رويټرز له بغداد څخه خبر ورکوي چې دغه اورلګيدنه د شنبې په ورځ د بغداد ښار په سويل ختيځ کې د ابن خطاب په نوم د کرونا ناروغانو له پاره په يو جوړ شوي روغتون کې رامنځ ته شوې ده. روغتيايي سرچينې وايي چې اورلګيدنه د آکسيجن ټانکۍ د چاودنې له کبله رامنځ ته شوې ده.

د رويټرز يو عکاس د پيښې له ځايه وايي چې د روغتون پر لور د امبولانسونو رش دی تر څو د پيښې له ځايه ټپيان انتقال کړي. روغتيايي سرچينو ويلي دي هغه ناروغان چې ټپيان شوي نه دي، هم له دغه روغتون څخه ويستل کيږي.

د عراق حکومتي خبري آژانس INA د ملکي دفاع ادارې له قوله ليکي چې اورلګيدنه د روغتون په هغه پوړ کې رامنځ ته شوه چې د سږو ناروغانو د ځانګړې درملنې برخه په کې وه او زیاتوي چې له ۱۲۰ ناروغانو څخه ۹۰ يې ژغورل شوي دي.

رويټرز/م.ک.ص./م.ن.ص