د اسرائيل او حماس ترمنځ اوربند
۱۴۰۰ اردیبهشت ۳۱, جمعه![Palästina Feuerpause in Gaza](https://static.dw.com/image/57603849_800.webp)
په غزې تراډه کي د وسله والو فلیسطینیانو او اسرائيل د پوځ تر منځ تر سختو نښتو ۱۱ ورځي وروسته اوس یو اوربند رامنځته سوی. چی سر له نن جمعه (۲۰۲۱م کال د می۲۱) سهار وختي څخه اعتبار لري.
د اوربند له پيل راهیسي پر اسرائيل باندي کوم توغندی نه دی فیر سوی. همدارنگه د اسرائيل پوځ هم پر غزې تراډي باندي خپل هوايي بریدونه بند کړي دي. خو بیا هم د اسرائيل حکومت او حماس ډلي خبرداری ورکړی: که دواړي خواووي د مصر په وړاندیز اوربند مراعات نه کړي، نو هغه به ژر تر ژره بې اعتباره سي.
بایدن د مصر ستاینه وکړه
د امریکا ولسمشر جو بایدن هغه په سیمه کي د سولې د رامنځته کیدو له پاره یو «واقعي چانس» وباله. بایدن ډاډ ورکړ چي هغه به د دغه ډول پرمختگ له پاره هلي ځلي وکړي. د هغه په خبره فلسطینیان او همدارنگه اسرائیل د دې مستحق دي چي په امنیت کي ژوند وکړي او له آزادۍ، ښه ژوند او ډیموکراسۍ څخه په مساوي اندازه مستفید سي.
بایدن په عین حال کي په دې موضوع کي د منځگړیتوب له امله، د مصر له ولسمشر عبدالفتاح السي سي څخه د زړه له کومي مننه وکړه.
د ملگرو ملتونو عمومي منشي، انتونیو گوتیریس له اسرائیل او فلسطینیانو څخه وغوښتل چي د خپلمنځي کړکیچ له پاره دي اوس یوه جدي دیالوگ ته مخه کړي. هغه پر نړیوالو ټولنو ږغ وکړ چي له ملگرو ملتونو سره په گډه دي د سیمي د بیارغوني له پاره د مرستو یوه گړندۍ او قوي بسته چمتو کړي.
د «نه بحث وړ» موضوع
د جرمني د بهرنیو چارو وزیر هایکو ماس، منځني ختیځ ته د خپل سفر په ترڅ کي د پنجشنبې په ورځ وویل چي په راتلونکي کي به د دغه ځای د کړکیچ موضوع د نړیوال سیاست د اجنډا په سر کي وي.
دغه کړکیچ د می میاشتي پر لسمه نېټه پر بیت المقدس باندي د حماس ډلي له خوا د څو توغنیدو په فیرولو سره پیل سو.
اسرائیل هم په سختو بریدونو سره د هغو جواب ووایه. د اسرائيل پوځ په حواله، د نوموړي کړکیچ له پیل راهیسي څه د پاسه ۴۰۰۰ راکټه د غزې له تراډي څخه پر اسرائيل توغول سوي چي په نتیجه کي یې ۱۲ انسانان وژل سوي دي.
د فلیسطینیانو په حواله بیا د اسرائيل له خوا تر ۱۰۰۰ اضافه هوايي بریدونو په نتیجه کي نږدې ۲۳۰ انسانان وژل سوي دي.
GP/NZ/DW.Online