څارنوالۍ په یوه اعلامیه کې ویلي چې هغه ادرس چېرې چې برمته شوی کس پکښې ساتل کېدی، د پاریس په اسون ناحیه کې تثبيت شو. همدغه ځای کې پولیسو د شنبې په ورځ (د ۲۰۲۵ کال د می ۴مه) چاپه ووهله او مغوي کس یې آزاد کړ. د دغه کس هویت نه دی په ډاګه کړل شوی.
د فرانسې خبري آژانس د رپوټ پر اساس، دغه سړی د پنجشنبې ورځې په سهار د پاریس له ۱۴مې جنوبي ناحیې څخه تښتول شوی و. د پولیسو یو افسر د نوم د نه ښودلو په شرط دغه آژانس ته ويلي ول چې دغه سړی څلورو کسانو چې ماسکونه ېې اغوستي ول یوې کوچنۍ لارۍ ته اچولی و.
نور ولولئ: فرانسه: د چاقو په برید کې یو کس وژل شوي او څو نور ټپیان دي
د څارنوالانو په اعلامیه کې راغلي د دیجیتلي اسعارو د یوه شتمن کس دغه پلار د تښتونې په قضیه کې د باج غوښتنې جرم شامل دی. لا پاریسین ورځپاڼې رپوټ ورکړی و چې برمته کوونکو د پنځو او اوو میلیونو یورو تر منځ پیسو غوښتنه کړې وه.
د تحقیقاتو له بهیره یوې باخبرې سرچينې د فرانسې خبري آژانس ته وویل د برمته شوي سړي یوه ګوته قطع کړل شوې او که پولیسو پر ساختمان چاپه نه وای وهلې د مغوي کس «د بدن د نورو غړو د پرې کول کېدنې وېره هم موجوده وه.»
نور ولولئ: فرانسه کې ډزې؛ پنځه تنه وژل شوي او یو کس د پولیسو په توقیف کې دی
د فرانسې د کورنیو چارو وزیر، برونو رتایو، پر اکس شبکه د پوليسو لخوا د دغه اختطاف شوي کس د خلاصون عمليات ستايلي دي.
پولیس وايي د برمته شوي سړي مېرمن تحقیق کوونکو ته ویلي چې د هغې مېړه او شتمن زوی ېې چې دواړه په مالتا کې د کریپتو مارکيټینګ یو شرکت لري، له مخکې ګواښل شوي ول.
په پاریس کې د پیسو له پاره د انسان تښتونې دغه پېښه لومړۍ نه ده. د جنوري میاشتې په ۲۱مه د ديويډ بالاند او د هغه د شریک برمته کړل شوي ول. د فرانسې خبري آژانس په حواله بالاند د څه باندې یو میلیارډ ډالرو په ارزښت د لیجر په نوم د کریپټو د یو شرکت له بنسټګرانو څخه دی.
نور ولولئ: فرانسه: د ترهګرۍ ضد عملیاتو کې پنځه افراطي اسلامپاله نیول شوي
برمته کوونکو چې د بالاند د خوشې کولو په بدل کې يې د لوړ باج غوښتنه کړې وه، د بالاند یوه ګوته هم قطع کړې وه. هغه په دوهمه ورځ آزاد کړل شو. د بالاند ملګرې هم د پاریس په اسون علاقه کې په داسې حال کې چې تړل شوې وه د یوه موټر په ډاله کې وموندل شوه. دغې قضیې سره په تړاو ۹ تورن کسان چې په هغو کې یې د ډلې ۲۶ کلن مشر هم شامل دی، تر تحقیقاتو لاندې دي.
نور ولولئ: یو حمله کونکي په پاریس کې درې تنه په چاقو ټپیان کړل
له آرشیف (07.10.2019) څخه یو انځوریز البوم:
د لاتین امریکا د مافیایي بانډونو تر ټولو خطرناک مجرمان
په دې انځوریز رپوټ کې تاسې ته د لاتین امریکاد نشه یي توکو او مافیایي بانډونو تر ټولو خطرناکې څیرې درپيژنو. ځنې له دوی څخه اوس هم په زنداننو کې دي.
انځور: picture-alliance/dpa/M. Guzmanد مکسیکو د سینالوآ په نوم ډلې مشر ګزمان، چې خلک یي ایل چاپو بولي په وار وار د خبرونو په سرټکو کې ځای نیولی دی. نوموړی دوه ځله له زندان څخه په تیښته بریالی شوی هم دی. د FBI او انټرپول په لیست کې تر اوسامه بن لادن وروسته دویم نوم د ده وو. ګزمان د پيسو سپينولو، سړي تښتونې، د مخدره توکو د پلورنې او قتل په پيښو کې په ښکیلتیا تورن په ۲۰۱۷م کال کې امریکا متحده ایالاتو ته سپارل شوی وو.
هیکټور پالما سالازار یا ایل ګوئیرو
سالازار د «ایل چاپو» تر ټولو مهم ملګری وو. نوموړی په ۲۰۰۷ م کال کې د کوکائنو د قاچاق په جرم امریکا ته سپارل شوی وو. د ایل ګوئیرو سزا د هغه د ښو اخلاقو له امله کم کړای شوې وه. هغه د ۱۶ کلونو پر ځای تر ۹ کلن بند وروسته د کولورادو له زندان څخه آزاد او مکسیکو ته وشړل شو. هغه اوس په مکسیکو کې د قتل د جرم له امله د التپلانو په زندان کې چې د سختو امنیتي تدابیرو درلودونکی دی بندی دی.
