د شنبې په ورځ په مدیترانې سمندر کې د دوو کښتیو شاوخوا ۱۶۰ تنه پناه غوښتونکي ژغورل شوي. د Alarm Phone مرستندویه سازمان ویلي چې ژغورل شوي کسان د ایټالیې لامپیدوزا ټاپو ته انتقال شوي دي. د دریمې کښتۍ چې شاوخوا ۱۱۰ تنه په کې سپاره ول هیڅ درک نه دی معلوم.
مخکې تر دې نوموړي سازمان ویلي وو چې په دریو وړو کښتیو کې د شاوخوا ۲۷۰ تنو انسانانو ژوند له خطر سره مخامخ دی.
د آلارم فون په نوم مرستندویه سازمان په حواله د شنبې په ورځ له بیړني وضعیت سره مخامخو پناه غوښتونکو ورسره تلیفوني اړیکه کې ویلي دي چې د دوی ترڅنګ تیریدونکو سوداګریزو بیړيو له هغو پناه غوښټونکو سره چې له درو ورځو راهیسې په مدیترانې سمندر کې ایسار پاتې ول، له مرستې څخه انکار کړی وو.
ویل کیږي چې د پناه غوښتونکو وضعیت د انديښنې وړ او د مرګ له ګواښ سره مخامخ دي. د نوموړي سازمان په حواله مالتا او ایټالیا دواړو هیوادونو چې دغه کښتۍ ورته نږدې شوي وې، نه هم پخپله په مستقیم ډول ورسره مرسته کړې او نه یې هم د مرستې ترلاسه کولو د همغږۍ په برخه کې ورته لارښوونه کړې ده.
د کلونو راهیسې په پرله پسې ډول یو شمیر پناه غوښتونکي هڅه کوي چې د مدیترانې سمندر له لارې ځانونه اروپا ته ورسوي.
د رسمي شمیرو له مخې یوازې تیر کال په دې مسیر کې تر ۱۲۰۰ ډیرو انسانانو خپل ژوند له لاسه ورکړی دی. خو کارپوهان وایي چې اصلي یا واقعیي شمیرې تر دې ډیرې لوړې دي.
آژانسونه: ش.ن/ ن.ص
د سمندر په څپو کې د مرګ هرکلی
د مديترانې سمندرګي له لارې مهاجرتونه تل خطرناکه وي. په ورستيو کې د لیبيا ساحلي ساتونکو په يوه عمليات کې مهاجر له اوبو راويستل شول. مرستندويه سازمانونه وايي چې د ليبيا بيړني حالت د مرستو په رسولو کې خنډونه ايجاد کړي دي.
انځور: Reuters/J. Medinaد دغې ماتې شوې پلاستيکي کشتۍ په منځ کې د يوې ښځې او ماشوم جسدونه ليدل کيږي. د ملګرو ملتونو نړيوال سازمان وياند فلاويو دې حيلاکومو، دا يو «ډير غمجن حالت» وباله.
يوه ښځه ژوندۍ پاتې ده. په سمندر کې د اسپانيا د «پرواکتیوا اوپن آرمس» غير دولتي مرستندوی سازمان مرستندويانو دغې ښځې ته نجات ورکړی. په احتمال سره دغه ښځه د لیبيا د ساحلي ساتونکو له خوا يوازې پريښودل شوې، ځکه چې هغې نه غوښتل بيرته ليبيا ته وګرځول شي.
کپيتان مارک رایګ کريوز او د عملياتو مديره انابل مانتس د ېوې بادي کښتۍ موقعيت موندلو کوښښ کوي. کيدای شي دغه کښتۍ د «پرواکتیوا اوپن آرمس» غير دولتي سازمان له پاره د مهاجرو يوه ليږدونکۍ کښتۍ وي.
استر کمپس پر يوه غټ دوربين په سمندر کې د هغو کسانو لټون کوي چې له بيړني حالت سره مخ شوي دي. مرستندويانو دغه اوښتلې پلاستکۍ کښتۍ د سه شنبې په ورځ وليدله. هغوي يوه ښځه وژغورله، خو د يوې بلې ښځې او يوه ماشوم له پاره د مرستې رسيدل نور ډير ناوخته وو.
په اوبو کې موندل شوي جسدونه
مرستندويانو دواړه جسدونه په پلاستيکونو کې وپيچل. د «پرو اکتيوا» بنسټ ګر اوسکار کمپس پر ټويتر ليکلي: «د ليبيا ساحلي ساتونکو وضاحت ورکړ چې په يوه کښتۍ کې د سپرو ۱۵۸ مهاجرو د سفر مخنيوی يې کړی دی.» هغه زياته کړې ده: «کوم څه چې هغوی نه دي ويلي دا دي چې هغوی يو ماشوم او يوه ښځه د کښتۍ يا قایق پر بام پرېښي ول او دغه کښتۍ په بل مخ واوښته. ځکه چې هغوی نه غوښتل د ليبيا په کښتۍ کې سپاره شي.»
د ژغورنې يو غمجن عمليات پای: د «پرو اکتيوا اوپن آرمس» مرستندوی سازمان «آسترال» کښتۍ د اسپانيا يوه بندر پر لور د حرکت په حال کې ده.
ليکونکی: نرمین اسماعیل/ فلوریان میایر/پ.ع /م. ک. ص
