د يونان ساحلي پوليسو ويلي دي چې د کب نيونۍ د چپه شوې کښتۍ د قربانيان شمير ۷۹ تنو ته لوړ شوی دی. دغه پېښه د يونان په جنوبي ساحلي کې رامنځته شوې ده.
د چهار شنبې سهار راهېسې تر هغه وروسته د ژغورنې پراخ عمليات پېل شوي دي کله چې دغه کښتۍ د شپې له خوا د يونان د جنوبي پيلوپونز سيمې جنوب لویديځ لوري ته د تیزو بادونو له کبله چپه شوې وه.
ګمان کيږي چې په دغه کښتۍ کې ۴۰۰ کسان د ليبيا توبروک بندر ته له څېرمه سيمې څخه ايټاليا ته انتقاليدل.
اړونده موضوع: د ترکیې او یونان ترمنځ پر پوله بې نوم او نښانه مړي
د تائيد شويو معلوماتو په حواله تر اوسه ۱۰۴ کسان ژغورل شوي او د يونان کالاماتا ښارګوټي ته وړ شوي دي. دوی ته د ملګرو ملتونو د مهاجرو د مرستې ادارې او د بيړنيو خدماتو له خوا وچې جامې ورکړل شوي او طبي پاملرنه یې کيږي.
څلور کسان د هيپوترميا يا بدن د يخيدو علايمو له کبله روغتون ته وړل شوي دي.
چارواکو په لومړي سر کې د ۳۲ کسانو د مړينې خبر ورکړی وو. وروسته بيا دا شمير ۵۹ ښوول شوی وو او اوس ويل شوي چې ۷۹ ته لوړ شوی دی. دا اندېښنه شته چې د تلفاتو شمير تر دې هم لوړ شي.
څومره کسان لادرکه دي؟
د لټون پراخ عمليات روان دي چې د ساحلي پوليسو شپږ سترې کښتۍ، يوه پوځي سمندري بيړۍ، يوه پوځي ترانسپورټي الوتکه، د هوايي ځواک يوه څرخي الوتکه، يو شمیر شخصي کښتۍ او د اروپايي ټولنې د پولو د ساتنې ادارې «فرونتېکس» يو ډرون هم شامل دی.
د يونان د کډوالۍ چارو وزارت يوې سرچينې د فرانسې خبري آژانس ته وويل چې د ساحلي پوليسو په حواله په کښتۍ کې «په سونو» کسان سپاره ول. دغه چارواکي وويل: «موږ ويره لرو چې د لادرکه شويو کسانو شمير به ډېر لوړ وي.»
د مديترانې د لارې قاچاق کوونکي له يونان څخه په نړيوالو اوبو کې د مهاجرو د انتقال له پاره سترې کښتۍ کاروي څو د سيمه ایزو ساحلي ګزمو سره مخامخ نه شي.انځور: Emilio Morenatti/AP/dpa/picture alliance د مهاجرت نړيوال سازمان هم اټکل کوي چې په کښتۍ کې ښايي تر «۴۰۰ ډېر» کسان سپاره ول. د دغه سازمان په تويتر پاڼه کې راغلي دي: «موږ ويره لرو چې ډېر خلک به مړه وي.»
چارواکو ويلي دي چې دا کښتۍ لومړۍ د سه شنبې په ماښام د اروپا د پولو د ساتنې ادارې د يوې الوتکې او دوو نورو کښتيو له خوا په نړيوالو اوبو کې ليدل شوې وه.
د يونان ساحلي پوليسو ويلي چې په کښتۍ کې سپورو کسانو چې يوه یي هم ژوند ژغورونکي واسکټونه نه وو اغوستي او خپل هويتونه نه وو په ډاګه کړي، په لومړي سر کې «هر ډول مرسته» رد کړې وه.
په يونان کې د کډوالۍ عمومي وضعيت؟
يونان اروپايي ټولنې ته د منځني ختیځ، آسيا او افريقا د مهاجرو او کډوالو مرکزي مسیر دی.
د ملګرو ملتونو د معلوماتو په حواله په روان کال کې د اروپا د لومړۍ ليکې هېوادونو لکه ايټاليا، هسپانيا، يونان، مالټا او قبرص ته څه نا څه ۷۲ زره مهاجر راغلي دي چې تر ټولو ډېر یې ايټاليا ته رسيدلي دي.
اړونده موضوع: د تونس ساحلي ساتونکو د ۷۰ مهاجرو جسدونه له اوبو را ایستلي
د مديترانې د لارې قاچاق کوونکي له يونان څخه په نړيوالو اوبو کې د مهاجرو د انتقال له پاره سترې کښتۍ کاروي څو د سيمه ایزو ساحلي ګزمو سره مخامخ نه شي.
د يکشنبې په ورځ هم دغلته د مرستې تر يوه غږ وروسته ۹۰ کډوال وژغورل شول.
د چهار شنبې په ورځ په جلا پېښه کې يوه کښتۍ چې ۸۱ کډوال پکې سپاره ول، هغه وخت د يونان د کريټ ټاپو ته انتقال شوه چې چارواکو د مرستې غوښتنه ترلاسه کړه.
