په جرمني کي د مهاجرو د معتادۍ ستونزه
۱۳۹۹ آذر ۱۷, دوشنبه
منیر په شپه کي اکثره وخت ویښ وي. هغه ددې پر ځای چي بیده سي، همیشه چرتونه وهي: په کابل کي مي د مور سرنوشت څنګه کیږي؟ او یا آیا د اداري کارو فورمې مي صحیح ډکي کړي دي؟
دغه ۲۸ کلن ځوان، چي له افغانستان څخه یې تر جرمني پوري مهاجرت یو کال دوام وکړ، وايي:«د شپې په سختۍ سره بیدیږم.» هغه د جرمني په کولن ښار کي ژوند کوي.
د منیر د بې خوبۍ مشکل تقریباً یو کال دمخه د مهاجرو په کمپ کي پيل سو. هغه څه چي له ده سره کومک کوي «تاریاک دي، چي منیر یې د کابل څخه پیژني.» دی وايي، «تاریاک په کولن کي هم سته.»
هغه د تېښتي پر وخت پر لاري د اعصابو د آرامیدو دوا، بنزودیازپین سره بلد سو، چي د خوب راوړلو په خاطر هم استعمالیږي. منیر اوس بې له دغو درملو څخه د خپلو ورځنیو کارونو ترعهدې نه سي وتلای، خو د هغه استعمال هم ورته سخت مشکلات پیښ کړي دي.
د دې په باب چي د تقریباً ۱،۵ميلیونه مهاجرو په منځ کي چي د ۲۰۱۵م کال راوروسته جرمني ته راغلي دي، څومره کسان یې په نشوو اخته دي، دقیق ارقام نه سته.
د هامبورګ پوهنتون د اعتیاد له تحقیقاتي مرکز څخه سلیکه کون وايي: «د هغو مهاجرو شمېر چي له معتادینو سره د فوق العاده خدمتونو مرکز ته مراجعه کوي، کرار کرار مخ پر ډېرېدو دی.»
د هغې په خبره د مهاجرو په منځ کي په مخدره موادو باندي د اخته کيدو خطر موجود دی. هغه وويل چي اکثره مهاجرین چي د تعقیبدو قرباني سوي او یا له خپلو هیوادونو څخه تښتیدلي دي، له ډیرو سختو رواني مشکلاتو او یا ډیپریشن سره مخامخ سوي دي.
هغې زياته کړې: «اصلاً دغو ټولو ماجرو رواني ضربې لیدلي دي. په هره اندازه چي د هغوی د تیښتي وخت ډیر دوام وکړي، په هغه اندازه یې د رواني ضربو احتمال هم ډیر وي.»
سلیکه کون همدرانګه وايي چي هغه ډله مهاجر چي د قبلیدو چانس یې لږ دی او جواب ته منتظردي او راتلونکي ته چنداني خوشبینه نه وي، مخدره موادو ته د مخه کولو امکان يې هم ډيريږي.