د لبنان پوځ پر اسرائیلو تور پورې کړی چې د چهارشنبې او پنجشنبې په ورځو یې څو ځله له اوربند څخه سرغړونه کړې ده. د اسرائیلو او حزب الله وسلوالې ډلې ترمنځ دغه اوربند  د تیرې چهارشنبې ورځې راهیسې پیل شوی وو. د لبنان پوځ پر اکس شبکه باندې د یوه پیغام په خپرولو سره ویلي: «اسرائیلي دښمن څو ځله د اوربند له تړونه سرغړونه کړې ده.»

 د لبنان پوځ همدا راز پر اسرائیلو تور پورې کړی چې د دوی هوايي حریم یې نقض کړی او په مختلفو وسلو یې د لبنان خاوره هدف ګرځولې ده. د لبنان پوځ همدا راز زیاته کړې چې دوی له اړونده چارواکو او ادارو سره د اوربند د ماتولو موضوع تعقیبوي. تر دې وړاندې اسرائیلو ویلي ول چې دوی د لبنان په جنوب کې د حزب الله ډلې د یو لړ فعالیتونو تر څارلو وروسته د لبنان جنوبي برخې هدف ګرځولې دي.

د اسرائیل پوځ وايي په جنوبي لبنان کې ګرځبندیز وضع شوی

دا هم په داسې حال کې ده چې د اسرائیلو د پوځ یوه ویاند د لبنان په جنوب کې په یو شمیر سیمو کې لبناني ملکي وګړو ته د شپې پرمهال د ګرځبندیز د عملي کیدو خبرداری ورکړی. دا هغه سیمې ده چې ټاکل شوې وه د حزب الله وسلوالې ډلې جنګیالي ترې باید وتلی وای.

د اسرائیلو د پوځ یوه ویاند افیخای ادرعي، پر اکس باندې د یوه پیغام په خپرولو سره ویلي دي: «د ماښام د پنځو بجه نه د سهار تر ۷ بجو پورې د اللیطاني سیند جنوب ته حرکت او یا دغه سیمې ته داخلیدل په جدي ډول منع دي.» په دغه پیغام کې زیاته شوې چې په دغه سیمه کې خلک باید د خپل خوندیتوب له پاره په دې موده کې په خپلو ځایونو کې پاتې شي.

ټاکل شوې چې حزب الله وسلواله ډله به له اسرائیل سره د ۶۰ ورځني اوربند په موخه خپل ټول جنجګیالي له دغې سیمې څخه وباسي. د اسرائیلو د پوځ د ویاند افیخای ادرعي، دغه خبرداری داسې مهال خپریږي چې د پنجشنبې د ورځې په اوږدو کې د اسرائیلو او لبنان پولې ته نیږدې د اوربند د ماتولو ادعاوې شوي دي.

د غزې تړانګې د مهاجرو په یوه کمپ کې احتجاج

د «وفا» په نامه فلسطیني خبري اژانس په خپل یوه رپوټ کې ویلي چې د اسرائیلو له لوري په مرکزي غزه کې د تازه بریدونو په پایله  کې لږ تر لږه نهه تنه وژل شوي دي. دغه اژانس زیاته کړې چې په دغو بریدونو کې د نصریت په نامه د کډوالو یو کمپ په نخښه شوی دی او دا چې په برید کې ګڼ کسان ټپیان شوي هم دي.

په عین وخت کې د رویترز خبري اژانس بیا په خپل راپور کې د غزې د روغتیا د برخې د چارواکو له قوله ویلي چې په سیمه کې د اسرائیلو د برید په پایله کې لږ تر لږه ۱۱ تنه وژل شوي دي. رویترز خبري آژانس همدا راز د پنجشنبې په ورځ د غزې تړانګې په شمالي بیت لحیه سیمه او همدا راز د خان یونس په سیمه کې هم د اسرائیلو د بریدونو خبر ورکړی دی.

ملګري ملتونه په غزه کې د خراب وضعیت خبرداری ورکوي

د فلسطیني کډوالو له پاره د ملګرو ملتونو ادارې یا «انروا» په تازه څرګندونو سره ویلي چې د غزې تړانګې په شمالي برخو کې د ژوندي پاتې کیدلو له پاره وضعیت ډیر خراب  دی. دغه سازمان پر اکس شبکه باندې د یوه پیغام په خپرولو سره ویلي دي چې لا هم د ۶۵ او ۷۵ زره فلسطینان په دغه سیمه کې دي. دغه سازمان زیاته کړې چې د جبلیه، بیت الحیه او بیت الحنون سیمې د اونیو راهیسې د بشري مرستیو د رسیدو پرمخ تړلي  دي. ملګرو ملتونو زیاته کړې چې دوی په تیرو وختونو کې ۹۱ ځله هڅه کړې څو دغو سیمو ته بشري مرستې ورسوي خو ۸۲ ځله یې د مرستو رسولو مخه نیول شوې او یوازې ۹ ځله ورته د مرستو رسولو اجازه ورکړل شوې ده.

ملګرو ملتونو همدا راز ویلي چې په غزه تړانګه کې شدید باران شوی او د تودوخې درجه هم را لویدلې چې له کبله یې زرګونه کورنۍ د کمپلو، باران ضد خیمو او توشکو له نه شتون سره مخامخ دي.