبي بدلون وي. دا خبره به په تاریخ کی ثبت سي.
د اوکراین د بهرنیو چارو وزارت مرستیال اندرې میلنیکانځور: Michael Kappeler/dpa/picture alliance
میلینک وویل، دا حقیقت چي د آلمان صدراعظم اولاف شولڅ ظاهراً حتی د امریکا متحده ایالات هم د M1 Abrams ټانکونو په استولو قانع کوي، دا به نو په اصطلاح »د ټانکونو ډبل قوت« وي. د څو امریکايي رسنیو د رپوټونو له مخي د ولسمشر جو بایدن حکومت غواړي د چهارشنبې په ورځ لا د ډیر شمیر M1 Abrams ټانکونو د استولو پخلی وکړي.
د لیوپارد ټانکونو استول به د جرمنی له پاره هم عواقب ولري
د جرمني د پوځ د اتحادیې د مشر، اندرې ویوستنر په خبره له آلمان څخه اوکراین ته د لیوپارډ جنگي ټانکونو د استولو په نتیجه کي به د دغه هیواد د پوځ عملیاتی تیاری لاپسي کمزوری سي.
ویوستنر د چارشنبه په ورځ د آلمان دوهمی تلویزیونی رسنۍ ته وویل: «د دغو ټانکونو استول به د اوکراین په گټه وي، خو له بلي خوا به د آلماني پوځ د عملیاتي آمادگۍ په تاوان تمام سي.»
هغه زیاته کړه، سړی باید دا فکر و نه کړي چي د اوکراین جګړه ښايي په دوو یا دریو میاشتو کي پای ته ورسیږي. او دا کار به یوازي د دغو ټانکونو پر استولو بسنه و نه کړي: «که موږ غواړو چي نه یوازي د اوکراین ملاتړ بلکي د خپل ځان دفاع هم وکړای سو، نو باید صنعت ته وده ورکول سي تر څو لازم تجهیزات په راتلونکو کلونو کي زموږ په اختیار کی راکړي.»
ویوستنر زياته کړه: «په وروستیو میاشتو کي داسي گومان کېدی چي موږ یوازي تر یو حده له ځان څخه دفاع ته آماده یو. حکومت نه یوازي دا چي د روسیې د مداخلې پر وړاندي د اوکراین د ملاتړ مسئولیت لري، بلکي د ملي او اتحادي ملاتړ په برخه کي هم.»
د اوکراین ولسمشر ولودیمیر زیلنسکيانځور: The Presidential Office of Ukraine/SvenSimon/picture alliance
زیلنسکي د ټانکونو په بحث کي د پریکړو غوښتنه کوي
د اوکراین ولسمشر ولودیمیر زیلنسکي تر اوسه پوري د آلمان له خوا د جنگی ټانکونو د استولو په هکله رپوټ پر وړاندي په احتیاط سره غبرگون ښودلی. نوموړي په خپله ورځنۍ ویدیويي وینا کي وویل: «دغه بحثونه باید د پریکړو په کولو سره پای ته ورسیږي.« زموږ متحدین پوهیږي چی څومره ټانکونو ته اړتیا لرو. خبره پر پنځو، لسو او یا پنځلسو نه ده، بلکي تر دې هم باید زیات وي.»
مخکی له دې پولند اعلان کړی وو چي غواړي اوکراین ته د لیوپارډ د ټانکونو یوه کمپنۍ واستوي. همدارنگه فنلنډ او نورو هیوادونو هم دې کار ته خپل تیاری ښودلی دی.
GP/NZ/DW.Online
د آلمان د پوځ ټانکونه کومې وړتياوې لري؟
اوکراين غواړي چې آلمان ورته ليوپارډ ۲ جنګي ټانکونه ورکړي. دغه هېواد ته لا دمخه درنې توپخانې، اکشتافي وسايط او دافع هوا يا د الوتکو ضد ټانکونه هم ورکړل شوي دي. خو دغه جنګي وسلې څه توپير سره لري؟
انځور: Michael Kappeler/dpa/picture alliance
جنګي ټانک ليوپارډ ۲
«The main battle tank» (ام بي ټي) يا ليوپارډ ۲ د جګړې د ډګر «بهترين وسله وال موټر» دی چې د فاير يا ويشتو ډېر قوت لري. ليوپارډ ۲ «يوه ډېره متحرکه صحرا تلونکې نقليه وسیله بلل کيږي چې زنځير او يوه ډېره قوي ماشينداره د اصلي وسلې په توګه لري چې ۳۶۰ درجې څرخي.