د مديترانې سمندرګي بل لوري ته د ليبیا چارواکو د روانې مياشتې په پېل کې عمليات پېل کړي ول چې د فعالانو په حواله پکې په زرونه کډوال نيول شوي دي. په دوی کې د مصر، سوریې، سوډان او پاکستان وګړي شامل ول.
ب. ص/ ن. ز (AFP, Reuters)
زموږ له آرشيف څخه:
د «موریا کمپ» په اطرافو کې د ژوندانه شرایط څه ډول دي؟
د یونان حکومت د مهاجرو له حده زیات ډک کمپونو د تړلو او توقیف ځایونو ته د مهاجرو د انتقالولو هوډ څرګند کړی دی. د موریا کمپ چې مهاجر پکې په ناوړه شرایطو کې ژوند کوي، هم ښایي په نزدې وخت کې وتړل شي.
انځور: InfoMigrants/Aasim Saleemافغانه کورنۍ چې هر څه یې وسوځیدل
د سپتمبر میاشتې په ۲۹مه نېټه په موریا کمپ کې د لګیدلي اور له کبله د دغه کورنۍ هر څه وسوځیدل. دغه څلور کسیزه کورنۍ اوس د موریا کمپ د باندې په یوه خیمه کې ژوند کوي. دا کورنۍ چې دوه کوچني ماشومان هم لري ادعا کوي چې چارواکو ورسره هیڅ مرسته نه ده کړې او دغه خیمه هم ورته یوه مرستندویه سازمان ورکړې.
مضره ناروغي، خو بله لاره هم نه شته
نصیر احمد چې د پاکستان تر ادارې لاندې کشمیر سره تړاو لري پر تور زیړي اخته دی. هغه د ۲۰۱۶م کال د اکتوبر میاشتې راهیسې د لیسبوس په ټاپو کې بند پاتې دی. د نصیر د پناه غوښتنه دوه وارې رد شوې ده او اوس ورسره هیڅ ډول مرسته نه کیږي. دی د موریا کمپ د باندې په یوه موټر کې له نورو څلورو کسانو سره په ګډه ژوند تیروي.
ځیرک تلیفون، د ورځني ژوند مهم جز
د موریا کمپ زیاتر اوسیدونکي ځوانان دي. ځیرک تلیفون دغلته د ورځني ژوند مهمه برخه جوړوي. که په نورو اروپایي هیوادونو یا پلرني ټاټوبو کې د خپلو خپلوانو او دوستان احوال اخیستل وي او که تفریح کول وي، دغه ضرورت ځیرک تلیفون سر ته رسوي.
د ماشومانو له پاره د آسانتياو نشتوالی
په موریا مهاجر کمپ او د هغې په اطرافو کې په نورو کمپونو کې د ماشومانو له پاره سهولتونه له نشت سره برابر دي. دغه دوه افغان کوچنیان یوې او بلې خوا ته په ګرځیدو سره خپل وخت تیروي. په دغه سیمه کې د کمپونو په منځ کې په تنګو لارو او سړکونو کې زیاتره وخت ماشومان لیدل کیږي. د ژوندانه له ستونزو څخه د بې خبرو ماشومانو پر خوله مسکا د کمپ د مهاجرو له پاره د خوښۍ یو سبب دی.
د موریا کمپ په سیکشن بي، کې د ۱۵۰ ماشومانو د ځایدو ظرفیت شته، خو شا او خوا ۵۵۰ ماشومان پکې اوسیږي.
نامعلومه برخلیک او اندیښنې
د موریا کمپ زیاتره اوسیدونکي افغانان دي. په دغه انځور کې یوه پلار او زوی یې د کمپ باندني دیوال ته ډډه لګولې او ناست دي. د نارینه وو له پاره ټوله ورځ بې مقصده ګرځیدل هغوی پریشانه کوي. دغه مهاجر نه د کار اجازه لري او نه هم د دغه ځای په ژبه پوهیږي. زیاتره ورځې همدغسې یو ځای او بل ځای په ناسته تیریږي.
له خپل حده څو وارې ډک کمپونه
په دغه انځور کې دوه افغانان لیدل کیږي چې د موریا کمپ د باندې د یوه دوکان مخې ته ډوډۍ خوري. موریا کمپ د ۳۵۰۰ کسانو د ځایدو ظرفیت لري خو هلته شا او خوا ۱۳۰۰۰ کسان پکې اوسيږي. همدا علت دی چې په شا او خوا سیمو کې دغه ډول صحنې تر سترګو کیږي.
دا د موریا کمپ د باندې یو مؤقتي دوکان دی. په دغه ځای کې سبزي او ترکاري رانیول کیدی شي. هغه کسان چې د کمپ ډوډۍ یې نه خوښیږي له دې دوکانه سبزي رانیسي او په خپله د خوړو تیارولو ته ترجیح ورکوي.
د موریا کمپ په اطرافو کې د مهاجرو خیمې
دغه انځور د موریا کمپ د باندې د مهاجرو د یوه مؤقتي کمپ دی. سږکال د سلونو مهاجرو په راتګ سره دغه ډول غیر رسمي کمپونه مخ پر ډیریدو دي چې د پاکوالۍ سهولتونه یې ډیر خراب دي.