ګلبیرتو او میګیل رودریګیز اوریخوئیلا
میګیل او ګلبیرتو رودریګیز تر ۱۹۹۵م کاله پورې په کولمبیا کې د «تور» په نوم ډلې مشران وو. د دوی د همکارۍ له کبله پولیس وتوانیدل چې پابلو ایسکوبار هم ونیسي. دغه دواړه وروسته امریکایي چارواکو ته سپارل شوي وو چې په ۲۰۰۶ کې په عمري بند محکوم شول. میګیل د سويلي کارولینا او ګلبیرتو د شمالي کارولینا په زندانونو کې بندیان دي.
دیئیګو مونتویا سانچیز(ډون ډیئیګو)
د امریکا د داخلي استخباراتو FBI د مطلوب ترين کسانو په نوملړ کې د ده نوم په ۱۰ مقام کې ځای درلود. ډون ډیئیګو په ۱۹۹۰ لسیزه کې په کولمبیا کې د «نورتې دیل ویا» مافیایي ډلې مشري کوله. هغه په ۲۰۰۷م کال کې د کولمبیایي پوځ له خوا تر نیول کیدو یو کال وروسته امریکا ته وسپارل شو. په ۲۰۰۹م کال کې د مخدره توکو پر پلورلو، قتل او په زور د پيسو اخیستلو پر جرمونو اعتراف وکړ. هغه ته د ۴۵ کاله بند سزا اورول شوې.
خوآن کارلوس رامیریز آبادیا (چوپیتا)
د ایسکوباراس تر وژل کیدو او د رودریګیز د دواړو ورونو تر نیول کیدو وروسته د «چوپيتا» نوم ډیر اوریدل کیده. چوپيتا امریکا ته کوکائن قاچاق کول. هغه هم په ۲۰۰۷م کال کې په برازیل کې تر نیول کیدو وروسته امریکا ته وسپارل شو. ده ته د ۵۵ کاله بند سزا واورول شوه. هغه د خپل د مخ د بڼې بدلولو له پاره څو جراحي عملیاتونه کړي وو.
ایډګر والدیز ولیارئیل «لاباریي»
ولیارئیل له ایل چاپو سره نږدې اړیکې درلودلې. ده ته په مکسیکو کې د نشه یي توکو تر ټولو خطرناک او ظالم قاچاقبر ویل کیږي. نوموړی په ۲۰۱۰م کال کې په مکسیکو کې ونیول شو او په ۲۰۱۵م کال کې امریکا ته وسپارل شو. والیاریئل چې په ۴۹ کلن بند محکوم شوی اوس په زندان کې دی.
ساندر اویلا بیلتران چې د پاسیفیک په ملکې مشهوره ده، د مکسیکو هیواد پورې تعلق لري. دې ته د مکسیکو د سینالوآ او د کولمبیا د «نورتي دیل ویا» ترمنځ د یوه مهم ارتباطي کس په سترګه کتل کیده. په محاکمه کې پر دې کوم جرم ثابت نه شو، خو د غیر قانوني وسلو ساتلو په جرم کې په ۲۰۱۳م کال کې د میامي یوې محکمې په نږدې شپږ کال بند محکومه کړه. اوس دا د یوې آزادې تبع په توګه ژوند کوي.
نوموړی یو وخت د ایل چاپو ګزمان، یو تر ټولو نږدې ملګری ګڼل کیده خو وروسته یي بیا ډیر سخت دښمن شو. ده د مکسیکو د سینالوآ ډلې پر وړاندې ډیره خونړۍ جګړه هم کړې وه. الفریدو بیلتران لیوا، په ۲۰۰۸م کال کې په مکسیکو کې ونیول شو او په ۲۰۱۴ م کال کې هغه په امریکایي زندان کې وو. نوموړی د مخدره توکو د کاروبار په جرم کې د کولمبیا ښار په یوه زندان کې د خپل عمري بند سزا تیروي.
داماسو لوپيز(ایل لیسینسیادو)
ایل لیسینسیادو یو وخت د پوئنتي ګراندې په نوم زندان مرستیال وو. ایل لیسینسیادو په ۲۰۰۱م کال کې له ایل چاپو سره له زندانه په تیښته کې مرسته او همکاري کړې وه. وروسته له هغې دغه تحصیل یافته کس د ګزمان یا ایل چاپو د تر ټولو نږدې او د باور وړو کسانو په لیست کې شامل شو. نوموړی په ۲۰۱۷م کال په مکسیکو کې تر نیول کیدو وروسته امریکا ته وسپارل شو. د کوکائنو د قاچاق په جرم هغه د عمري بند سزا تیروي.
ویسینتی زمبلادا (ایل ویسینتیلو)
نن سبا د سینالوآ ګینګ مافیايي ډلې مشري اسمعیل زمبلادا کوي چې ویسینتی د هغه زوی دی. نوموړی په ۲۰۰۹م کال کې ونيول شو او درې کاله وروسته امریکایي چارواکو ته وسپارل شو. ایل ویسینتیلو د ایل چاپو پر ضد دوسیه کې له امریکایي چارواکو سره مرسته کوي او له همدې امله ده ته د ۱۵کاله بند سزا اورول شوې وه. خو هغه بیا د څلور کاله بند تر تیرولو وروسته آزاد کړای شو؟