انځور: Michael Kappeler/dpa/picture alliance
زغروال خودکاره هاوبڅ ۲۰۰۰ ټانکونه
«هاوبڅ ۲۰۰۰ ټانک» زنځير لرونکی یا چین داره د توپخانې سیسټم دی چې راکټونه یې تر ۶۰ کيلومتر اوږد واټن پورې فاصله په نخښه کولی شي. دا چې مرمۍ یې په اتوماتيک ډول ډکيږي نو دا د مسلسل فاير ډېره زياته وړتيا لري.
انځور: Sven Eckelkamp/IMAGO
ماردر ټانکونه
دا ټانکونه زياتره وخت د جګړې په لومړۍ کرښه کې د سپکو وسلو څخه د دفاع په موخه کارول کيږي او همدا راز د درنو ټانکونو په مقابل کې هم دفاع کوي. د دې ټانکونو اصلي دنده د جګړې ډګر ته د عسکرو انتقال دی. دا پياده جنګي وسايط يا ټانکونه درانه يا جګړه ایز ټانکونه د جګړې تر میدانه بدرګه کوي او ساتنه ترې کوي. دا ټانکونه په سپکو وسلو او زیاتره وخت په هدایت شويو توغنديو سمبال وي چې زغروال ټانکونه سوري کوي.
انځور: Philipp Schulze/dpa/picture alliance
زغره وال پوما ټانکونه
پوما د لا ډېر جګړه ايز ځواک په لرلو سره له ماردر ټانکونو لا عصري دي. دا ټانک د ۳۰ ملي متره کاليبر لرونکی بشپړ قوي توپ لري. د ټانک پر سر د توپ د کنترول له پاره پرسونل ته اړتيا نه وي ځکه چې وسله له لیرې کنتروليږي.
انځور: picture alliance/dpa/H. Hollemann
پرسونل انتقالوونکې فوکس ټانکونه
زغره وال پرسونل انتقالوونکي فوکس او بوکسر ټانکونه د ځمکنيو قطعاتو، تلفاتو او يا د تجهیزاتو د انتقال له پاره طرحه شوي دي او يوازې په سپکو وسلو سمبال دي. دا په دې معنا چې دا ټانکونه په عمومي ډول يوازې د سپکو او منځنيو ځمکنيو وسلو پر وړاندې مقاومت کولی شي.
انځور: Sven Eckelkamp/IMAGO
اکشتافي زغره واله نقليه وسيله
کوچنۍ، چټکه، خاموشه او يوازې په سپکو وسلو سمباله دا نقليه وسیله چې «فينک» نوميږي د لولکس ټانکونو ځای ناستي او د آلمان د پوځ اصلي اکتشافي ټانک دی. دا د دريمې کچې زرې محافظت لري او په بيلا بيلو وسلو سمباليدلای شي.
انځور: picture-alliance/dpa
بفل؛ ځانګړې زغره والې نقليه وسيلې
د «Büffel» زغره وال د حصول يا بيا موندنې دا ټانکونه د هغو ټانکونو او نورو درنو وسلو او ابزارو په بيا موندلو او ترلاسه کولو کې مرسته کوي چې د جګړې په ډګر کې د بريدونو له کبله ويجاړ شوي وي.
انځور: picture-alliance/dpa/P. Schulze
پل جوړونکي ځانګړي زرې ټانکونه «بيبر»
«بيبر» پل جوړونکي ټانکونه دي چې د سيندونو او خندقونو څخه د تیرېدو له پاره ډیزاين شوي. دغه ټانکونه په صعب العبور سیمو کې ډیر ګټور بلل کیږي او نورو نقیله جنګي وسایطو ته د پل په توګه نقش لوبوي.
انځور: Patrik Stollarz/AFP via Getty Images
دافع هوا لرونکي فلاک ګيپارد ټانکونه
ګيپارد په هر ډول آب و هوا کې کار ورکونکی خودکاره د الوتکې ضد ټانک دی چې په ۱۹۶۰م لسیزه کې جوړ شوې او په ۱۹۷۰م لسیزه کې ميدان ته کښته کړل شو. دا ټانکونه څو ځلي عصري شوي او په نويو او پرمختللو وسايلو سمبال شوي دي. دا د آلمان د پوځ او د ناټو د يو شمير نورو هېوادونو د هوايي دفاع اساس بلل کيږي.
