د فرانسې خبري آژانس د ایران دولتي تلویزیون په حواله لیکي چې د ایران د مذهبي مشر آیت الله خامنه ای د جنازې مراسم نن شنبه د جولای ۴مه رسماً پیل شول.

ایراني چارواکي وړاندوینه کوي چې د دغو مراسمو په راتلونکو درو ورځو کې به یوازې په تهران کې د ۱۵ او ۲۰ میلیونو ترمنځ خلک برخه واخلي.

د ایران د وژل شوي رهبر د جنازې له پاره شپږ ورځې مراسم په نظر کې نیول شوي دي. آیت الله علي خامنه ای په ۱۹۸۹ کې د ایران  رهبر وټاکل شو او د خپل ژوند تر وروستۍ ورځې پر دغه مقام پاته شو. د ایران ۸۶ کلن روحاني رهبر، د ۲۰۲۶م کال د فبروري په ۲۸مه، پر ایران د اسرائیل او امریکا د حملې په لومړۍ ورځ ووژل شو.

د جنازې مراسمو ته د نورو هېوادونو ترڅنګ، د افغانستان څخه طالب چارواکي او همدارنګه د طالبانو د مخالفې ډلې مشران ورغلي دي. د فرانس پریس په حواله د فلسطینۍ جنګیالۍ ډلې حماس او د لبنانۍ ډلې حزب الله استازي هم په مراسمو کې د ګډون له پاره ایران ته رسېدلي دي. دغه دواړه ډلې د اروپايي ټولنې او امریکا له لوري د ترهګرو په توګه نومول شوي دي.

دغه آژانس زیاتوي، تمه ده د آیت الله خامنه ای زوی چې د خپل پلار تر وژل کېدو وروسته د هغه ځای ناستی ټاکل شوی او له هغه وخت راهیسې په عام محضر کې نه دی راڅرګند شوی، ښايي په دغو مراسمو کې راڅرګند شي.

د تهران په جامع مسجد (مصلای امام خميني) کې د مراسمو ګډونوالو له ځان سره سور رنګه بنرونه د غچ اخیستنې نخښې په توګه له ځانه سره لېږدول. دوی «مرګ پر امریکا» او د «انتقام، انتقام» شعارونه ورکول.

۳۷ کلن رضا چې د پوهنتون یو پروفېسور دی، وویل: «موږ ځکه دلته (د جنازې مراسمو ته) راغلي یو چې خپل مذهبي مشر سره مو ژمنه کړې وه چې د ژوند تر پایه به ېې تر څنګ درېږو.»

هغه زیاته کړه: «موږ له اوږدې مودې وېل چې ځان د رهبر له پاره قربانوو، خو په اصل کې هغه ځان د موږ له پاره قرباني کړ.»

په پام کې ده د خامنه ای تابوت به تر دوشنبې ورځې پورې چې د جنازې مراسم له تهران څخه واوړي، د خلکو پر مخ ايښی وي.

د آیت الله علي خامنه ای جسد به د سه شنبې په ورځ په قُم کې د روحانيت مرکز ته او بیا به د چهارشنبې په ورځ په عراق کې د شیعه ګانو مقدس ښار ته انتقال شي او د پنجشنبې په ورځ به خاورو ته د سپارلو له پاره د ایران مشهد ښار ته چې د خامنه ای د زېږېدو ځای دی، راوړل شي. مشهد د ایران په شمال شرق کې واقع دی.

له آرشیف څخه (04.03.2026):