د امريکا متحده آيالاتو تر منځنيو ټاکنو وروسته ولسمشر جو بايدن ټينګار کوي چې دا »د امريکا له پاره ښه ورځ« او »د ديموکراسۍ له پاره ښه ورځ« وه. په واشګټن کې د بايدن په خبره ديموکراسي ننګول شوې وه، خو د امريکا ولس اوس خپله پرېکړه کړې ده. سره له دې چې ټولې پايلې لا معلومې نه دي.د امريکا منځمهاله ټاکنې: هغه څه چې په اړه یې باید وپوهيږئ
د سه شنبې په ورځ د کانګرس په ټاکنو کې د بايدن ديموکرات ګوند د ډېرو د انتظار خلاف ډېره ښه لاسته راړونه لرلې ده. خو جمهوري غوښتونکو يو څه پرمختګ کړی او ښايي پر استازو مجلس کنترول تر لاسه کړي. خو ديموکراتان د دې ښه چانس لري چې په سنا کې بيا برلاسي پاته شي. کېدای شي هلته يوه چوکۍ آن تعيينونکې وي.
بايدن سياسي مخالفينو ته لاس غځولی
بايدن وويل چې »زه حاضر يم چې له جمهوري پالو سره خبرې وکړم« او دا چې »د امريکا راتلونکی تر دې ښه برېښي چې سړی په بې پايه سياسي شخړو کې کښېوځي.« خو د بايدن په وينا به دی په خپلې ويټو سره د دې مخه ونيسي چې جمهوري پال د جنين د سقط ممنوعيت او د روغتيايي سکتور تضعيف مخ ته يوسي. ده هيله هم څرګنده کړه چې تر ټاکنو وروسته به په ګډه د اوکراين ملاتړ دوام ومومي.
په راتلونکي کال کې ښايي بايدن د دې پرېکړه وکړي چې آيا د ۲۰۲۴م کال په ولسمشريزو ټاکنو کې به ګډون وکړي او که نه. نوموړي ۸۴ کلن سياستوال وويل چې »دا زما هدف دی.« خو »په پای کې مې فاميل پرېکړه کوي.«
ترمپ د هيلو اظهار وکړ
پخواني ولسمشر دونالد ترمپ په دې وروستيو کې څو ځلې اشاره کړې وه چې غواړي سپينۍ ماڼۍ ته ورستون شي. د راتلونکې سه شنبې له پاره دغه ۷۶ کلن د »يوه ستر اعلان« کولو خبره کړې ده.
د منځنيو ټاکنو پايلې ترمپ »تر يو حده مايوس کوونکې« وبللې، خو بيا يې هم دغه ټاکنې يوه شخصي بريا وبلله. ده د سوشل تروُت په نوم شبکه کې چې ده يې هم بنسټ ايښی دی، ليکلي دي چې ډېر هغه کانديدانې او کانديدان چې ده ورڅخه ملاتړ کاوه، په منځنيو ټاکنو کې بريا درلودلې ده.ترمپ: په «ډېر قوي احتمال» به په راتلونکو ټاکنو کې ځان کاندید کړم
خو د ترمپ له ملاتړه برخمن نوماندان په تېره په هغو ځايونو کې بريالي ول، چې د جمهوري پال ګوند ملاتړ په کې هسې هم ډېر وي. د ده نورو نوماندانو يا ټاکنې بايللې دي يا شا ته پاته ول.
خو اصلي بريا جمهوري غوښتونکي کانديد، رون دې سانتيس لرلې ده چې په څرګند ډول يو ځل بيا د فلوريدا والي وټاکل شوی. نوموړی په ۲۰۲۴م کال کې د ولسمشريزو ټاکنو په کانديداتورۍ کې د ترمپ اصلي سيال هم بلل کيږي.
wa-mak/ن.ص./ن.ز.
هغه ستوري چې د بايدن د تحلیف په مراسمو کې ګډون کوي
د کرونا وبا له کبله د امريکا د نوي ولسمشر د تحلیف په مراسمو کې به د ګډونوالو شمیر لږ وي. خو په عين وخت کې به يو شمير نامتو سندرغاړي او فلمي ستوري په يوه ځانګړې ټلويزيوني خپرونه کې راڅرګند شي چې دلته ښودل شوي دي.
انځور: John Locher/AP Photo/picture allianceسندرغاړې ليدي ګاګا، يوه د هغو نامتو هنرمندانو په ډله کې ده چې د امریکا د نوي ولسمشر، جو بايدن او د هغه د مرستيالې، کاملا هريس، د تحليف له مراسمو سره سم په يوه ځانګړي پروګرام کې ګډون کوي. په پام کې ده هغه به په دغو مراسمو کې د امريکا ملي سرود ووايي.
د بایدن د تحلیف د مراسمو په مناسبت جوړ شوي پروګرام کې بله نامتو څیره سندرغاړې جنیفر لوپز ده. هغه تر دې وړاندې د امریکا په انتخاباتو کې له دموکرات ګوند څخه خپل ملاتړ اعلان کړی وو.
د دغه پروګرام بل هنري ګډونوال به نامتو سندرغاړی بروس سپرينګستن وي. هغه به په دغه ځانګړي پروګرام کې خپله نامتو سندره «Born in the USA» ووايي چې د امریکا دوهم ملي سرود په سترګه ورته کتل کيږي.
د راک موسيقي سندرغاړی، جان بون جووي هم د تحلیف ورځې په ځانګړي هنري پروګرام کې ګډون کوي. جووي يو له هغو هنرمندانو څخه دی چې د دونالد ترمپ پر سیاستونو يې نیوکه کړې وه. هغه ترمپ یو «نامطلوبه شخص» ښودلی وو.
امريکايي سندرغاړي جان لجند، هم ويلي دي چې په دغه ځانګړي ۹۰ دقیقه يې پروګرام کې ګډون کوي. لجند له وړاندې دموکراټ ګوند څخه ملاتړ کړی وو. هغه د تیرکال په نومبر کې د انتخاباتي کمپاینونو پر مهال له کاملا هريس سره ملګرتیا هم کړې وه.
اوا لونگوریا او سینمايي ستوری، کری واشینگتن به د دغه تلويزيوني پروګرام کوربتوب کوي. لونگوریا په مشهورو تلويزيوني سريالونو کې رولونه ادا کړي دي. دغې هنرمندې هم په کراتو د دموکراټانو په غونډو کې ګډون کړی دی. همدا ډول هغې د انتخاباتي کمپاينونو پر وخت په فلوریدا کې له بایدن او هریس سره ملتیا کړې وه.
د هالیوود نامتو فلمي ستوری، ټام هنکس به په دغه تلويزيوني پروګرام کې د پروګرام وړاندې کونکو سره همکاري کوي. په پام کې ده په دغه پروګرام کې «ورځني اتلان» معرفي شي.
لین مانوئل میراندا، سندره جوړونکی او نمایشنامه لیکونکی دی. دی به په دغه پروګرام کې ادبي ټوټې ووايي. د بسکتبال امريکايي لوبغاړی، کریم عبدالجبار، هم په دغه ځانګړي تلويزيوني پروګرام کې ګډون کوي.
