د آلمان د راډیو تلویزون (ټاګس شاو) انټرنټ پاڼې د سه شنبې په ورځ په سوریې کې یو وار بیا د داعش د پیاوړې کیدو په اړه رپوټ خپور کړ.

په دې رپوټ کې د مختلفو سیمو د هغو له جملې څخه د راس العین نوم اخیستل شوی دی چې په دې ورځو کې د اسلام د پيغمبر د کاریکاتورونو په غبرګون کې د فرانسې ضد مظاهرو شاهد دی.

یو شمیر اعتراض کونکي د داعش له بیرغ او«الله اکبر» په نارو سره په مظاهرو لاس پورې کوي او له دې لارې خپل قدرت نندارې ته وړاندې کوي.

د راس العین سرحدي ښار«ولسي وګړو د ساتنې واحدونه » د سرپورته کولو ټاټوبی دی، هغه ښار چې په ۲۰۱۱م کال کې کردوانو په کې د بشارالاسد د رژیم پر وړاندې پاڅون وکړ او په ۲۰۱۲م کال کې یې د النصر جبهې اسلامپالو ته ماته ورکړه.

د ټاګس شاو په رپوټ کې هغه کلونه چې کردانو په کې د راس العین کنترول په لاس کې درلود، د «خوښې کلونو» او خپلواکمنۍ په توګه یاد شوي دي چې په ۲۰۱۹م کال کې د ترکي پوځ له ملاتړ څخه د برخمنو اسلامپالو له خوا پای ته ورسیدل.

په نورو سیمو کې د ترکي د پام وړ حضور

په ادلیب کې چې د یاغیانو وروستی سنګر بلل کیږي هم د فرانسې ضد مظاهرې د افراطي اسلامپالو د قدرت ښکاره کولو د نمایش پر صحنې بدل شوی شوې.

ډیرو مغازو د فرانسوي توکو لکه پنیر، تنباکو، عطر او داسې نورو توکو پیرل بایکاټ کړي دي او ترکي تولیداتو ته یې مخه کړې ده.

د ټاګس شاو د رپوټ پر بنسټ که د ترکیې د ولسمشر رجب طیب اردوغان ملاتړ له اسلامپالو ځواکونو سره نه وای، دوی به د سوریې او روسي ځواکونو په مقابل کې د بریا هیڅ چانس نه درلودلی.

په دې رپوټ کې راغلي دي «د ډیر وخت راهیسې اسلامپالو د سوريې په شمال ختیځ کې د تل ابیض او راس العین ترمنځ سرحدي سیمه کې چې د ترکیې له خوا اشغال شوې ده اسلامپالو خپل ځای خلاص کړی دی. د سیمې کردي اوسیدونکي تښتیدلي دي او ځای یي سني مذهب سوريایې عربانو نیولی دی. اردوغان دوی هلته ځای پر ځای کړي دي، په حقیقت کې دا پر کردانو د لاس بري له پاره د وګړو تبادله ده.»

د داعش بریدونه

د آلمان د یوه راډیو تلویزون د انټرنټ پاڼې خبریال لیکي، د داعش وسله والې هستې یو وار بیا د سوریې پر نورو سیمو د بریدونو د زیاتولو په حال کې دي.

د داعش د پلویانو د شمیر په اړه اټکل کول ستونزمن کار دی. دوی له کوچنیو هدفي وژنو سره غواړي ویره خپره کړي هغه هم داسې نه چې د سوریې او عراق ترمنځ صحرایي سیمو کې، بلکې د فرات رود په امتداد د کوردانو په خپلواکمنه سیمه کې.

د داعش ډیري پلویان چې د کردستان په زندانونو کې ول یا تښتیدلي دي او یا هم آزاد شوي دي، ځکه کردانو له مالي پلوه د هغوې د ساتلو توان نه درلود.

هغه څیړنه چې په واشنګټن کې د سیاست نړیوال مرکز کې ترسره شوې ده، داعش توانیدلی دی چې د خپلې دارایې یو د پام وړه برخه وژغوري. په دې ترتیب سره نو داعش د وسله والو بریدونو د ترسره کولو او هم د تازه نفسه ځواکونو د جذبولو توان لري.

د داعش جنګیالي په یو شمیر کردمیشته سیمو کې دومره قدرت ته رسیدلي دي چې مغازه لرونکو ته اجازه نه ورکوي چې ښځينه کارمندانې استخدام کړي.

د ټاګس شاو د رپوټ په پای کې د دې ټکي بیانولو ترڅنګ چې که هر څوک د داعش په امر عمل ونه کړي، مغازه به یي الوزول شي راغلي دي: «په سوریې کې د داعش تروریستي ملیشه و د جنګیالیو بیرته ستنیدل واقعیت ته د نږدې کیدو په حال کې دي».