ولسمشر جو بایدن د کليفورنيا ایالت له اور څخه اغیزمنې سيمې د «آفت ځپلو» سيمو په توګه نومولي دي. هغه وويل چې له کانګرس څخه به د مرستې غوښتنه وکړي. دا اور لګیدنې دا پېښې د کليفورنيا ایالت د تاريخ تر ټولو ناوړه بلل شوي دي.

د لاس اينجلس په شا او خوا سيمو کې د پنځوو سترو اورلګيدنو په نتيجه کې د مړو شوو کسانو شمير لسو ته رسېدلی دی. چارواکو د نورو سیمو د تخليه کولو لارښوونه هم کړې ده. په دې منځ کې په کليفورنيا کې د امريکا متحده ایالاتو ملي ګارډ مستقر کړل شوی دی څو د احتمالي غلاو او چور مخه ونيوله شي.

د کليفورنيا د چارواکو په حواله تر اوسه دې لګیدلو اورونو تر ۱۱۷۵۰ هکتاره څخه ډېره ځمکه سوځولې ده. ويل شوي دي چې تر اوسه د اته ميليارډه ډالرو څخه ډېر مالي زيان اوښتی دی.

د لاس اينجلس د اطفائيې ادارې مشر کرستن کرولي د پلېسدس سيمې اور د لاس اينجلس د تاريخ «د سترو ناورينونو څخه يو بللی» دی. نوموړي وويل چې د باد سرعت چې اور یې نورو ته سیمو ته خپور کړی و، اوس يو څه کم شوی او د څرخي الوتکو له لارې د اور د خاموشه کولو هڅې بيرتته پېل شوي دي.

د چارواکو په حواله د اور لګیدنې له کبله شا او خوا ۱۳۰ زره کسان مجبور شوي دي چې خپل کورونه پريږدي.

له هاليووډ سره تړاو لرونکي ډيری شخصيتونه هم په هغو زرونو کسانو کې شامل دي چې کورونه یې سوځيدلي دي. د هاليووډ فلمي صنعت خپل يو لړ پروګرامونه هم ځنډولي دي

د هاليووډ مشهورو ستورو لکه پېرس هيلتن، بلي کرستل، کیري الويس، رکي ليک او ديان وران تائيد کړې ده چې د کاليفورنيا په ځينو مهمو سيمو کې د لګېدلو اورونو له کبله د دوی کورونه هم سوځيدلي دي. مارک هېمل او جيمز ووډ وويل چې دوی له خپلو کورونو څخه په تېښته مجبور شول.

په کليفورنيا کې لګيدلي ويجاړونکي اور پر نورو سربیره په بهر کې د آلمان يوه تاريخي ودانۍ «ويلا اورورا» هم ګواښي. لکه په انځور کې چې ليدل کيږي چې د اور لمبې دغه ودانۍ ته ډېرې نږدې شوي دي.

د مدیترانې سیندونو په شاوخوا کې د څو پرتو هېوادونو په ځنګلونو کې شدیدي ګرمۍ وژونکې اورلګېدنې رامنځته شوې دي. د یونان په ځنګلونو کې له یوې اونۍ راهیسې اورلګېدنې پیل شوي دي.

د یونان د اطفایې ویاند ویلي دي چې دا تر ټولو شدیده اورلګېدنه ده چې موږ ورسره مخ یوو.

د یونان په رودوس ځنګلونو کې اورلګېدنې دوام لري. د رودوس د ښاروالۍ مرستیال ویلي دي چې غلیظ لوګي تنفوس ستونزمن کړی دی.

له رومانیا، بلغاریا، پولند، سلواکیا او مالتا څخه د اطفایې سلګونه ځواکونه د یونان د اطفایې ځواکونو مرستې له پاره روان شوي دي.

فرانسه، ایټالیا، ترکیه، قبرس، اسرائيل او اردن هم د اطفایې اړوند هليکوپټرې او الوتکې د اورلګېدنې سیمې ته لېږلي دي.

د ملګرو ملتونو د طبیعت ټولنې نړیوال صندوق د معلوماتو له مخې تر ۳۵۰۰ هکټاره ځمکه په یونان کې سوځېدلې.

د یونان په رودوس جزیره کې د پراخې اورلګېدنې له امله په وروستۍ اونۍ کې ۳۰ زره کسان امنو سیمو ته انتقال شوي دي.

په ګنادي او لیندوس سیمو کې سلګونه داوطلبه مرسته کوونکي راغلي دي. د دغو کسانو له ډلې یو تن په هغه سیمه کې چې اورلګېدنه رامنځته شوې ده په اوښکنو سترګو سیمه ایز خبریال ته ویلي چې: «که زه مجبوره شم دلته به مړ شم. زه له دې جزیرې سره مینه لرم.»

ساحلي ساتونکو اعلان کړی دی چې د لیندوس له جنوبي سواحلو تر دوه زره ډېر کسان د کښتیو له طریقه نورو سواحلو ته انتقال کړي دي.

د یونان په رودوس جزیره کې زرګونه سیلانیان او د سیمې اوسېدونکي ورزشي سالونونو، د ښوونځي ودانیو، د کنفراسنونو مراکزو او نورو ځایونو ته انتقال شوي دي.

د یونان د مدني ساتنې اداره په تېرو ۱۲ ورځو کې د ۵۰۰ اورلګېدنې مواردو خبر ورکوي.

د یونان د مدني ساتنې ادارې ویلي دي چې د دې اونۍ په چهارشنبه کې هوا ډېره ګرمه وه او د ۴۶ درجې وړاندوينه شوې وه.

له کورفو سیاحتي جزیرې څخه هم زرګونه کسان انتقال شوي دي. د یونان لومړی وزیر دا وضعیت اقلیمي بدلون بللی دی. د ګرځندویي په موسم کې شدیده ګرمي او په ځنګلونو کې اورلګېدنه سیلانیان او یونان له ستونزو سره مخ کړي دي.

د الجزایر په ګډون په ځینو هېوادونو کې هم د ځنګلونو ځینې برخې سوځېدلي دي. د الجزایر په ځنګلونو کې د قربانیانو شمېر ۳۴ کسانو ته رسیدلی دی. شاوخوا ۸ زره مرسته کوونکي د اور د مهارولو هڅه کوي. د الجزایر په ختیځه برخه کې د دوشنبه په ورځ اورلګېدنه رامنځته شوه. نېږدې ۱۵۰۰ کسان له کلیو او بانډو څخه امنو ځایونو ته انتقال شوي دي.