د سمندري توپان يا څونامي يوې سترې څپې چې د ۷،۵ درجې تر زلزلې وروسته رامنځته شوې وه، د اندونيزيا په پالو ښار کې تر هغه وروسته په سونه انسانان ووژل چې د سولاويسي ټاپو کوچني سيند ته ور داخله شوه. د اوبو له زوره د پالو ښار ستر پل ونړيده او پرې روان موټر په اوبه کې لاهو شول.

د څونامي څپه په داسې وخت کې پالو ښار ته ورسيده چې د پالو مسلمانان د ماښام د لمانځه له پاره په جوماتونو کې د راټوليدو په حال کې ول. د چارواکو په حواله نور بيا په ساحل کې د يوې مېلې له پاره په چمتووالي بوخت ول چې د سمندري توپان څپې راگير کړل.

په داسې حال چې ځايي روغتونونه له سونو ټپيانو ډک دي، ډاکتران مجبور دي د ځينو ټپيانو درملنه دباندې وکړي. د پالو د يوه روغتون مشر کومانگ ادي سوجيندرا د مرستې غوښتنه کړې. هغه وويل: «موږ ډيرې مرستې ته اړتيا لرو. موږ موقتي روغتونو، طبي کار کوونکو، درملو او کمپلو ته اړتيا لرو.»

څونامي له ځانه سره خټې او رېگ راوړي. سړکونه بند دي او له نورو ښارونو سره تماس قطع دی. ژغورونکي وايي ښايي په زرونه کسان وژل شوي وي.

چارواکي تر زلزلې او سمندري توپان يوه ورځ وروسته د ځاي هوايي ډگر په پرانيستو توانيدلي. پوځ له همدې هوايي ډگره د مرستو په رسولو پيل کړی دی. د هېواد ولسمشر يوکو ويدودو څونامي ځپلي ټاپو ته تللی او د ښار د بيارغولو ژمنه یې کړې ده.

د اندونيزيا رسنيو داسې انځورونه خپاره کړي دي چې خلک د چور او چپاول په موخه د ړنگيدو له گواښ سره مخامخو مغازو او دوکانونو ته داخليږي. د پالو ځيني اوسيدونکي اوس په کرار کرار خپلو کورونه ته ستنيږي څو خپل د استفادې وړ توکي خوندي کړي.

زلزلې او څونامي سولاويسي ټاپو کې بريښنا پرې کړې ده او د ښار ډيري وگړي پاکو اوبو او درملو ته لاس رسۍ نه لري. ځينو یې اوس د گازو پمپونو ته مخه کړې، څو د جنراتورونو له پاره يو څه تيل په لاس راوړي.