افغانستان سږ کال له ترهګرۍ څخه د اغیزمنو شویو هیوادونو د فهرست په سر کې ځای نیولی. په ۲۰۱۸م کال کې په افغانستان کې ۱۴۴۳ ترهګریزې پيښې شوې وې چې په ترڅ کې یي ۷۳۷۹ تنه وژل شوي او شپږنیم زره ټپیان شوي وو. ۸۳ سلنه تلفات د طالبانو د بریدونو په پایله کې رامنځته شوي دي. طالبانو، پولیس، عام خلک او حکومتي ادارې په نښه کړي. د داعش فعالیتونه هم زیات وو. د ترهګرۍ په نړیوال شاخص کې د افغانستان نمرې ۹،۶۰ وې.

عراق په پرله پسې ډول ۱۳ کلونه د دې نوملړ په سر کې ځای درلود، خو اوس دویم نمبر ته را ټيټ شوی دی. د (Global Terrorism index (GTI) په حواله په ۲۰۱۸م کال کې په دغه هیواد کې د ترهګرۍ ۱۱۳۱ پيښې رامنځته شوي چې تر هغې د یوه کال مخکې په پرتله ۵۷ سلنه کموالی ښیې. د تیر کال په نسبت ۷۵ سلنه تلفات کم شوي دي. په دې هیواد کې داعش تر ټولو ډیر ترهګریز بریدونه کړي دي. د عراق GTI نمرې ۹،۲۴ وې.

نایجیر په دې فهرست کې له ۸،۵۹ نمرو سره په دریم مقام کې ځای نیولی دی. په دې هیواد کې ۵۶۲ ترهګریز بریدونه شوي چې تر ۲۰۰۰ ډیر کسان په کې وژل شوي او ۷۷۲ تنه ټپیان شوي دي. له ۲۰۰۱م کال راپه دیخوا تر اوسه پورې په دغه هیواد کې له ۲۲ زرو ډیر کسان په ترهګریزو بریدونو کې وژل شوي دي.

د GTD د شاخص په اساس سوریه له ۸،۰ نمرو سره په څلورم مقام کې ځای نیولی. د دې هیواد په ترهګریزو بریدونو کې تر ټولو ډیر داعش، حیات تحریر الشام او د کردستان کارګر ګوند سخت دریځه ښکیل وو. په ۲۰۱۸ م کال کې په دې هیواد کې د ترهګرۍ ۱۳۱ پیښو کې ۶۶۲ تنه وژل شوي او تر ۷۰۰ ډیر ټپیان شوي دي.

پاکستان په دې نوملړ کې په پنځم مقام کې ځای نیولی دی. په دې هیواد کې تیر کال د ترهګرۍ ۳۶۶ پيښو کې ۵۳۷ تنه وژل شوي او تر ۱۰۰۰ ډیر ټپیان شوي دي. تیر کال د ترهګرۍ تر ټولو ډیرې پيښې د داعش خراسان څانګې او د پاکستان تحریک طالبان له خوا شوې وې. د دغه رپوټ پر بنسټ په پاکستان کې د ترهګرۍ له امله د تلفاتو شمیر د ۲۰۱۳م کال په پرتله ۸۱ سلنه کم وو.

په دې هیواد کې الشباب ډلې تر ۹۰ سلنه د ډیرو بریدونو مسئولیت منلی دی. په دې هیواد کې د ترهګرۍ ۲۸۶ پيښې ثبت شوي چې په ترڅ کې یې ۶۴۶ تنه وژل شوي دي. د GTD په شاخص کې د سومالیې نمرې ۷،۸ وې.

په سږني شاخص کې هند له ۸ څخه ۷ مقام ته پورته شوی دی. په نږدې اووه نیم سوه ترهګریزو پيښو کې ۳۵۰ تنه وژل شوي او ۵۴۰ تنه ټپیان شوي دي. په دې هیواد کې تر ټولو ډیر ترهګریز بریدونه ماو پلوه یاغیانو کړي دي. په ۲۰۱۸م کال کې په کشمیر کې د ۳۲۱ پيښو په ترڅ کې ۱۲۳ تنه وژل شوي دي. په کشمیر کې ترهګریز بریدونه حزب المجاهدین، جیش محمد او لشکر طیبه کړي دي.

په یمن کې د سعودي په رهبرۍ د حوثي یاغیانو پر وړاندې د روانې جګړې سربیره دغه هیواد له ترهګریزو بریدونو سره هم مخامخ دی. په مجموع کې په ۲۲۷ پيښو کې ۳۰۱ تنه وژل شوي دي. د ترهګرۍ په دې پیښو کې د حوثي یاغیانو سربیره د AQAP په نوم د القاعدې څانګه هم ښکیله وه. خو د ۲۰۱۵م کال په پرتله په یمن کې د ترهګریزو پیښو پر مهال د وژل شویو کسانو په شمیر کې ۸۱ سلنه کموالی رامنځته شوی دی.

په ۲۰۱۸ م کال کې په دې هیواد کې د ترهګرۍ ۴۲۴ پيښې ثبت شوي چې نږدې ۳۰۰ تنه په کې وژل شوي. له ۲۰۰۱م کال راهیسې تر اوسه پورې په فلپين کې تر ۳۰۰۰ ډیر انسانان وژل شوي دي. په روان کال کې د ترهګرۍ په نړیوال شاخص یا GTD کې د فلپين نمرې ۷،۱۴ وې.

دې هیواد د ترهګرۍ په نړیوال شاخص کې په لسم مقام کې ځای نیولی. په کانګو جمهوریت کې د الایډ ډیموکراتیک فورسز یا د متحد دیموکراتیک ځواکونو او نورو ترهګریزو ډلو په بریدونو کې ۱۸ سلنه زیاتوالی ثبت شوی دی. د دغو ډلو په بریدونو کې زیاتره عام خلک په نښه شوي دي.