د امريکا ولسمشر، جو بايدن په يوه پيغام کې چې د سپينې ماڼۍ په ويب پاڼه کې خپور شوی، پسرلی «د حیات او زیږون د تجدید تل پاتې سيمبول ګڼلی، هغه هم د داسې رڼا او هيلې سره چې د امریکا متحده ايالاتو د خلکو نه نيولې تر منځنۍ آسیا، قفقاز، منځني ختيځ او اروپا پورې د خلکو زړونه ډکوي.»
بایدن وويل: «دا د هغه نوروز پيغام او خوشالي ده، چې موږ يې د اوه سين په دسترخوان سره په سپينه ماڼۍ کې لمانځو.»
په دغه پيغام کې راغلي دي چې سږکال د بل هر وخت څخه ډیر دغه نوروزي پيغام ته اړتیا شته.
د امریکا ولسمشر د تیرکال کال په جریان کې د کرونا وبا له اغيزو چې نړیوال ورسره مخ شول هم يادونه وکړه: «موږ ته تر دغو ټولو دردونو او کمښت راوروسته، ويل کيږي چې نور ښې ورځې په مخ کې لرو. موږ ټول باید له يو بل سره همکاري وکړو تر څو وشو کړای يوې لا ډيرې سولېزې او د تفاهم او وړتيا څخه ډکې ګډې راتلونکې ته لاسرسی پیدا کړو.»
بايدن خپل د نوروزۍ پيغام داسې پای ته ورساوه: «موږ به د کرونا وبا پر وړاندې خپلې مبارزې ته د تير په څير ادامه ورکوو، په عین حال کې زه هیله مند يم چې ډير ژر زموږ مجازي جشنونه نور په ښاديو او يو ځای کيدو سره ولمانځل شي تر څو ځانونه د خپلو کورنيو او دوستانو په منځ کې احساس کړو.»
دویچه وله ف/م.ک.ص./م.ن.ص.
د پسرلي پر موضوع زموږ له آرشيف څخه يو انځوریز البوم:
په نړۍ کې د پسرلي د لمانځني تر ټولو ښکلي جشنونه
د نړۍ په مختلفو هیوادونو کې خلک د پسرلي راتګ او د طبيعت بیا را ژوندي کیدل په خوښیو، رنګونو او مختلفو دودونو لمانځي چې ټول د خوښیو، ستاینې او مینې پیغامونه لري. افغانان هم د نوروز په جشن سره د پسرلي هرکلی کوي.
انځور: Getty Images/Feng Liد نوروز مېله، د نوي کال په مناسبت د افغانستان دودیز جشن
د بلخ ولايت مزارشریف ښار هرکال د نوروز په ورځ د هیواد له بیلابیلو برخو څخه د راغلو مېلمنو کوربتوب کوي. د نوي کال یا نوروز مراسم د جنډۍ په پورته کولو سره پيليږي. سږکال پر ولسمشر غني سربیره ډيرو نورو حکومتي مشرانو په دې مراسمو کې ګډون کړی وو.
نو روز د ایران تر ټولو مهم تاریخي جشن
د افغانستان په څیر په ایران کې هم د پسرلي په لومړۍ ورځ د نوروز جشن لمانځل کیږي. یونسکو په ۲۰۰۹م کال کې دغه تاریخي جشن د بشري میراث په توګه ثبت کړ. ایرانیان بیا په مختلفو دودونو سره دغه جشن لمانځي. دوی خپل کورونه پاکوي او د خپلوانو لیدو ته ورځي. د افغانستان په څیر په ایران کې هم خلک هفت میوه برابروي.
په هندوستان کې د رنګونو جشن - هولي
په هندوستان کې بيا د پسرلی هرکلی د هولي یا رنګونو په جشن سره کیږي او معمولاً د مارچ میاشتې په نیمايي کې ترسره کیږي. د هندوانو دغه مهم جشن ته پر بدیو باندې د نیکیو د بري د نخښې په توګه کتل کیږي. په دې کې رنګونه ډیر مهم نقش لوبوي. په دې ورځ له هر لوري رنګونه اوریږي، له اوبو، خوږو نیولې تر جامو او څیرو پورې ټول په رنګونو پوښلي وي.
هاتامي - په جاپان کې د آلو ګیلاس د غوټیو جشن
په جاپان کې د پسرلي په موسم کې د آلو ګیلاس غوټۍ غوړیږي او د طبیعت د دې ښکلي منظرې د لیدو له پاره ډير جاپانیان سفرونه کوي او د هغوی ستاینه کوي. په دې هیواد کې ټول پارکونه د خلکو له ګڼه ګوڼې ډکیږي او خلک د طبیعت د نوي پیل لمانځنه کوي. په جاپان کې دغه جشن ته د دوستانو او خپلوانو ترمنځ د پخلاینې او مینې د جشن په سترګه کتل کیږي.
روسان د ماسلينڅه په نامه یوه ځانګړې جشن سره پسرلی لمانځي. روسانو ته دغه جشن د اوو اونیو د خوښیو پیل دی. د دې جشن په پای کې روسان له وښو څخه جوړو شوو لانځکو ته اور ورکوي او دغه څه له ژمي څخه د مخه ښې په معنی دي.
فنلنډیان د مې میاشتې په لومړیو کې د واپو په نامه د یوه جشن لمانځنه کوي. په دې جشن کې خلک د کارنوال د جشن په څیر مختلفې، له رنګونو ډکې او په زړه پورې جامې اغوندي او له خپلو کورنو وځي. دغه جشن د اپریل میاشتې پر ۳۰ نیټه په آزاد چاپیریال کې په رقصونو سره پیلیږي.
په سکاټلند کې د پسرلي جشن
د سکاټلنډ په ادینبورو کې خلک د پسرلي پیل د سلتیک قومونو په پخوانیو دودونو سره لمانځي. دغه مراسم هرکال د اپریل میاشتې پر ۳۰مه نیټه پیلیږي او د می میاشتې تر لومړۍ نیټې پورې دوام کوي. په دې جشن کې خلک رنګه او جالبې جامې اغوندي او له اور او رڼا ګانو سره لوبې کوي. خلک د شپې مهال په سړکونو قدم وهي، رقصونه کوي او اور لوبې کوي.
د پرتګال په مادیرا کې د ګلانو جشن
د پرتګال په مادیرا ټاپو کې خلک د اپریل میاشتي په لومړیو کې په ښارونو کې ګلان ږدي او د نوي کال او پسرلي هرکلی کوي. په دې ټاپو کې خلک له ګلانو جوړې شوې جامې اغوندي او پر سړکونو رقصونه کوي او د نوي کال خوښي لمانځي. په دې مراسمو کې هر لوري ته ګلان لیدل کیږي.
په هسپانیا کې د فایا دودیز جشن
په هسپانیا او په ځانګړې توګه په والنسیا کې خلک د پسرلي هرکلی په فایا جشن سره کوي. په مارچ میاشت کې د دې سیمې خلک بیلابیلې او له رنګونو ډکې لانځکې (ناوکۍ) پر سړکونو ګرځوي. په دې جشن کې هم رقصونه او اور لوبې ځای لري. د دې جشن په پای کې جوړو شوو سترو لانځکو ته اور اچول کیږي.
