هندوستان له امریکا او چین وروسته درییم هېواد شو چې دغه پړاو ته رسېږي. په ټوله نړۍ کې د کرونا وبا راهیسې د فضایي سکتور پانګونه ډېره شوې او له ۴۰۰ څخه ډېر نوښتګر شرکتونه یا سټارټ ‌اپونه جوړ شوي دي.

د راکټ جوړونکي شرکت سکای روټ ایروسپیس وویل، د ویکرم-۱ راکټ د هندوستان د اندرا پردېش ایالت په سریهاریکوټا ټاپو کې د ساتیش دهوان فضایي مرکز څخه توغول شوی دی.

دغه ماموریت ته د اګامان نوم ورکړل شوی، چې په هندي ژبه کې د راتګ معنا لري. د هند دغه راکټ د نړیوال وخت په اساس د سهار په ۰۶ بجو او ۳۵ دقیقو او د هند پر وخت په ۱۱ بجو او ۰۵ دقیقو بجو وتوغول شو.

یاد شرکت تر بریا وروسته پر ایکس شبکې ولیکل: «سلام فضا، موږ راورسېدو! د ویکرم-۱ لومړۍ ازمایښتي الوتنې خپل ماموریت بشپړ کړ. د هند د خصوصي سکتور لومړنی فضایي راکټي توغول په بریالیتوب سره ترسره شول.»

دغه هندي شرکت په جلا خپره شوې اعلامیه کې دغه توغونه "ستر بریالیتوب" وباله او ویې ویل چې تر عادي سوداګریزو الوتنو مخکې به نورې ازمایښتي الوتنې هم ترسره شي.

ویکرم ۱ شاوخوا ۲۲ متره لوړوالی لري او کولی شي تر ۳۵۰ کیلوګرامه پورې بار او وزن د ځمکې ټیټ مدار ته ولېږدوي.

د شرکت په وینا، راکټ د هند او بهرنیو مشتریانو څو ازمایښتي بارونه لېږدوي، چې په کې په لابراتوار کې جوړ شوی الماس او داسې روبوټي لاسونه هم شامل دي چې د فضا کثافات لرې کولی شي.