د محکمې پریکړه په یوه داسې وخت کې صورت نیسي چې په المان کې د مهاجرت او امنیت په هکله بحثونو زور اخیستی دی او د المان له پاره د بدیل ښي اړخي افراطي ګوند (AfD)  ملاتړ زیات شوی دی.

د شخصي معلوماتو د خوندیتوب له کبله د مجرم نوم یوازې سلیمان ای، ښودل شوی دی. سلیمان ای چې تیر کال د می میاشتې په وروستیو کې د المان په لویدیځ منهایم ښار کې د اسلام مخالفې ډلې «پیکس یوروپا» له لورې پر جوړې شوي مظاهرې د یوې چړې په وسیله برید کړی و.

 سلیمان ای مارش یا مظاهرې ته پر یوه وینا وال او څو نورو مظاهره کوونکو تر برید وروسته یو پولیس هم د چړې په وسیله ډیر سخت ټپي کړ و چې وروسته یې بیا په روغتون کې سا ورکړې وه.

که څه هم په دعوی کې ویل شوي چې نوموړي له «اسلامي دولت» ترهګرې ډلې سره همدردي درلوده، خو د ترهګر په توګه محاکمه شوی نه دی.

سلیمان ای په یو مورد کې د قتل او پنځو مواردو کې د قتل د هڅې له تورونو سره مخامخ دی.