پاکستان کې د ماين چاودنې دوه تنه وژلي، يو تن ټپي دی
۱۴۰۱ اسفند ۲۱, یکشنبه![Pakistan Kriminalität l Bombenexplosion in Islamabad](https://static.dw.com/image/64196019_800.webp)
د پلوچستان د پارلمان غړی سردار خان رينډ خپل پلرني ښار سني ته په لاره و چې د ساتونکو ګاډی يې د سني شوران په سيمه د کچي بولان په ضلع يا ولسوالۍ کې له ماين سره برابر شو. دغه خبره د سیمې د پولیسو مرستيال کميشنر سميع الله کړې ده.
د راپورونو له مخې په پیښه کې د نوموړي دوه ساتونکي د چاودنې په ځای کې ځای په ځای مړه شوي دي. ياد ځای له ولايتي مرکز کويټې څخه ۲۵۰ کيلومتره لېرې پروت دی. رينډ خپله له دې پېښې روغ رمټ وتلی دی. تر دې دمه هيچا د بريد مسئوليت نه دی منلی.
ښايي دا موضوع هم تاسې ته په زړه پورې وي: د پاکستان خراب اقتصادي حالت او د درملو بحران
د پاکستان په بلوچستان آيالت کې د بلوچستان د آزادۍ پوځ او د نوروو بېلتون غوښتونکو ډلو له خوا په ټيټه سطح پاڅون دوام لري چې هدف يې په اسلام آباد کې مېشت له مرکزي حکومت څخه خپلواکي ده. پاکستاني چارواکي ادعا کوي چې پاڅون کوونکي يې ځپلي، خو په ياد آیالت کې تاوتريخوالی لا جريان لري. په دغه آيالت يا صوبه کې سربېره پر دې پاکستاني طالبانو او د داعش وسله والې ډلې هم وخت نا وخت پر پاکستاني پوځ او نورو ځایونو کې بريدونه تر سره کړي دي.
اې. پي / ن. ص / خ. ح