باچله د امنیت شورا په ځانگړې غونډه کي چي له ښځو سره د تشدد پر موضوع یې تمرکز وو او د ناروې له خوا جوړه سوې وه، وویل: »زه له ټولو هیوادونو څخه غواړم چي پر طالبانو باندي له خپل نفوذ څخه گټه واخلي او هغوی د اساسي بشري حقونو رعایت کولو ته وهڅوي.«
هغې څرگنده کړه چي د ښځو او نجونو له اساسي بشري حقونو څخه انکار، په پراخه کچه د افغانستان اقتصاد ته زیان رسوي او دا په داسي حال کي ده چي دغه هیواد په بې ساري ډول له یوه بشري ناورین سره مخامخ دی.
د هغې په خبره په اگست میاشت کي واک ته د طالبانو له رسیدو راهیسي، د ښځو د حقونو مدافعین، خبریالان، حقوقپوهان او قاضیان تر پرله پسې گواښونو وروسته مجبور سول چي یا افغانستان پریږدي او یا هم ځانونه پټ کړي.
مېرمن باچله په دغه غونډه کي وویل: »زه د امنیت له شورا څخه غواړم چي ځان ډاډه کړي چي آیا په افغانستان کي، له هغې جملې څخه د ښځو او نجونو له بشري حقونو څخه سرغړوونکي او د ناوړه چلند عاملین عدالت ته راکښل کیږي او که څنگه.«
باچله همدارنگه له ملگرو ملتو څخه وغوښتل تر څو د افغانستان له پاره د مرستو په پروگرام کي چي د مارچ میاشتي په نیمايي کي پيليږي، د بشري حقونو یوه قوي مؤلفه ورداخله کړي. هغې وویل: »زه له هیوادونو غواړم چي د بشري حقونو د افغان ښځینه مدافعینو له پاره دي د امن لاري او د هغوی د بیا استوگني له پاره برنامې رامنځته او د هغو ښځو له اخراج څخه ډډه وکړي چي د حفاظت غوښتونکي دي.«
تر هغې وروسته، د ښځو او کوچنیانو د حقوقي پلټنو د غیر دولتي سازمان مدیري، زرقا یفتلي ویلي چي د دې وخت رارسیدلی دی چي د امنیت شورا دي له خپلو حقونو څخه د په میلیونو افغانانو د محرومیت په هکله نور پټه خوله پاته نه سي.
LINK: https://www.dw.com/a-60481183
په افغانستان کې د طالبانو تر واکمنۍ لاندې ژوند
په افغانستان کې د طالبانو له لوري په دراماتیک ډول د واک پر نیولو سربیره، ورځنی ژوند روان دی. خو ورځ تر بلې ژوند د تغیر په حال کې دی، په ځانګړي ډول د ښځو له پاره.
انځور: WANA NEWS AGENCY/REUTERSله افغانستان څخه خپریدونکي انځورونه او ویډیوګانې په ښارونو کې د خلکو ګڼه ګوڼه ښيې، لکه د هرات په دغه رستورانت کې، چې مشتریانو ته هرکلی ویل کیږي. خو د پخوا په پرتله د پام وړ یو بدلون تر سترګو کیږي: د میزونو شا او خوا یوازې نارینه لیدل کیږي چې زیاتره یې دودیز کالي اغوستي وي او د ځینو یې پګړۍ پر سر وي. په ښارونو کې د ښځو شمیر ډیر کم شوی.
د نجونو او هلکانو د صنفونو جلا کیدل
د کابل په یوه خصوصي پوهنتون کې یوې پردې دغه محصلین سره جلا کړي دي. د جنسیت له مخې جلا والی دلته یوه رسمي پالیسي ده او ښایي لا پسې پراخه شي. د افغانستان د لوړو زده کړو وزیر عبدالباقي څو ورځې مخکې په کابل کې وویل: «په ګډو صنفونو کې زده کړه له یوې خوا له اسلامي ارزښتونو سره په ټکر کې ده او له بلې خوا د افغانانو د ملي، فرهنګي او عنعنوي ارزښتونو سره په تضاد کې ده.»
د ائتلافي ځواکونو تر شل کلن حضور وروسته هغه حقوق چې ښځو ترلاسه کړي وو ژر له منځه ولاړل. د طالبانو د فرهنګي کمېسیون د مرستیال په خبره د ښځینه ورزشکارانو له پاره به سپورت منع شي.
طالبانو هر لوري ته د تالاښۍ پوستې جوړې کړي دي. خلک په وسلو سمبال طالبانو څخه اندیښنه لري او له دې کبله غواړي د امکان تر حده د چا د پاو وړ و نه ګرځي. غربي لباس ډیر کم تر سترګو کیږي او په درنو وسلو سمبال کسان زیات ليدل کيږي.
په کابل کې هغه کارګر چې په ورځني مزد کار کوي، د یوه سړک پر غاړه په دې تمه دي چې یو څوک یې کار ته بوځي. افغانستان چې د طالبانو تر ولکې دمخه يې هم اقتصادي وضعيت کمزوری وو، اوس د اقتصادي سقوط او لا زیاتې بې روزګارۍ سره مخامخ دی. د ملګرو ملتونو د اټکل له مخې په راتلونکو میاشتو کې زیات انسانان بې وزلي ګواښي.
د بشري حقونو له پاره مبارزه
له افغان مېرمنو سر پر بې رحمانه سرکوب سربیره هغوی بیا هم د خپل تعلیم، کار او مساوي حقوقو غوښتنه کوي. د ملګرو ملتونو د بشري حقونو دفتر خبر ورکړی دی چې سوله ایز لاریونونه هم د تاوتریخوالي ډک چلن سره مخامخ کیږي. طالبانو مظاهره کوونکي په لښتو او درو وهلي او فیرونه يې پرې کړي دي چې تر اوسه د څلورو کسانو د وژل کیدو او نور ډېرو د ټپيانيدو رپوټونه ورکړل شوي دي.
له بل لوري دغه ښځې وایي چې دوی د طالبانو له نویو مقرراتو څخه راضي دي. دغه ښځې چې د طالبانو امنیتي کسانو بدرګه کولې، د طالبانو له چلن څخه بشپړ رضایت ښکاره کاوه. د دغو لاریون کوونکو په خبره هغه میرمنې چې له هیواده وځي د دوی استازیتوب نه کوي او په دې باور دي چې اسلامي قوانین د هغوی خوندیتوب تامینوي.
د طالبانو ضد لاریونونو برعکس دا ځل د هغوی [طالبانو] په پلوۍ لاریون ته خبریالان هم وربلل شوي ول. ځینې هغه خبریالان چې د طالبانو ضد لاریونونو ته یې خبري پوښښ ورکاوه د طالبانو له خوا له سخت تاوتریخوالي سره مخامخ شوي وو. دا د بدلیدونکي وخت په ځانګړې توګه د ښځو له پاره یو روښانه نښانه ده.
