وسله والو د پاکستاني ملیشو مشر او ۵ نور کسان وژلي
۱۴۰۴ آبان ۱, پنجشنبه
پاکستاني چارواکو د پنجشنبې په ورځ وویل چې دغه پېښه د چهارشنبې په ورځ د خیبر پښتونخوا ایالت په اړوندو سیمو کې رامنځ ته شوې ده او وسله والو د وژل شوو کسانو جسدونو ته اور اچولی دی.
د پولیسو یوه لوړرتبه افسر د نوم د نه ښودلو په شرط د فرانسې خبري آژانس ته وویل چې وسله والو کسانو پر قربانیانو تر ډزو وروسته د هغوی پر موټر تېل وشېندل او اور ېې ورواچاوه.
دغه افسر وویل چې «حمله کوونکو د بېرې د خپرولو په موخه موټر ته اور واچاوه چې پکې د شپږو قربانیانو جسدونه په بشپړه توګه سوځېدلي.»
د دغې حملې مسئولیت هېڅ ډلې پر غاړه نه دی اخیستی، خو چارواکو ويلي دي چې پاکستاني طالبانو د ملیشو له دغه مشر څخه د پېسو غوښتنه کړې او هغه ېې دغه غوښتنه رد کړې وه، چې په غچ کې ېې وژل شوی دی.
خیبر پښتونخوا د پاکستان ناامنه ایالت دی چې ډېر وخت پکې د حکومت ضد وسله والو له لوري پر پولیسو او امنيتي ځواکونو بریدونه کېږي. اسلام آباد افغان طالبان د وسله والو په ملاتړ تورونوي، خو طالبانو بیا دغه ادعا تل رد کړې ده.
له آرشیف څخه: