د زاړه ډيلي په دغه بازار کې د اړتیا وړ هرڅه پیدا کيږي. له کتابونونو نيولې تر جامو او خوراکي شیانو پورې. خو هټيوال وايي اوس لږ خلک ورځي.

جامع مسجد، په هندوستان کې يو له سترو مسجدونو څخه دی. دغه مسجد د مغولو د امپراتور، شاه جهان له خوا جوړ شوی دی. په هندوستان کې د کرونايي محدوديتونو باوجود، مسلمانان د جمعې د لمانځه ادا کولو له پاره دغه مسجد ته ور راروان وي.

دا د محمد شاکر د کباب پخولو دوکان دی. په دغې کوڅه کې داسې خواړه خرڅيږي چې د مغلو په وخت کې رايج ول. محمد شاکر وايي چې د دوی دغه دوکان، په ۱۹۴۷ کال کې د هندوستان د خپلواکۍ له وخته فعال دی. هغه دویچه ويله ته وويل: «موږ هر څه ولیدل. د کرونا وبا هم ونشو کړای چې زموږ د دغه میراثي کاروبار مخه ونیسي.»

جيلبي د ډيلي د زوړ ښار يو تر ټولو مشهور خواړه دي. جيلبي له ۱۸۸۴م کال راهيسې دلته رايج ول چې نن ورځ يې هم خلک د پخوا په څير رانيسي. د جيلبيو په کاروبار کې توپير نه دی راغلی. د بيلګې په توګه له راغلو توپيرونو څخه یو دا دی چې نن ورځ د جيلبيو هټيوال له دستکشو او ماسک څخه استفاده کوي.

د ډيلي د زاړه ښار اکثره هټيوال بې وزله يا خيرات خورو ته وړيا خواړه ورکوي. د کرونا وبا په راتلو سره د دغو افرادو شمیر ډير شوی، خو هيټوال له هغوی سره مرسته کوي.

چاندي چوک د زاړه ډيلي په زړه کې دی. د دغه ځای يو شمير اوسیدونکي وايي چې د کرونا وبا د ساختماني چارو کاروباريانو ته د دې فرصت په لاس ورکړی چې د چاندي چوک زړې ودانۍ تخريب کړي. دغه کاروباريان په ځانګړې توګه د داسې کسانو په لټه کې دي چې د کرونا له کبله له اقتصادي ستونزو سره مخ شوي دي.

زوړ ډيلي د هيمالايا سيمې کشميریانو له پاره هم د کاروبار يو ښه ځای دی. د دوی له پاره تر ټولو ښه کاروبار دا دی چې يو دوکان خلاص کړي او کشمیري خواړه پکې وپلوري. حامد هم له دغو کشمیريانو څخه یو دی. هغه دويچه ويله ته وويل: «موږ هلته په يوه ليرې پرتې علاقه کې ډير لږ کار کوو چې هيڅ راتلونکې نه لري. موږ دلته راغلي يوو تر څو مې خلک غږ واوري.»

د هندوستان مشهوره ودانۍ «لعل کلا» د زوړ ډيلي مرکز ته نژدې پرته ده. دا د مغلو د پاچا شاه جهان د اوسیدو ځای وو. هغه پلازمېنه له آګرې څخه نوي ډيلي ته انتقال کړه. دغه کلا په تيره جنوري کې د بزګرانو د اعتراضو پر وخت د تاوتریخوالو صحنه وه. له همدې کبله اوس د کلا شاوخوا ته خنډونه ايښودل شوي او سيلانيان دننه د ورتلو اجازه نه لري.