آلماني وزير: د واکسيناسيون پر بهير دې له سره کتنه وشي
۱۳۹۹ بهمن ۱۲, یکشنبه
د آسترازنکا واکسين د مجوز تر صادريدو وروسته، د آلمان د عامې روغتيا وزير د واکسيناسيون پر بهير د بيا کتنې خبر ورکړ. د بريتانيايي-سويډني شرکت واکسين سپارښتنه، تر ۶۴ کلنۍ پورې افرادو ته شوې ده.
د آلمان د روغتيا وزير، ينس شپانانځور: Michael Kappeler/dpa/picture alliance
اعلان
د آلمان د واکسيناسيون دايمي کميسيون سپارښتنه کړې، چې کرونايي واکسين، آسترازنکا دې د ۱۸ تر ۶۴ کلنو افرادو له پاره تزريق شي. خو د آلمان د عامې روغتيا وزير دغې سپارښتنې ته په کتو ويلي دي چې د واکسيناسيون پر پروسه بيا کتنه کوي.
ینش شپان، د شنبې ورځې په ماښام (د جنوري ۳۰مه) وويل چې د واکسيناسيون بهیر په لومړيتوبونو کې به اساسي بدلون رامنځ ته نشي خو د آسترازنکا واکسين په تزریق کې به د عمر له مخې محدوديتونه منظور شي.
دا په داسې حال کې ده چې د اروپايي اتحاديې د درملو ادارې، د جمعې په ورځ د ياد واکسين د استفادې مجوز، د مشخص سني محدوديتونو پرته صادر کړ.
په آلمان کې د کرونا واکسیناسیون په پروسه کې په لومړيتوب کې هغه افراد شامل دي چې عمرونه يې له ۸۵ پورته دي. د دغه هيواد د واکسيناسيون کميسيون وايي د آسترازنکا واکسين اغيز په هغو افرادو کې چې عمرونه يې له ۶۵ کاله څخه ډير دی، لا تر اوسه وړاندې شوی نه دی.
د آلمان د يو تلويزيون د رپوټ پر اساس، په پام کې ده چې په دغه هيواد کې د واکسيناسيون پروسې پر جزئياتو باندې، سبا دوشنبه د آلمان صدراعظمه انګلا مرکل او د ایالتي لومړي وزيرانو په ګډه غونډه کې بحث وشي.
د آلمان د واکسيناسيون کميسيون مشر، توماس مرتنس وايي چې دوی د کرونا واکسين د تزريق په اړه د سني محدوديتونو سپارښتنه د هغو نتایجو له مخې کوي چې تر اوسه له شوو واکسينونو څخه په لاس راغلي دي.
مرتنس په عین وخت کې په ميندوارو ميرمنو کې د واکسين منفي آوازې هم بې اساسه وښودې. هغه وویل چې ميندواره ميرمنې په حاضر وخت کې نه واکسين کيږي، هغه هم په دې دليل چې د دغو افرادو په اړه لا تر اوسه کافي معلومات په اختیار کې نه شته.
په آلمان کې د کرونا ناروغۍ څخه د مخنيوي په موخه واکسيناسيون، د ۲۰۲۰م کال دسامبر مياشتې په وروستۍ اوونۍ کې پيل شو، خو دغه بهير د واکسين د کمښت له امله د ټاکلي پلان مطابق مخ ته نه ځي. له همدې امله د آلمان د عامې روغتيا وزارت له ګڼو نيوکو سره مخ دی.
دویچه وله ف/م.ک.ص./ا.خ.ح.
په آلمان کي خلک څنګه واکسین کیږي؟
د اروپا د دوا جوړولو آژانس (EMA)، د فایزرـ بیونتک واکسین تائید کړل. آلمان خپلو خلکو ته د واکسین لګولو له پاره ستر مرکزونه آماده کړي. په آلمان کي د واکسیناسیون د پروګرامونو او هلو ځلو په اړه انځورونه دلته لیدلی سئ:
په آلمان کي په لومړي پړاو کي د واکسین لګولو مجموعاً ۴۱۰ مرکزونه جوړ سوي چي د ښاریانو د واکسین لګولو دنده یې پر غاړه ده. په بل پړاو کي ډاکټران هم کولای سي، خلک واکسین کړي. په دوسلدورف کي د واکسیناسیون د یوه مرکز انځور.
انځور: Laci Parenyi/dpa/picture alliance
د واکسین د چمتو کولو دنده
د واکسین د آماده کولو دنده د آلمان د حکومت پر غاړه ده. خو د واکسین لګولو د مرکزونو جوړول ایالتي حکومتونه پر غاړه اخلي. د شورین له ښار څخه د مکلنبورګ فورپومرن ایالتي لومړۍ وزیرې، مانویلا شوزیک لیدنه وکړه. هغه په خپله د سینې له سرطان څخه رغیدلې او بیرته خپلي وظیفې ته ورګرځیدلې ده.
