نايجر چي شاوخوا ۲۳ ميليونه نفوس لري پکښي يو شمير وسله والې ډلې فعالي دي. امنيتي حلقو ويلي دي چي د دوشنبې د ورځي بريد د داعش يا اسلامي دولت سره تړلي ځايي مليشې کړی دی. د نايجر حکومت له ښارونو څخه دباندي سيمي تر زياتي اندازې تر خپل کنټرول لاندي نه لري.
د حکومت وياند زکريا عبدالرحمان د هيواد په يو رسمي تلويزيون کي د اعلاميې خپرولو پر وخت وويل چي «د اوسېدنې پر سيمو په منظمه توګه د بريدونو په ترڅ کي د دې واري دغه وسله وال بدمعاشان په ظلم او بربريت کي يو بل قدم مخ پر وړاندي تللي دي.»
د حکومت د معلوماتو پر اساس په دغه بريد کي ۱۳۷ انسانان وژل سوي دي. د پيښي په لومړيو خبرونو کي د قربانيانو شمير۶۰ ښودل سوی وو.
د بريد پر وخت څه وسول؟
د يو ځايي چارواکي په وينا پر موټر سايکلونو سپرو وسله والو کسانو د مالي هيواد سرحد ته نژدې د انتازاين، بکورت او وسطانې پر کليو بريد وکړ او «پر هر هغه شي يې ډزي کولې چي ورته محرک ښکاريدی.»
حکومتي وياند ويلي دي: «حکومت د دغو خلکو دغه بربريت غندني. د دغو کسانو نه پر يو شي ايمان سته او نه هم پر قانون يقين لري.»
تر دغه بريد وروسته حکومت درې ورځنی ملي وير اعلان کړ. حکومت په خپله اعلاميه کي ويلي دي چي په سيمه کي به امنيت زيات کړي او په مجرمانه حرکاتو کي ښکيل کسان به عدالت ته راکش کړي.
د توندلارو په بريدونو کي زياتوالی
له هغه وروسته چي په دغه هيواد کي څو اونۍ تر مخه نوی ولسمشر ټاکل سوی دی، په ټول هيواد کي په وسله والو بريدونو کي زياتوالی راغلی دی. د يکشنبې په ورځ (۲۰۲۱ کال د مارچ ۲۱مه) د دغه هيواد يوې محکمې تر سره سوي ټاکنې او پايلي يې تاييد کړې.
تېره اونۍ هم دغه هيواد د يو خونړي بريد شاهد وو او د بورکينا فاسو، مالي او نايجر ترمنځ سرحدي سيمه کي ۶۶ انسانان ووژل سول.
د روان ميلادي کال په جنوري مياشت کي د تيلاباري په مينګيز وسلوالي کي پر دوو کليو په وسله وال بريد کي لږ تر لږه ۱۰۰ انسانان وژل سوي ول.
دغه سيمه د جهادي ډلو مرکز بلل کيږي. د کارپوهانو په وينا د ترهګرۍ ضد اقداماتو له کبله په دغه سيمه کي امنيتي وضعه لا خرابه سوې ده، ځکه چي دغه اقدامات د قومي ملېشو د لا قوي کېدو لامل سوي دي.
آ./ا.ا./ن.ز.
پر ورته موضوع زموږ له آرشيف څخه يو انځوريز راپور(07.08.2019):
«بوکسنګ سسټرز» کلب د یزيدۍ میرمنو او نجونو د پياوړه کولو طرحه ده چې شپږ میاشتې مخکې د (Lotus Flower) یا نیلوفر ګل، په نوم د غیر انتفاعي سازمان له لوري د عراق په کردستان کې پرانیستل شوه. اوس د روانګا کمپ په سالون کې یزيدي ښځې او نجونې په اوونۍ کې پنځه وارې د ورځې دوه ساعته تمرین کوي. د هغوی ډیری یې یو وخت د داعش بندیانې وې او د روحي آزار، فزیکي او جنسي تاوتریخوالي قرباني ګرځیدلې وې.
انځور: DW/F. Campana
چمتووالی
که څه هم بوکس د روانګا کمپ د ښځو او نجونو د «لوتوس فلاور» ورزشي کلب یوازینی فعالیت نه دی، خو د هغوی له پاره په زړه پورې ورزش دی. د دغه غیر انتفاعي سازمان سیمه ایز مشر ویان احمد وایي: «موږ فکر وکړ چې دا ورزش د جسمي او روحي لحاظه د ښځو د غښتلتیا له پاره مناسب روش دی.»
انځور: DW/F. Campana
تمرین
د دغه کلب یوه ورزشکاره حسنا سعید یوسف وایي: «ډیر وختونه چې د بوکس تمرین کوو، د درد او خفګان شیبې رایادوم او هڅه کوم چې د بوکس په ضربو سره یې له شره خلاصه شم.» حسنا او کورنۍ یې په ۲۰۱۴م کال کې د سنجار پر کلیو او بانډو باندې د داعش له هجوم وروړلو راهیسې په روانګا کمپ کې میشت دي. هغوی چې کله پوهه شول چې داعش ورنزدې شوی نو غرونو ته وتښتیدل او هلته یوه اوونۍ پټ ول، څو یې کمپ ته د رسیدو لار ومونده.
انځور: DW/F. Campana
له ورزش سره مینه
حسنا چې ۱۸ کلنه ده وایي چې تل یې له ورزش سره مینه درلوده. هغه وایي چې په ځوانۍ کې یې له تره سره د خپل کاله په یوه خونه کې وزن پورته کول تمرینول. خو حسنا اوس په دې باور ده چې بوکس یا سوک وهنه یو بل شی دی. هغه چې هیله لري ډاکټره شي وايي: «نه غواړم هیڅ وخت د بوکس کولو تمرین پریږدم.»
