آلمان: پولیسو په لارۍ موټر کې کم عمره مهاجر ماشومان نیولي
۱۴۰۰ فروردین ۲۱, شنبه
د آلمان په راین لانډ- فالڅ ایالت کې پولیسو اووه تنه پناه غوښتونکي چې په یوه بار وړونکي لارۍ کې په غیر قانوني توګه لیږدول کیدل نیولي دي. د کایزرزلوټن ښار څارنوالۍ د جمعې (د اپریل میاشتې ۹ نیټه) په ورځ وویل چې د بهرنیو اتباعو د قاچاق په تور د ۳۹ کلن موټر چلوونکي د نیول کیدو امر صادر شوی دی.
د پنجشنبې ورځې تر غرمې وروسته یوه موټر چلوونکي پولیسو ته خبر ورکړ. دغه موټر چلوونکي وویل چې د زاربروکن په ۶ نمبر اوټو بهان (لویه لار) کې په یوه بار وړونکي موټر کې د ترپال لاندې څخه یو شمیر خلک په پرله پسې ډول لاس ښوروي او اشارې کوي، څو د خلکو پام ځانته را جلب کړي.
نیول شویو پناه غوښتونکو ویلي دي چې افغانان دي او سمدستي یې د پناه غوښتنه کړې ده. د لمړنیو څیړنو له مخې دغه کسان بی سرپرسته کم عمره پناه غوښتونکي دي چې د ۱۵ او ۲۰ کلونو ترمنځ عمرونه لري.
له دې ډلې څخه قانوني سن ته نه رسیدلي پناه غوښتونکي د ځوانانو د مراقبت ادارې ته سپارل شوي دي. درې نور لویان باید ځانونه د ثبت نام اړونده مرکزونو کې ثبت کړي.
د څارنوالۍ په حواله ۳۹ کلن د لارۍ موټر چلوونکي ویلي دي چې هغه د بار په ځای کې د دغو اوو تنو ځوانانو په هکله هیڅ معلومات نه درلودل.
آژانسونه: ش.ن/ ا.ا