انځور: Bernd Wüstneck/dpa/picture alliance
له سیارو واحدونو څخه کاراخیستل
په لومړي پړاو کي به چي د دسمبر پر ۲۷ مه پیلیږي، سیار واحدونه به د زړو کسانو پالنځایونو ته ولاړ سي او د هغه ځای اوسیدونکي او پرسونل به واکسین کړي.
انځور: Daniel Karmann/dpa/picture alliance
له سترو موجودو تاسیساتو څخه استفاده
د آلمان په ډیرو لویو او کوچنیو ښارونو کي ورزشي صالونونه، ستودیمونه او یا هم د نندارو مرکزونه په یو څه تغییر سره، د واکسیناسیون په مرکزونو اوښتي دي. په دغه انځور کي د فرانکفورت د واکسیناسیون یو مرکز لیدل کیږي.
انځور: Boris Roessler/dpa/picture alliance
د بیلابیلو بنسټونو همکاري
په دا وروستیو اونیو کي بیلابیلو بنسټونو لکه سره صلیب، نظامي واحدونو او همدارنګه د تخنیکي مرستو مرکزونو د واکسیناسیون د مرکزونو په جوړولو کي ونډه درلوده.
انځور: Sina Schuldt/dpa/picture alliance
د لومړیتوبونو ټاکل
د رابرت کوخ په انستیتوت کي د استیکو په نامه د واکسین لګولو دایمي کمیسیون، آلماني اتباع د عمر، د ناروغۍ حالت او د هغه خطر پر اساس چی د کرونا له امله ورته پیښ وي، پر شپږو کتګوریو ویشلي دي چی په ترتیب سره به د لومړیتوبونو پر اساس واکسین سي.
انځور: Hannibal Hanschke/dpa/picture alliance
د واکسین د تطبیقیدو بهیر
آلماني اتباع د لیک له لاري پر ټاکلي وخت واکسیناسیون ته راغوښتل کیږي. د دغې لوحې پر اساس چي د مونشن د واکسیناسیون په مرکز کې ځړیږي، هر څوک چي واکسین کیږي، څلور پړاوونه تیروي. د نوم ثبتول، د واکسین له پاره د انتظار وخت، واکسیناسیون او تر واکسین وروسته په مرکز کي د ډاکټرانو ترڅارنې لاندي پاته کیدل.
انځور: Tobias Hase/dpa/picture alliance
په بیلابیلو ژبو معلومات ورکول
واکسین سوي کسان په دغه صالون کي تر یو وخت پورې تر صحي مراقبت لاندي وي او که د واکسین په وړاندي عکس العمل ونه ښیې بیا نو رخصتیږي. د کولن په ښار کي دغه ځړول سوې لوحه په آلماني، انګلیسي او ترکي ژبو لیکل سوې.
انځور: Jens Krick/dpa/picture alliance
د پرسونل آماده کول
ټول هغه پرسونل چي د جرمني د واکسیناسیون په مرکزونو کي کار کوي، روزنه ورکړل شوې او په دې ورځو کي د تمرین په حال کي دي. په دغه انځور کي د راینلند فالڅ د ایالت د تریر په ښار کي د واکسیناسیون د مرکز د پرسونل تمرینونه لیدل کیږي.
انځور: Harald Tittel/dpa/picture alliance
د خلکو پوښتنې ځوابول
ډاکټران او آن متقاعد ډاکټران هم د واکسیناسیون په مرکزونو کي حاضر دي او د خلکو پوښتنو ته به جواب ورکړي. په دې برخه کي هم لازمې زده کړي او تمرینونه ترسره کیږي. په انځور کي کیڼي خواته ډاکټر کلاوس واینر ناست دی چي د بمبیرګ د ښار د واکسیناسیون په مرکز کي د خلکو پوښتنې جوابوي.
انځور: Nicolas Armer/dpa/picture alliance
د واکسین دوې مرحلې
د آلمان د روغتیا وزارت د اعلان پر اساس، د کرونا د واکسین د ۱۳۶ میلیونه او ۳۰۰ زرو دوزونو په آماده کولو سره به، د دغه هیواد شاوخوا ۸۳ میلیونو اتباعو څخه ۶۸ میلیونه او ۲۰۰ زره کسان په دوو مرحلو کی په راتلونکي میلادي کال کي واکسین سي. دلته په هامبورګ کي د واکسیناسیون یو مرکز لیدل کیږي.
