د شپې ديګي يا ډوډۍ له پاره د اړتيا وړ خوراکي مواد له کمود څخه يوازې څو سانتي متره لري په ځمکه ايښودل شوي دي. همدا ډول لوښي هم. د هانګ کانګ په ډيرو کورنو کې ډوډي خوړل او رفع حاجت په همدا ډول په يوه کوچنۍ کوټه کې څنګ په څنګ ترسره کيږي.

کانادايي انځورګر بيني لام د بشر حقونو د يوې ملاتړ کوونکې ټولنې په مرسته، د هانګ کانګ په ځينو برخو کې د يو شمير هغو خلکو ژوند په تصوير کې ښودلی دی چې د خلکو له نظره لرې او جلا ژوند کوي.

د هانګ کانګ نفوس ۷.۵ ميليونه دی. په دغه ښار کې د انکشافي پروژو له پاره ځمکه نده پاتې. په همدې دليل کورونه او د کورونو کراه په کې د نړۍ د ډيرو ښارونو په پرتله ګرانې دي.

د بشر حقونو په چارو کې يو سازمان وايي چې د هانګ کانګ۲۲۰ زره اوسیدونکي د ښار په ۸۸ زره تنګو او کوچنيو آپارتمانونو کې ژوند کوي. د دغو اپارتمانونو اوسيدونکي اړ دي چې په ډير تنګ ځای کې د ژوندانه ټولې اړتياوې په ماهرانه توګه تنظيم او ځای پر ځای کړي.

د حکومت د احصائې پر اساس، د هانګ کانګ په مرکز کې د اپارتمانونو نرخونه د ۲۰۰۷ کال په پرتله په ۲۰۱۲ کې دوه برابره لوړ ول. د اپارتمان يو متر مربع ځمکه د امريکايي ډالرو له مخې ۱۳ زره او ۹۰۰ ډالره ده.

يو کس په خپل کرايي تنګ اپارتمان کې پر يو ګډوډ تخت پښې خځولي، په داسې حال کې چې د اوسپنې په يوه قوطې کې پخې لوبيا خوري او تلويزيون ګوري. د دغه شان تنګو اپارتمانونو اوسيدونکي وايي چې په تنګ ځای او قيدې هوا کې له ژوند کولو ستړي شوي دي.

انځورګر لام د يو مستند جوړولو په موخه اړ شو چې دوه کاله د هانګ کانګ په يوه پخوانۍ سيمه کې تير کړي دي. په دغه ځای کې د مال دارو او بي وزلو خلکو تر منځ طبقاتي واټن لا هم د ډيريدو په حال کې دی. د «قفس» او «تابوت» په څير کوټو کې ژوند کول، په خپله د دغه ستر توپير يوه ښکار بيلګه ده.

په احتمالي توګه داسې بريښي چې په دا ډول تنګې فضا کې ژوند کول، د اپارتمان اوسيدونکي به له رواني ناروغيو او فشارونو سره مخ کړي وي. دا په داسې حال کې ده چې ډيری انسانان د کلونو کلونو له پاره په همدې ډول تنګو کرايي اپارتمانونو کې خپل ژوند تيروي. نويو آپارتمانونو له پاره د انتظار موده کوم چې د حکومت له خوا به جوړيږي، پنځه کاله ښودل شوې ده.

د ملګرو ملتونو سازمان دغه «قفس» او «تابوت» ته ورته آپارتمانونه انساني کرامت ته د يو توهين په توګه ګڼلي دي. خو د هانګ کانګ حکومت ژمنه کړې ده چې تر ۲۰۲۷م کاله پورې به شاوخوا ۲۸۰ زره نوي اپارتمانونه جوړي. ښايي په دې کار سره به دخلکو ژوند ښه شي.