په ایران کې د پراخو اعتراضونو په ترڅ کې لګول شوی انټرنېټي بندیز له دوه نيمو ورځو وروسته هم په دغه هیواد کې دوام لري. د «نېټ ‌بلاکس» سازمان د یکشنبې (د جنورۍ میاشتې ۱۱ نیټه)سهار پر ایکس ټولنیزه شبکه کې ویلي، چې په ایران کې د انټرنېټ لاسرسی اوس له ۶۰ ساعتونو زیات وخت راهیسې بند دی.

 دغه سازمان زیاته کړې: «دا [انترنتي] سانسوري اقدام د هېواد د راتلونکې له پاره په یوه ټاکونکې شېبه کې د ایرانیانو د امنیت او هوساینې پر وړاندې مستقیم ګواښ دی.»

د شنبې په ماښام، په ایران کې یو ځل بیا ګڼ شمېر ایرانیان د هېواد د مشرتابه پر ضد سړکونو ته راووتل. د پلازمېنې تهران په شمال کې مظاهره‌ کوونکو په ۱۹۷۹ کال کې د نسکور شوي شاه د کورنۍ د ملاتړ شعارونه ورکړل.

په ایران کې اعتراضونه د ډسمبر په پای کې د خراب اقتصادي وضعیت پر وړاندې د خلکو له قهره پیل شول. د جمعې شپې مودې پورې په ایران کې د اعتراضونو له پیل راهیسې تر ټولو سترې مظاهرې شوي. په څو ښارونو کې مظاهره‌ چیانو د مذهبي او سیاسي مشرتابه پر ضد توند شعارونه ورکړل.

تر دې وروسته ایراني چارواکو په ټول هېواد کې پر انترنت باندې بندیز وضع کړ. سره له دې،زیاته شوې چې په راتلونکي کې به هم اعتراضونه دوام وکړي.